أقسام العقارات والمبوبة والدليل مازالوا تحت التطوير وسيتم الإنتهاء منهم قريباً بإذن الله

  
            أخبار ومقالات     العضوية    
| استعراض كافة المواضيع
 نصائح وإرشادات عقارية
نوع العقار:
في:
رقم الاعلان:
 
إحصائيات المدونات
عدد المدونات : 496
عدد التعليقات : 1223
إعلانات
المدونات


إيه أحسن حاجة في مصر؟
 

الاضافة بواسطة ابن عثمان
تاريخ الاضافة 05/01/2008

طبعاً .. كنت وعدتكم إني هأكمل مدونة "ابن عثمان فيما بعد بلاد الألمان" .. لكن للأسف انشغلت جداً .. النهاردة بقى عندي رغبة شديدة وملحة في الكتابة .. بس في موضوع تاني .. فقلت أستأذنكم الأول إني أأجّل استكمال الحلقات الباقية من مدونة "ما بد بلاد الألمان" .. ونتكلم النهاردة في موضوع جديد .. وبما إنكم طبعاً ناس ذوق جداً .. فأكيد إنتو موافقين 
الحكاية ومافيها إني اليومين دول بأقضي الأجازة بتاعتي في ألمانيا، ولإني بأحب الكتب جداً، بأقضى ساعات طويلة في المكتبات أشوف إيه آخر الكتب اللي نزلت، المهم من غير ما أطول عليكو، لفت نظري كتاب عنوانه (das Beste an Deutschland) ومعناه: (أفضل ما في ألمانيا)، وبقية العنوان هي (250 سبب، تخلينا نحب بلدنا).



الكتاب فكرته وهمية وإخراجه رائع جداً، المؤلف حاطط كل سبب في صفحتين قدام بعض، الصفحة الشمال فيها الكلام والصفحة اليمين فيها صورة مالية الصفحة كلها، يعني 500 صفحة من الحجم الكبير.



قعدت أقلب في صفحات الكتاب ده، لقيت إن الـ 250 سبب دول متوزعين ما بين 3 فئات ..

الفئة الأولى هي ماركات ألمانية مشهورة في العالم كله (زي مرسيدس، وبي إم، ودكتور أوتكر، ونيفيا، ... الخ) ..

والفئة التانية هي شخصيات ألمانية معاصرة مشهورة وليها تأثير في ألمانيا وفي العالم كله (زي جونتر جراس مثلاً وفرانتس بيكنباور وشوماخر، ... الخ) .. ولاحظت إنه ما جابش سيرة حد من القدامى (زي الشاعر والفيلسوف جوته)، كانت كل الشخصيات المكتوبة ناس معاصرة لسة عايشين في وقتنا ده..

والفئة التالتة هي أماكن أو مباني معمارية في ألمانيا ليها شهرة سياحية أو تاريخية أو متاحف ومعارض بتخلي الناس تجيلها من آخر الدنيا عشان تتفرج عليها.



في رأيي، إن الكاتب كان ممكن يزوّد عن الـ 250 سبب اللي ذكرهم، أنا أعرف حاجات تانية كتيرة تخلي الألمان يفخروا ببلدهم، وما اتذكرتش في الكتاب، وأكيد الحاجات دي مش غايبة عن المؤلف، بس أظن إنه ما رضيش يزود عشان الكتاب ما يتضخمش أكتر من كدة.



الحقيقة إن الموضوع ده خلاني أفكر تفكير طويل في بلدنا وأحوالها. هل نقدر نعمل كتاب زي الكتاب ده بيتكلم عن مصر ويبقى عنوانه: (أفضل ما في مصر؟ 250 سبب تخلينا نحب مصر النهاردة؟). بلاش 250 دي لحسن صعبة .. هل هنعرف نجمّع ولو 25 سبب بس؟



لما حاولت أدور ع النت، أشوف في حد كتب في الموضوع ده قبل كدة ولا لأ، فوجئت بإن معظم المكتوب كان عن "يبقى إنت أكيد أكيد في مصر" .. لقيت جروبس كتيرة ع الفيس بوك مليانة صور مسخرة (بصراحة تهلك من الضحك) .. بس كلها بتصب في اتجاه واحد .. هو نقد الأوضاع السيئة في مصر .. مالقيتش حد خالص بيتكلم عن الحاجات الكويسة في بلدنا.



