ثورة 25 يناير.. وحوار ساخن بين الرحابيين على "فيس بوك"

كتب- أحمد غانم

"مبارك بعد ما مات قابل السادات وعبد الناصر، سألوه: هاه.. سم ولا منصة؟ رد عليهم بحرقة وقال: فيس بوك" طرفة انتشرت كالنار في الهشيم بعد ثورة الشباب في مصر، لكنها تمثل حقيقة لا يمكن أن نغفلها، فالتاريخ سيسطر بين صفحاته أن ثورة شباب 25 يناير قد انطلقت أولا من على " فيس بوك" متجهة إلى ميدان التحرير بوسط العاصمة القاهرة، وسرعان ما امتدت شرارة الثورة لكل أرجاء وربوع مصر في جمعة الغضب 28 يناير.. وبنفس درجة اشتعال الثورة في الميدان كانت سخونة الحوار القائم بين عدد من سكان الرحاب على مجموعات "فيس بوك" والتى نرصدها لكم عبر سطور هذا التحقيق:

فمثلا على جروب "محبي الرحاب" عبّر عمر بادوغيش وهو من السعودية ومن سكان الرحاب عن شكره وعرفانه لأبطال الرحاب الشباب الذين نجحوا باقتدار في حماية المدينة خلال الفترة الحرجة التي تمر بها مصر، داعيًا الله أن يحميها وقال: "قرأنا بالتفصيل في الصحف ما قام به الشباب الأبطال لحماية مساكن الرحاب".

أما آلاء كمال عضو جروب "رابطة شباب مدينة الرحاب" فقالت: "لكل الأهالي اللى بيحصل لها اغتصاب لحرمات بيوتها .. تغلي الماء وتسكبه على المغتصبين"

أما العضو إيمان فحثت سكان الرحاب على التفاعل مع الأحداث قائلة: "هو ياجماعة احنا مالناش نفس نعمل مظاهرات ولا ايه..أنا مش باتريق.. أنا بتكلم بجد..هو أحنا مش جزء من البلد دي ولا ايه"

فيما قالت ريم وهدان: "هتفوا بالنيابة عنك «الشعب يريد إسقاط النظام».. استنشقوا الغاز المسيل للدموع، وبكوا من أجل حقوق منهوبة.. تلقوا الرصاصات المطاطية، وصرخوا «آه يا مصر وآه يا مصر».. وفى النهاية، نهاية قصتهم وبداية الحدوتة، سالت دماؤهم من أجلك أنت. كانوا أئمة فقالوا «كلمة حق فى وجه سلطان جائر»، وكانوا قديسين فهتفوا «سلمية سلمية».. شهداء ماتوا"

وهتفت شيرى زين الدين: "قوم يا محمد.. قوم يا حنا .. بكرة مصر هتبقى جنة"

مبارك وبن على

أما جروب Al-Rehab City وهو الأكبر عددًا على "فيس بوك" ويضم ما يقرب من 18 ألف عضو فوجدنل فيه من يتعاطف مع مبارك، ويقول عز شريف: "بن على كان ضابط شرطة، ومبارك قائد عسكرى.. بن على كان يحرم ما أحله الله ومبارك لم يتطرق إلى تحريم أى حلال.. بن على أضاع الشعب التونسى فلا تعليم ولا اقتصاد ومبارك رجل اقتصاد ورجل ازدهر التعليم فى عصره وانطلقت الحريات. بن على جبان وهرب حسنى مبارك رجل... وقد المسئولية ومش حيرمى البلد ويهرب، بالعكس مهما كان جريح الرجل متمسك بكرامته ...لازم الشرعية وبعدين احنا مش عايزين رئيس حد يطعن فى شرعيته ولا الناس كل شويه تنزل الشارع تتظاهر وتقول يسقط الرئيس لأنه غير شرعي وبعدين عندما نحكم على الرئيس نقارن بينه وبين السابقين, وبعدين الرجل له فعلا أخطاء كتيرة وله مساوئ كتيرة بس ما يستاهلش اننا نطرده.. كفايه تلاتين سنة فى أمن وأمان بدون حروب ولا دمار ولا خسائر فى الارواح.. عهد مبارك ملئ بالمساوئ ولكن هناك أيضًا مميزات.. والرجل حقق كل مطالب الشعب فلا بستحق إلا الخروج بكرامته وشرفه"

