|
الاضافة بواسطة ابن عثمان
تاريخ الاضافة
15/07/2007
المدونات دي اختراع هايل قوي، ياريته كان موجود أيام ما كنت عايش في ألمانيا، كنت وفرت على نفسي الجهد اللي كنت بأبذله في عمل "رسائل ابن عثمان من بلاد الألمان" اللي كنت بأبعتها لأهلي واصحابي كل أسبوعين، أياميها (الكلام ده من ييجي 7 سنين) كنت بأسجلها ملفات أوديو ريل بلاير عشان الحجم يبقى معقول وأقعد أبعد في إيميلات، واللي الميل بوكس بتاعه مليان يرجعلي رسالة خطأ .. وعيش بآ |
|
بما إن بآ أيام بلاد الألمان خلصت وحل محلها بلاد الـ ...(ولا مالوش لزمة، خلينا بأدبنا أحسن) يبقى لازم ابن عثمان يفكر في اسم تاني للسلسلة بتاعته.
وبعد تفكير عميق، وتقليب للبدائل استقر الرأي على اسم المدونة الجديدة ..
قررت أسمي مدونتي .. مدونة "ابن عثمان فيما بعد بلاد الألمان"
ألا فليبلغ الحاضر الغائب، أن مدونات رحابي هتشهد ميلاد مدونة جديدة لابن عثمان باشا على سن ورمح
(اللهم ارزقنا التواضع يا رب)
طبعاً بعضكوا هيقول "طز" .. يطلع مين ابن عثمان ده
ومعاكو حق .. اللي ما يعرفش يقول صابون
(مرة تانية .. اللهم ارزقنا التواضع يا رب)
أوعدكو إني هأعرفكم بنفسي بالتفصيل في الحلقات الجاية إن شاء الله، أو بلاش بالتفصيل دي عشان ما تزهقوش.
أنا هأركز على حاجة واحدة أساسية، وأظن إن هي دي اللي يهمني إني أوصلها، ألا وهي ..
إيه اللي يخلي بني آدم عاقل يسيب بلاد الألمان ويرجع يعيش في مصر؟
أنا هأحكي لكم .. وإنتوا تحكموا
بس الحلقة الجاية وعليكو خير
في أمان الله
|