عشان كدة فكرت أكتب المدونة دي .. وأرجو من إخواني الرحابيين إنهم يساعدوني بتعليقاتهم عشان نثريها .. ونجمّع فيها لستة بكل الحاجات الحلوة اللي في مصر .. خلونا ننسى شوية الهموم والمشاكل الكتيرة اللي حولينا .. ونُبرِز الحاجات الكويسة.



.. وللكلام بقية، إن كان في العمر بقية ..
 
التعليقات
 

soma
00/00/0000 		والله فكرة رائعة
حقولك على حاجه غريبه قوي انا كنت لسه بفكر فيها النهاردة فبل ماقرا مدونتك... استغرب جدا اننا شعب يحب السخرية وان لم نجد مانسخر منه نسخر من أنفسنا انا شفت المواقع اللي قلت عليهاوفعلا تضحك جدا لكن العدل اننا نتكلم عن ايجابيات بلدنا عشان نقدر نكمل المسيرة..حقولك حاجه كمان .. أنا بحب اتكلم عن الأشياء الجميلة لكن افاجأ باني أقابل بناس يحسسوني اني عايشة في برج عاجي ومش حاسه بالمشكلات اللي حواليا انا أما كنت في أمريكا شفت كتاب بس بيعرض النباتات اللي بتعيش في البلد اللي كنت فيها Buffalo,NY وصور النباتات دي وأسمها العلمي والتجاري شيء جميل الناس هنا ماتعرفشي شكل بشنين النيل شكله ايه!!! معلشي انا طولت عليك سامحني بس الحقيقة عجبتني قوي الفكرة تحياتي وفي انتظار المزيد
الإبلاغ عن إساءة  


ابن عثمان
00/00/0000 		منتجات مصرية متميزة
شكراً يا سوما على مشاركتك، إنتو مش معايا إن فيه منتجات، مصر متميزة فيها؟ يعني مثلاً .. المنتجات الزراعية زي الخضار والفاكهة .. أنا بأشوف البصل والبطاطس والفاصوليا المصرية بتتباع في السوبرماركت هنا في ألمانيا. و الملابس والمنسوجات القطنية، كتير منها بيتصدر لأوروبا وأمريكا وبتتباع في أرقى المحلات (وإن كان مش دايماً بيتكتب عليها إنها مصنوعة في مصر) أنا أعرف أصدقاء، ومن جيراننا في الرحاب كمان، شغلتهم بس تصدير الملابس المصنوعة في مصر لسلاسل محلات مشهورة، بس طبعاً بيحطوا الماركة بتاعتهم عليها. وكمان المشغولات اليدوية handmade؟ وكمان الأثاث الخشبي؟ هاه؟ مين يزود؟
الإبلاغ عن إساءة  


iTarek
00/00/0000 		مصر بلد اسلامي
انا شايف ان احسن حاجة في مصر هي انها بلد اسلامي, يعني فيها جوامع كتير وممكن اصلي في اي وقت في الجامع واستمتع بصحبة اخواتي في الله, طبعاً هي مش اسلامي قوي لسة بشوف حجات غريبة لكن انشاء الله الوضع يتغير, كمان مصر فيها ناس طيبين قوي , والجريمة فيها مش كتير ذي البلاد التانية.. انا اخويا كان في نيويورك و بيقولي انه الجريمة هناك كتير بشكل بشع.. علي اي حال ان بحب مصر برغم اني مش مصري , وشايف ان كل حاجة في مصر حلوة..
الإبلاغ عن إساءة  


ابن عثمان
00/00/0000 		بلد الصالحين
شكراً يا آي طارق، كلامك عن مصر فكرني بكلام واحد صاحبي - برضه مش مصري - كان بيقول: يكفيك في مصر إنك بتمشي في مكان قد يكون واحد زي الإمام الشافعي مشي فيه... وكان دايماً يقول:إن عظمة المكان مش بس بتاريخ المباني القديمة اللي فيه وإنما بعظمة الناس اللي عاشوا فيه، روحهم بتفضل ترفرف على المكان حتى بعد ما يموتوا بقرون... شوف بأة فيه كام واحد من الصالحين عاشوا في مصر ... وعلى فكرة الصالحين لسة ما خلصوش من مصر ...
الإبلاغ عن إساءة  