أما العضوة سحر  كاريوز فقالت: "معلش اسمحوا لي واحد زي وائل غنيم ده في الآخر هيرجع دبي للفيلا بتاعته وحمام السباحة مع مراته الأمريكيه وشغله في جوجل.. والبرادعي هيرجع "فيينا" برضه لحياة مرفهة.. واحنا بقه عيالنا قاعدبن في البيت من غير مدارس.

وتساءلت سحر: هل حد منكم يعرف كام بيت مفتوح من السياحة؟ كل البيوت دي خربت هيعيشوا وياكلوا منين؟ المصانع اللي قفلت.. المصالح اللي وقفت .... إحنا عاوزين نغير للأحسن مش نقف نقول: امشي وانا مش امشي.. إحنا دلوقت عرفنا نقدر نعمل إيه ولو مااتعملش هننزل تاني نقول فين والا هنبقي عاملين زي الدبة اللي قتلت صاحبها؟ .. ماحدش خايف خلاص بس لا زم نوريه ازاي إحنا نقدر نعمل اللي هوه ما عملهوش فارجوكم تعقلوا علشان خاطر أولادكم.

اللجان الشعبية

أما هشام المصري فناشد المصريين نشر اللجان الشعبية بكثرة خاصة بعد خطاب الرئيس مساء الخميس 11 فبراير قائلا "نهيب بكل المصريين حماية وتأمين مبنى التلفزيون المصري والكنائس وجميع المباني العامة ومكتبة الاسكندرية والمتاحف الأثرية"
وأضاف "أنا رجعت من الميدان .. والحمد لله إني رحت تاني النهاردة .... في كلام كتييييييييييير أوي عاوز أقوله ... إن شاء الله أرتاح بس شوية وأعملكم تقرير تاني يتضمن الوضع السياسي الحالي بتفاصيل أكبر ...... بس عاوز أقول: يا جماعة مصر اللي إحنا عاوزينها موجودة في التحرير..إن شاء الله رايح بكره الميدان.. مين معايا؟"

وناشدت نادية مدكور سكان الرحاب مشاركة ثوار التحرير قائلة: " شارك ثوار التحرير وانزل إلى الشارع يوم الجمعة الساعة الثانية ظهرًا وارفع علم مصر عاليًا...علمك المرفوع تأييد للثورة وتضامن مع مطالبها. ولو مش قادر أروح التحرير... أقدر من تحت بيتي أوصل صوتي ومشاركتي بتصرف رمزي. بيقولوا مش كل المصريين بيؤيدوا الثورة، لكن لو كلنا وقفنا محتجين أمام بيوتنا ورافعين علم بلدنا في وقت واحد...العالم كله هيعرف إن كل الشعب ثائر ورغبته واحدة وثابت على موقفه... وإن شاء الله ربنا هينصرنا لما نقوى ببعض"

طرائف الثورة

وفي إطار الطرفة قال كريم بكري: "يا جماعة حسني مبارك هيطلع كمان شوية على الهواء يوجه كلمة للشعب المصري بمناسبة المولد النبوي الشريف".. وقال " بعد الثورة مصر وتونس سيتقابلان في دور الثمانية والفائز منهما سيقابل الفائز من اليمن والأردن"

