شعراء الرحاب في أمسية بالمركز الثقافي
كتب أحمد غانم
أقام المركز الثقافي بنادي الرحاب بالتنسيق مع مكتبات "أ" مساء الإثنين 21 يونيو أمسية شعرية حضرها عدد من الشعراء وعشاق الأدب بجانب عدد من جمهور نادي الرحاب
قدم للأمسية عماد العادلي المستشار الثقافي لسلسلة مكتبات "أ" الذي تحدث عن التعاون البناء بين المركز الثقافي بنادي الرحاب ومكتبات "أ"؛ ويتضمن برنامجًا متنوعًا ترعاه المكتبة عبر اختيار كتاب ثم تحديد يوم لمناقشته وتقديم دراسات نقدية حوله، ثم تعقد ندوة بحضور مؤلف الكتاب يدور فيها حوار بينه وبين القراء، مشيرًا إلى أنه قد تم اختيار رواية "شيكاغو" للكاتب الأديب علاء الأسواني لتقام ندوة حولها يوم 26 يوليو المقبل، داعيًا الحضور لقراءة الرواية استعدادًا ليوم الندوة, ثم ألقى العادلي مقتطفات من شعر الراحلين بيرم التونسي, وصلاح جاهين, ثم ترك المجال للشعراء الرحابيين ليدلي كل منهم بدلوه
"الكوشة"
الشاعرة الشابة نسرين علاء الدين ألقت قصيدة عامية بعنوان "الكوشة" قالت فيها:
كـــان فـــيه أم مثالية
فـــيــهــا كـل الـحنية
بتحب جوزها وبنتها
الأمـــــــــــورة ديـــه
كــبــرت بــنــتــها الأمــــــورة
وظهر لها عريس في الصورة
الأم شافت بنتها في الكوشة ويّا عريسها
الدمعة فرت منها ده القـلـب كــان حابسها
عـشـان افتكرت أنها بعدت إللي بتونسـها
الــبــنـت شـافــت أمــها
جريت ومسحت دمـعتها
كــلــمــتـها وقــالـت لـها
ان بــيـتهم هـيـكون بيتها
الــبــنت حـست بـقـلـبـها
والأم في الحضن أخدتها
ولاقــت عــريــس بـنتها
جــري وراح باس إيدها
"صوت عالي"
ثم ألقت قصيدة بعنوان "صوت عالي " قالت فيها:
مــش انـا مــرة كـنـت زهــقــانـة
قـلـت أنـزل الّـف فـي الـمـيادين
لاقيت الناس فرحانه ومبسوطين
ومــاحــدش بـيـشـتـكـى من الاسعار.. والكل كويسين
والأطـــــفـــــال بــــتـــجـــــري شـــمـــال ويــمــيــن
إللي بيغني وإللي لابس طرطور واللى ماسك بلالين
والــبــنــات مــاشــييــن مـحـتــرمـيـن
والولاد راجعين من المساجد مصلين
لاتشوف خناقة ولاتسمع شتيمة ولا رجلك تغرز في طين
ولا فــيه زحـمـة عـربـيـات ولا أزمـة مـرور ولا شحاتين
وشــفـــت أم بـــنـــتـهـا جــنــبــهــا طــولــهــا
حست برعشه برد بنتها قلعت جاكتها اديتهولها
وقـــالـــت الام: بــنــتــي مـــــن الـصـالــحــيــن
وشفت زوج وزوجة ماشيين
فــي إيــديـن بـعـض ماسكـين
وحــبــهــم بـاين فـي عيونهم
ومـــع نـفـسـهـم مـتصـالحين
وفجأة
سـمـعـت صوت عالي
يلاااااااااااااااا يانسرين
كفايه نوم .. حضّرت الأكل
وكــلــنــا جـــعـــانــيـن
قمت وفقت وقلت:
يـاه كان حــلـم جميل
"الوصل"
ثم ألقى الدكتور محمد ماجد الصمدي قصيدة بعنوان "الوصل" قال فيها:
انصفنى يا قاضى م اللى بلانى
أنا متبهدل وحالى عيّانى
مظلوم وكل اللى كانوا جنبى
كله نسانى
أنا عايش مع جماعة جيرانى
فى عمارة قديمة وكبيرة
أنا ساكن فى الدور الفوقانى
وجيرانى اللى تحت فقيرة
هما سمر وطيبين
ومن قلبى قريبين
ودايما للخير جايبين
بس مشاكلهم كتيرة
المية بتوصل لى قليلة
ده وهما فاتحين المحبس
اقعد انادى واعمل هليلة
ياللى تحت اقفل حنفيتك
عايز اخد دش عشان ألبس
عندى شغل كتير الليلة
يقفلوها ويسيبوهالى
طبعا ما أنا كبير العيلة
عثمان يجوز اجامله
وبشير أعرف ازاى اعامله
وأى واحد فيهم
باسلم عليه ومش هامله
واهى ماشية حياتنا بالتيلة
ومع الوقت عيالى كبرت
ومشاغلى عن البيت كترت
ماشى مسهّم و كأنى
قدراتى كلها صغرت
كأنى مش شايف قدامى
أعبائى غلبت أحلامى
ومن كتر زحمة أيامى