حمدى سعد
00/00/0000 		هو ده الكلام !!!!! هى ديه ......ابناء مصر
احييك بصراحة كنت شاعر بيك وانا باقرا مدونتك كما لواننى اشاهد جزء من فيلم النمر الاسود وخاصة اثناء تدريباته وصوت الاغنية المعروفة تدوى ( من منا لم يستشعر مصر عند هذا الجزء من الفيلم )وارجو منك بعد استطلاع الاراء ان تبدا فورا حتى لو كان الموضوع على الرحاب فقط حيث ان كثير من الرحابيين لم يتعرفوا على مصر كلهاواشخاصهاورموزها ومرة اخرى لك منى الف سلام وتحية
الإبلاغ عن إساءة  


soma
00/00/0000 		الحب هو الحل
أنتوا عارفين ياجماعة اننا نملك من الصناعات اليدوية النادرة مايجعلنا ملوك هذا المجال لكن للأسف نفسي يكون فيه ناس يدعموا هذا الأتجاه.. وزي مابتقول يابن عثمان في منتجات كتير حلوة وبتتصدر..انتوا عارفين ان في مصممين أزياء مصريين بيعملوا ديفيليهات رائعة.. ده غيرمنتجات مكملات الزينه زي الشنط الجلدوالجاكيتات الجلد وغيرها يعني انا اعرف ان معظم الخليجيين بييجوا يشتروا منتجات الجلود من مصر أحنا بس محتاجين نزود انتمائنا ونعلم أولادنا حب مصر مهما كانت الظروف قاسية أنا رأيي أن الظروف لازم تزهق من المصلحين وتضطر توافقهم وينصلح حالها..أو على الأقل نبقى برأنا زمتنا وعملنا اللي علينا..
الإبلاغ عن إساءة  


محمد الديدى
00/00/0000 		m_eldidi_13@yahoo.com
السلام عليكم ورحمه الله اخى الحبيب ابن عثمان سبق ان تحدثنا سويا عن الموضوع و فكرت مليا في اسباب حبى وانتمائى لمصروبحث جديا لكى اعثر على اى 5 اسباب تجعلنا نفخر ببلادنا وقرات بعض التعليقات السابقه وعفوا لم اجد نفسى متحمس لاى منها حيث ان اقامه الشعائر فى السعوديه مثلا افضل منها كثيرا فى مصر حيث ان العمل يتوقف خلال فتره الصلاه وهذا غير متاح فى مصر بل ربما الكثيرين يجوا صعوبه فى اداء الصلاه اثناء العمل فضلا عن صلاه الجماعه , والنتجات الزراعيه التى ذكرتها فى تعليقك التى وجدتها فى المانيا غير متاحه للشعب المصرى حتى ولو انتجت فى مصر لاننا مواطنون درجه ثانيه فى بلادنا والمتاح لنا المنتجات المسرطنه فقط اما مساله المشغولات وصناعه الغزل والنسيج التى كنا متفوقين فيها فهى ككل احوال البلد ساءت وتم بيع المصانع وانهارت الصناعه بها وبالرغم من ذلك دعنا لانتشائم فهناك ومضات فى حياتنا كما سبق وقلت لك انى ارى ان مشروع تطعيمات الاطفال حديثى الولاده اعتقد انه من افضل الاشياء التى اراها فى مصر الان كما سبق وقلت لك وربما لعدم قناعتى باهميه مكتبه الطفل ليس بسبب عدم قناعتى باهميه القراءه ولكن بسبب انك تعطى اداه لفرد لايستطيع استخدامها حيث انه يجب ان يكون فى المدارس اتجاه كامل نحو حب القراءه ون يتم عمل رحلات للمكتبات ولكن ما قيمه المكتبه لشعب لا يقرا فيجب زرع حب القراءه فى ابنائنا لتفادى ما حدث معنا وهذا يؤدى الى الفشل الذريع فى التعليم الذى هو من وجهه نظرى صلب مشاكل البلد ولن ينصلح الحال بدون الاهتمام بالمدارس الابتدائيه بصفه خاصه وتعليم الابناء كل ما هم فى حاجه اليه من دين وعلوم دنيويهواعتقد ان التعليم هو اساس المفخره لكل الاوطان سواء على مستوى الصناعه والتجاره والرياضه وخلافه حتى ان قدماء المصريين بهرونا حتى الان بعلمهم باشياء نجهلها الان واتصور انهم كانو متقدمين فيها عنا الان مثل الفلك والتحنيط والبناء وخلافه وهذا بالمناسبه احد اوجه الفخر لمصر انه كان لنا تاريخ مع العلم انها تعتبر من وجهه نظرى وصمه عار لنا مثل ان تكون فى يوم من الايام الاول على دفعتك ثم تصبح الاخير هل يصح ان تتباهى بانك كنت الاول فى يوم من الايام طبعا لايصح الا اذا اصبحت استمرارا لهذا التميز وامتدادا له اما غير ذلك فلافضل ان تصمت وتترك الاجداد دون ذكر لانهم اصبحوا عبء علينا وليس مفخره لنا, ربما نجد صور اخرى ايجابيه مثل ان احمد زويل تخرج فى يوم من الايام من جامعه مصريه وربما تكون ايضا وصمه لنظام التعليم والبحث العلمى فى مصر ومما سبق حتى لا اطيل اجد ان كل ما هو كان جميل فى مصر يدعونا للحزن اكثر لانه اصبح اسوا لدرجه اصبح معها العامل المصرى اسوا عامل والطبيب المصرى اسوا طبيب وهكذا فى جميع المجالات نجد ان اسواق العمل غير متلهفه كما سبق للفرد المصرى وادعو الله عز وجل ان يوفقنا الى تغيير ذلك فى ابنائنا ويجدوا فى بلادنا ما يفخروا به ويجدوا فى انفسهم القدره على التغيير. والسلام ختام
الإبلاغ عن إساءة  