ويقول طارق علام بتهكم: "إلا ياجماعة أنا فاكر إن فيه واحد في أول الثورة يوم الخميس اللي قبل جمعة الغضب كان بيهددنا إنه حيجيب لنا أخوه الكبير لو إحنا عملنا حاجة وحشة في الرحاب؛ زي مظاهرة سلمية للنساء والأطفال.. وكان خايف قوى على شقته وعربيته اللي دفع فيهم دم قلبه، حد يعرف هو فين لحسن أنا من ساعتها قاعد فى البيت خايف أنزل لأحسن أخوه الكبير يضربني أنا وصحابى بالرصاص الحي؟. بس أنا سمعت كده إن أخوه الكبير جه و"باباهات" صحابي في الرحاب كانو واقفين له بالشوم فأخذ البوكس بتاعه وراح إستخبى ومش عارفين هو فين دلوقتى - ياريت حد يطمني بقى لأحسن أنا دلوقتى بقالي إسبوعين قاعد فى البيت مرعوب"

ويقول أيضًا: ياجماعة من فضلكم أى حد نازل التحرير بكرة ياخذ معاه ولو "إزازة" كاتشب واحدة لدعم الناس دي.. عيب فعلا في موقف زى ده ندي لهم كنتاكى من غير كاتشب.. وخلوا بالكم إنهم حيقبضوا على أى حد معاه أجندة مع العلم إن الحكومة موفرة كشاكيل سلك لكل فرد في الشعب المصري يبقى لازمتها إيه بقى الأجندات؟؟

صلاة الغائب

أما محمد الجندي فقال: "بما إن الكثير منا لن يستطيع حضور جمعة الشهداء في ميدان الشهداء وتعبيرًا من أهل الرحاب لأخواننا الذين ضحوا بأرواحهم الطاهرة كي نعيش بكرامة ونسترد وطننا الغالي.. إن شاء الله فيه صلاة غائب بعد صلاة الجمعة بمسجد احمد عفيفي ثم تليها وقفة سلمية أمام المسجد تضامنًا مع أسر الشهداء.

مبارك وفاروق

فيما قارن أحمد حسين بين مبارك والملك فاروق قائلا: "فاروق.. لما الثورة قامت قال: إن نقطة دم مصرية أثمن عندي من كل عروش الدنيا" وردت عليه سحر بالقول: وايش جاب الصعلوك للملوك ..... هو كده أثبت أنه صعلوك للأسف، فيما قال إيهاب فهمي: علشان الملك فاروق كان إبن ناس ومتربي يا مستر أحمد وعنده دم ... مش زي ناس تانية ماعندهاش ريحة الدم ... وبكل سهولة تقول لك أنا بعت نفسي .. وأكيد اللي باع نفسه مش هيشترى غيره ... وما يستاهلش إن حد يشتريه أو يبقي عليه ... ويبقى خسارة مجرد التفكير فيه ... مش كده وألا إيه يا مستر أحمد حسين؟

فيما قال محمد صالح: لما طُلب من الملك فاروق مغادرة البلاد في التو واللحظة عملناه عيد قومي.. واليوم عندما نطلب ذات المطلب مع التنحي عن الحكم فقط أصبحنا قليلين أدب وعجبي.

سحر وإيهاب

وقالت العضوة سحر:  في حاجه ناس كتير مش واخده بالها منها، وهي إن عدد كبير أوي من الناس عندها جهل سياسي واجتماعي.. كل اللي بيتقال دلوقتي ده كان ممنوع قبل كده.. فلازم اللي كان طول عمره مكبوت ومكتوم وبيصرخ جوه نفسه ينفجر ويقول بأعلي صوت اللي نفسه فيه ومش هيقبل إن أي حد يفرض رأيه عليه أو يقول له انت غلط ودي بقه نقطة الضعف اللي الحكومة مستنياها..... وكل يوم اسمع ان كل واحد بيخسر صديق عمره أو أصدقاء لأنهم اختلفوا في الرأي.. وهنا بقى تيجي خطة الحكومة.. عاوزين تقعدوا في الميدان؟ اقعدوا.. عاوزين نت وفيس؟ اشبعوا دا أحسن لهم علشان يعرفوا الشعب بيفكر ازاي وايه بيتقال.. وكمان خدوا وائل غنيم ..... خدوا راحتكم خالص..هم شايفين إن الناس هتمسك في بعض وهيتقلبوا علي بعض. ناس كتير حالها واقف السياحة انضربت والمدارس والمحلات قفلت..علشان كده لازم يكون فيه حملة توعية للجهلاء . مش هينفع نقعد في الميدان إلي أجل غير مسمى لازم نكون واقعيين..الدستور محتاج خبراء في القانون علشان يتغير والناس لازم تعرف تحط الضغط فين..لأننا كده في نظر الحكومة لا نعرف يعني إيه ديموقراطية ولا تنفع معنا لأننا هنقعد نطلع تلاتين سنة كبت من غير ما يكون فيه خطة ازاي نمارسها بصحيح .. فياريت نخلي بالنا الثورة دي محتاجه صورة شرعية تمثلها وتطالب بمطالبها قدام العالم.. ماينفعش نقعد نقول أمشي من غير ما يكون في إيدنا قوة وضمان القانون والوعي بالنتائج وتحقيق الهدف.

