باقة حب
من أطفال الرحاب
في يوم تكريم الأم

 
"الجنة تحت أقدام الأمهات" .. ولعل الأم المصرية خاصةً يكون لها أكبر نصيب؛ فباعتراف الجميع رجالاً ونساءً، ومن مختلف الجنسيات، أن الأم المصرية معطاءة بطبعها، تعطي بسعادة وبتفانٍ لا حدود لهما.

تكريمًا للأم في الرحاب؛ قمنا بهذه اللقاءات مع زهور الرحاب الصغار ليرسلوا من خلال الموقع رسالة حب وشكر لأمهاتهم:

هاجر طارق الشافعي ( 7سنوات) تقول: كل عيد وأنت طيبة يا ماما،ربنا يخليكي لي أنا وإخواتي، عايزة أقول لك شكرًا على كل اللي تعمليه لي، خصوصا وأنا عيانة.. تفضلي جنبي طول الليل مش بتنامي علشان تديني الدواء وتفضلي قلقانة علي لغاية ما أخف.

أختها سارة الشافعي (4 سنوات ) قالت: ماما حبيبتي؛ كل سنة وأنت طيبة لأنك طيبة وبتعملي لي كل حاجة احتاجها، وتجيبي لي الفساتين الجميلة.

سيف سامح اسكندر (6سنوات) قال: بحبك يا ماما قوي، وهاجيبلك هدية حلوة.

 
كندة ياسر سكر ( 6سنوات) بعثت لوالدتها السيدة دعاء رسالة عبر "رحابي" قائلة : باحبك يا مامي.. إنت حبيبتي يا عمري، وهاحبك على طول علشان إنت كويسة وحنينة وأحلى أم في الدنيا كلها.

حنين محمد سعد (4سنوات ونصف) تقول لوالدتها: كل سنة وإنت طيبة يا ماما.. أنا مبسوطة قوي طول ما أنا جنبك،ربنا يخليكي لي أنا وبابا. 

أما محمد أحمد حسام ( 6سنوات) فقال بإيجاز: كل سنة وإنت طيبة يا أحسن أم في الدنيا.

 
ليلى أحمد رضوان (6سنوات) قالت : أنا أحبك يا ماما ومش عايزاكي تزعلي مني خالص، علشان ربنا يدخلني الجنة. وهاجيب لك أحلى حاجة تحبيها هدية النهاردة.

محمد أحمد مهران (7 سنوات) قال:كل سنة وإنت طيبة يا أجمل أم فى العالم‎، إحنا دايما تاعبينك بس خلي بالك على صحتك علشان خاطرنا وربنا يخليكي لينا.

تقى أحمد مهران (10سنوات): عايزة أقول لماما إنى باحبها قوى لأنها مش بس مامتي، هي صاحبتي كمان، وكل سنة وهى طيبة مووووووووووه‎

وإذا كان الناس قد اعتادوا على تكريم الأم في هذا اليوم، فلا ينبغي أن ننسى الأب أيضًا، صحيح أنه سيكون سعيدًا بتكريم زوجته، لكنه يستحق أيضًا التكريم لدوره في تحمل مسئولية الأسرة كلها،.