مع اول صدام مع الواقع العملي بعد الدراسه كانت كلامات احد رجال الدين الافاضل ان الخير في الدنيا لحد يوم الدين طيب وهو ليه بقي قليل قوي كده كان الرد بمثال ان الدنيا عامله زي كوبايه والخير فيها زي اللبن اللي حطينا عليها معلقه تراب اكيد ان اللبن اكتر من التراب بس التراب باين علشان لونه لكن الخير نسبته اكتر

وفعلا اقتنعت جدا بوجهة النظر وحسيت ان معاه حق يمكن لان الاحتكاك وقتها كان لسه مش كبير بنوعيات البشر الموجوده في الدينا واللي للاسف ليها تاثير كبير علي المجتمع وتتصدم اكتر في الناس اللي المفروض ربنا سبحانه وتعالي كرمهم علشان علمهم

بس العلم مش كفايه

المفروض ان العلم مع الاخلاق مش ينفصلو

بس مين دلوقتي بيعمل بالمفروض ده اصلا

 دايما لما تيجي تقول لحد المفروض ان الاصول  والاخلاق والزوق بيقول ان التصرف السليم يبقي كذا لازم هيطلعك شخص مش كويس علشان انت بقيت قديم مش بقيت بتتعامل بسمه العصر الجديد العصر المادي البحت

دي حقيقه اننا وصلنا لمراحل متقدمه ماشاء الله ماشاء الله مش بحسد بس بلاقي الناس بقت في منتهي الاستعباد للماده وفاكرين كل الناس زيهم لازم يبقو عبيد ماده زيهم والناس دي للاسف منهم كتير قوي هما اللي بيعملو ولادنا وكمان من كتر طمعهم في الماده راحو يعلمو ولاد غيرنا بره مصر

بس يا تري بيعلموهم ايه بالظبط

ازاى يبقو طماعين وازاي اول ما يبقي معاهم ماده كفايه يستعبدو بيها الناس ويتكبرو عليهم

ولا بيعلموهم ازاي ياخدو علم زياده يعملو بيه شويه بيزنس

ما هو للاسف العلم دلوقتي بقي هو كمان للبيزنس

مش عارفه بجد هننحدر لحد فين بعد كده

هنروح فين يا تري لما يبقي الاجيال الجديده بيتعلمو علي ايد النوعيات دي من البشر اللي بيهدو تربيه الام والاب

وفعلا مبقتش عارفه المشكله ان اهالينا ربونا كويس علي الاخلاق والدين السليم ولا المفروض كانو يربونا علي الحاجات الجديده دي علشان نعرف نتعايش ومش نحس انهم حاجات وحشه

وانا قاصده اقول عليهم حاجات مش ناس علشان اتعلمت للاسف ان الانسان عنده حاجات كتير مش موجوده فيهم