o.alghuzzy
03/02/2008 		يبقى انت اكيد في مصر
الفكرة دي حلوة قوي يا عثمان و للاسف انا كنت احدى منشئين جروب يبقى انت اكيد في مصر في الفيس بووك و لقيت ناس كتير قوي بتشجعني بس بصراحة لقيت ان اللي بعمله دة حاجة مش ظريفة في حق بلدي و سبت الجروب .. لان مهما كان دي بلدنا و لازم نخاف على سمعتها مهما كانت فيها سلبيات كتيرة
الإبلاغ عن إساءة  


noura
14/10/2008 		السلام عليكم
انا شايفه ان احسن حاجه في مصر شعبها فعلا المصريين اطيب شعب . كنت بتكلم مع واحده صحبتي مش مصريه عن البلاد قالتلي جميع الشعوب بتحب الشعب المصري وبيفضلوا يجوا يقضوا الاجازة عندنا لان معاملتنا جميله كفايه اننا شعب بنحب الضحك وقالتلي كمان ان في بلد من البلاد( بدون ذكر اسماء )الناس فيها ما فيش حاجه عندهم اسمها ابتسامه علي الرغم من ان البلد جميله جدا بس هما مش بيحبوها عشان طريقة التعامل.في بلاد كتير جدا متقدمه في مجالات كتير بس لما تروح تشوف بيتعملوا ازاي تكره البلد دي . انا شايفه ان دي احسن ميزه في مصر واكيد طبعا لانها بلد اسلامي والحمد لله وفي ميزات كتييييييييييير جدا جدا جدا . اشكرك يا ابن عثمان علي الموضوع الجميل دا
الإبلاغ عن إساءة  


daihoum
24/11/2008 		احلى حاجة فى مصر
العائلة و دفئها و التجمع مع بعض فى كل المناسبات فى العيد الكبير و كل اسرة عمله ذبيحة و كلهم مجمعين علشان اليوم ديه و اول يوم رمضان لزم نفطر مع بعض و لم يكون فرد من الاسرة مسافر و يرجع نجمع كلنا علشان نشوفه متهيالى ديه احلى حاجة فى مصر ان يكون بجانبك حد فعلا حتى لو مش كل العائلة ممكن الاخوات
الإبلاغ عن إساءة  


hjmelda
18/11/2009 		hjmelda
 try to answer
الإبلاغ عن إساءة  

 
الرئيسية | افتتاحية الموقع | أهداف الموقع | من نحن | اتصل بنا | انضم الينا | أعلن معنا
جميع الحقوق محفوظة لموقع رحابي 2007 - 2008