أهملت ونسيت جيرانى
أعدى عليهم ولا اسلم
وأنسى معاهم أتكلم
واهمالى ليهم علم
يا مصرى انت رحت فين
انت ليه بقيت بوشين
انت باين اتكبرت علينا
احنا مالناش غير بعضينا
واتدخل بيننا ناس سوس
عايزين يهدوا النفوس
وادو جيرانا الفقرا فلوس
بس بشرط يدوسوا فينا
ويعملوا حاجة تؤذينا
أسهل حاجة يعملوا ايه
راحوا قطعوا الميه علينا
يا اخوانا احنا عطشنا
وخلاص شكلنا ما نضفنا
وكان عندنا زرع زينة
راح مات قدام عنينا
دخلت مع جيرانى قضية
مش حقكو تقطعوا ميه
ردوا الميه أصلا لينا
لأة الميه لبيت المصرى
حقى فى تنظيمها حصرى
واحتياجى ليها زاد
حتى بصوا على العداد
أنا ركبتوا عندينا
انت كلامك كلام قديم
ويكون فى علمك ياغشيم
خلاص عدادك بقى لينا
لأة ده انا اوديكوا ف داهية
وأوريكوا ان انا الأصل
انتوا بستهونوا بقضية؟
هيكون ليا فيها الفصل
أنا عاين عقد العداد
وطبعا أنا عندى الوصل
وقعدت أدور عليه
انى الاقيه
ما لاقيتش لا أصل ولا صورة
مع انى ريس أسطورة
لكن مهمل وعيالى كرهونى
ومش عايزينى اطلع فى الصورة
والميه ضاعت يا ولادى
وأنا خلاص مش لاقى الوصل
مع انى عامله فى اعدادى
مع انى فى يوم كنت الأصل
ضحكوا عليا ضحكة صفرا
وراحو قالولى بكل شماتة
لو عطشان والجو حر
وبقالك ماشربتش دهر
ابقى روح اشرب م البحر
شفتو أكتر من دى غتاتة
يا خسارة دى قلة أصل
هى دى غلطتى من الأصل
اه لو كنت لقيت الوصل
"مين فينا صح"
ثم ألقى قصيدة بعنوان "مين فينا صح" قال فيها:
مين فينا صح؟
كان فىه مرة تلات عميان
طلبوا منهم يعرفوا حاجة
دخلوا وحسسوا بامعان
وقالوا ده سؤال كله سذاجة
سألوهم طب مين عرفها
الأول قال أنا هاوصفها
أنا شفت عمدان ع الأرض
أربعة وموازيين بعض
التانى قال له: لأ غلطان
ده زيه زى التعبان
التالت قال: يا مساطيل
دى مقشة من النوع الطويل
وراحوا مسكوا فى خناق بعض
ومرمطوا ببعض الأرض
تفتكروا مين فيهم الصح؟
طب مين فيهم كان أنصح؟
أكيد هتقولوا دول مجانين
ما هو لو كانوا عميان عاقلين
كانوا قالوا اجابات متشابهة
طب هيجيبوا العقل منين؟
بصر مافيش وبصيرة تافهة
ولا حد ليه رأى مخالف؟
هو فى حد للحقيقة عارف؟
طب ايه رأيكم فى مفاجأة
على فكرة كلهم صح
لو نسمع بعضنا نبقى
رؤيتنا للصورة أوضح
الأولانى مسك رجليه
قال عواميد برافو عليه
التانى مسك زلومة
قال تعبان حاجة مفهومة
واللى مسك ديله قال
دى مقشة.. فضوا الموال
كل واحد قال الحقيقة
وعبر عن خبرته بطريقة
وعشان مش بيشوفوا بعض
قاموا اتخانقوا قوام مع بعض
لو كل واحد شاف التانى
وعرف يناقشه فى كل معانى
كانوا وبمجهود قليل
عرفوا ان الشىء ده فيل
" إمرأة"
ثم ألقت مدام نعمت المنيلاوي قصيدة بعنوان" إمرأة" قالت فيها:
ياإمرأة ياكورة نار يازوبعة في فنجان
ياما دحرجك بين متهات عقله وفكره
وكان معاك أشعب القلب سندباد رحال
يتوه منك في العتمة ويفوق على قولة نزوة
وانتي يامسكينة يا جايه من المريخ
على فين تودي همومك وفين دي سكة
اللي يروح ميجيش
كما ألقى كريم زيدان المدير المساعد بالمركز الثقافي أبيات شعر للإمام الشافعي بعنوان "ولما قسى القلب" كما ألقى أبيات تعود للصحابي الجليل علي بن أبي طالب والتي قالها تغزًلا في زوجته السيدة فاطمة بنت الرسول صلى الله عليه وسلم وهي تضع عود السواك في فمها:
حظيت يا عود الأراك بثغرها
أما خشيت يا أراك أن أراك
لو كان غيرك في القتال قتلته
ما فر مني يا سواك سواك
كما ألقى محمد الجندي مشرف النشاط المسرحي بنادي الرحاب بعض من قصائده الزجلية
ثم أنشد المطرب الشاب محمد الغندور أغنيتين الأولى بعنوان "رحلة" والثانية بعنوان "أنا النيل"
عدد الزيارات
211 
أضف تعليق