ورد عليها ايهاب فهمى قائلا: عزيزتى سحر ... مافيش حد بيخسر حد لو كانت العلاقة حقيقية وصادقة من الطرفين ... والاختلاف فى الرأي لا يعنى الخلاف ... والشعب المصري عمره ما هيتقلب على بعضه نهائيا ... بالعكس ... مع الوقت ومع تكشف الحقائق بيزداد قربًا وتلاحمًا وإتفاقًا على نفس الرأي والمطالب ... وأعتقد إن مافيش حد دلوقتي جاهل ومش من حق حد يتهم غيره بالجهل ... الجهل ده نسبي يا عزيزتي ... ومافيش حد بيعرف كل حاجة ... وخبراء الدستور طول عمرهم موجودين والدستور ما اتغيرش برضه ... يا ترى ليه؟؟؟ ... والناس عارفه تحط الضغط فين وحطته في المكان المناسب وعلشان كده ظهر للعالم كله، ومهما حاول النظام الفاسد الالتفاف حول مطالبهم إلا إنه في النهاية سيستجيب ويرحل ولن يستطيع الصمود.. أما من حيث الديموقراطية ... فالحكومة نفسها لا تعرف معناها حتى تحكم هي علينا بأننا نعرفها أم لا ... مع تحياتى واحترامى لحضرتك كمواطنة مصرية حريصة على مصلحة مصر والمصريين الشرفاء الذين يسعون لاسترداد قيم كثيرة كانوا فاقدينها"

أما العضو عماد فدعا من يريد الاستثمار في المستقبل للذهاب إلى سيناء وخاصة العريش حيث لم يهتم النظام السابق بها.. في العريش شواطىء جميلة وأراضي زراعية ومناظر جميلة قائلا "لعن الله الفاسدين اللي تعمدوا خراب البلد"

أما أحمد كامل فقال: لازم نشتغل كلنا على إصلاح مصر بعد الثورة, كل واحد في مكانه, لازم نوجه كل طاقاتنا في اتجاه إيجابي وإن شاء الله مصر هتنطلق للأمام.

تذكرت عيد الحب

أما أمل سمير فقالت: عندى اقتراح يا ريت كلنا نوافق عليه ونعمله: يوم 14 فبراير يوم عيد الحب يا ريت كل الرحاب بشبابها وأمهاتها وابهاتها وستاتها ورجالتها وأطفالها نقف الساعة 2 الظهر ساعة حب وليست حداد على أرواح شهداء الحرية علشان كل أم تحس بأمهات الشهداء، وكل أب يشعر بشعور أباء الشهداء، وكل زوجة وكل... يا رب كل المصريين يفوقوا بقى وتنزاح الغشاوة اللى على عينيهم، والقساوة اللي في قلوبهم، واللامبالاة اللي لسه في شوية فيهم.. يا ريت نحس ببعض بقى ونقف ايد واحدة بقى نحرر قلوبنا وعقولنا وبلدنا.. نحررها من الخوف والفساد والتكاسل والهم.. كفاية بقى تطنيش وساعتها هنبقى أرقى وأحسن شعوب العالم .. وماحدش في الدنيا هيقدر يستغلنا ثانى أبدًا..الخوف لسه ساكن قلوبنا والـ "لأ" دابت جوا عقولنا والـ "أه" مررت حياتنا والحسرة والكسرة ثنت ظهورنا, لحد امتى هنفضل نخاف ونكدب وندارى؟ لحد امتى لسانا هيفضل متداري, لحد امتى عيونا هتفضل مكسورة م القهر والعذاب مذلولة؟

