جاري العزيز هشام
أنا عارف طبعاً إن حضرتك مش الكاتب الأصلي للموضوع وإنه موضوع منقول من جريدة المصريين لكاتب متخصص في الرياضة.
وأنا أتفق كل الاتفاق مع كتير من اللي جه في الموضوع وسعيد جداً إن فيه كاتب رياضي مصري أخيراً بيكتب عن الهيافة اللي اسمها كرة القدم.
ولكن اللي حفزني للتعليق هو كلامه عن التنصير
تخيل معايا إنك مسلم عايش في بلد أوروبي، ولتكن ألمانيا مثلاً.
بتفتح الجرنال الصبح فتلاقي قدامك بالبنط العريض الخبر التالي:
تحذير: خطر الأسلمة يزحف على ألمانيا
بلغ عدد الألمان الذين تحولوا إلى الإسلام هذا العام 1000 ألماني في سابقة خطيرة تهدد بحدوث تحول ديموغرافي في بنية المجمتع الألماني.
تقلب الصفحة تلاقي خبر تاني:
عقبات تعرقل السماح ببناء أكبر مسجد في ألمانيا:
مجموعة من الأحزاب في مدينة كولونيا تنظم مظاهرة بعنوان anti islam أمام كاتدرائية كولونيا الشهيرة للإعلان عن رفضهم لبناء المسجد الذي يهدد الطبيعية المسيحية التاريخية للمدينة.
طبعاً هتتضايق والدم هيغلي في عروقك وانت بتقرا الخبرين دول، وهتقعد تلعن في سلسفيل أبو الألمان اللي ما فيش فايدة فيهم، أحفاد هتلر العنصريين اللي بيكرهوا الأجانب، اللي ما عندهمش أي استعداد لتقبل الآخر ... الخ ...
أنا عايز أوصل لإيه من الكلام دا؟
المشكلة مش في الخبر نفسه، دي حقيقة واقعة إن فيه أكتر من 1000 ألماني بيسلموا كل سنة، المشكلة في النص التاني من الجملة اللي الصحفي بيكتبها من عنده:
التهديد بحدوث تحول ديموغرافي في بنية المجمتع الألماني
وتهديد الطبيعة المسيحية التاريخية للمدينة.
الكلام دا بيهدد فعلاً، بس مش الطبيعة التاريخية
ولكن السلام الاجتماعي
هل ارتداد 10 جزائريين يومياً – بفرض إن الرقم فعلاً صحيح ومش مبالغ فيه وإن كنت أشك في كدا – هل الارتداد دا هيحول بلد المليون شهيد لمليون متنصر؟
إيه المشكلة لما ساويرس يتبرع ببناء كنيسة؟ طب ما الدول الإسلامية بتمول بناء مساجد في أوروبا، وما حدش في الحكومات الأوروبية بيزعل ويقول "هما ما بيتبرعوش ببناء مستشفيات بدل المساجد ليه؟"
صدقني، ارتداد مليون مسلم لن ينقص ولن يزيد من ملك الله شيء.
ربنا غني عننا جميعاً مسلمين ومسيحيين.
عموماً أنا شايف إن المقال دا مش شر محض
يمكن يكون خير
إننا نتكلم ونتحاور بحرية وبموضوعية
وأكيد كل طرف هيسمع كلام ما يحبش يسمعه
وهنزعل من بعض
بس لازم نواصل الكلام والحوار
لإن دي الحاجة الوحيدة اللي هتضمن الوصول للسلام الاجتماعي المنشود.
وعلى فكرة أنا شايف إن مشكلتنا في مصر مش مشكلة دينية .. إحنا مشكلتنا إنسانية،
مشكلتنا في حياة بتسحق الإنسان، مسلم كان أو مسيحي، بدون أدنى فرق
ولكن دا موضوع تاني خالص
لك الله يا مصر