أما نهلة ديهوم فقدمت خدمة لأعضاء الجروب حيث وضعت نصوص المواد 76 و77 و88 و139 و85 و82 من الدستور المصري، فيما عبرت انجى الشاذلى عن الأزمة بكتابة شعر قائلة:
هتقولي ظالمه هاقولك برضه بحبها
هتقولي ضلمة .. هاقولك ده سواد شعرها
هتقولي زحمة .. هقولك علشان بنعشق أرضها
جرب كده تسهر لوحدك علي شط نيلها وحبها
وشايل في قلبك هموم الدنيا كلها وبرضه بيتحبها

النهب بطرق قانونية

أما ريم وهدان فقالت: يا ناااااااس,, يا مصريين,, أرجوكم بلاش الأفورة.. وائل غنيم فوق راسنا واحترمناه أوي,, بس بلاش تكبير المواضيع وتأليه الناس.

فيه زيه كتيييييير,, وفيه ناس لسه أهاليها ماتعرفش عنها حاجة.  فيما نقل العضو أحمد حسين حديثا لموظفة داخل المصرف العربي الدولي لصباح دريم قالت فيه: هناك حسابات باسم مسئولين كبار في الدولة يتم تحويلها للخارج بدون قيود أو تحريات بأوامر من عاطف عبيد رئيس مجلس الإدارة ورئيس الوزراء الأسبق مع العلم أن المصرف لا ييخضع لرقابة البنك المركزي.. موأمرة تامة من زمان.. صرخة للنائب العام بالتدخل فالمشكلة ان المصرف دا منشأ بشكل خاص ولا يخضع للرقابة ولا الوصاية ودا كان من شروط وقواعد انشائه زي ما قال السفير ابراهيم يسري إنه لما اتعرض عليهم في الشئون القانونية بالوزارة رفضوه لكن كان فيه إصرار غريب علي انشائه واخيرا دلوقتي عرفنا ليه الإصرار الغريب إن الحسابات سرية وبرموز مختصرة.. مش اسماء كاملة علي حسب رواية الموظفة من داخل المصرف.

وردت نهلة ديهوم بالقول: فعلا يا جماعة الحسابات بره بتتجمد حتى اسالوا على بن زين العابدين.

خالد سعيد

أما هبة هشام فأرجعت فضل اشتعال الثورة إلى الشاب السكندري الذي قُتل على يد الشرطة خالد سعيد قائلة "يا خالد يا من أشعل الثورة في قلوب كل من يحب هذا البلد ولا يزال يري فيها اشراقة شمس أو ضوء أمل...يا خالد سيظل اسمك واسم كل هؤلاء الشهداء وكل من قال "لا" ليحمي كل مصري من الفساد محفورًا بدمائكم في قلوبنا يحكي عنه تاريخنا لينير مستقبل افضل.

أما أكثر ما أعجب "تقوى الجبري" في الأحداث فهي روح التعاون وحب الغير قائلة:"لقيت حاجات كتير كنا فاقدينها بسبب ان كل واحد بيدور علي مصلحته.. بس الناس كانت زهقانة وقرفانة إن مافيش جديد.. مافيش حلم .. مافيش أمل في أي حاجة..  اللي بنبات فيه بنصبح فيه.. هاحلم ازاي بالتغير وأنا عارفة ان ماحدش هيساعدني .. لكن عمري ماشفت الناس زي اليومين دول.. عايزين بكره أحسن وأفضل لكل الفئات والاعمار والأديان وكل واحد بيحاول يحمي التاني لأنه اصبح لدينا هدف واحد هو التغير ورفع اسم مصر علي مستوي العالم.