فاكرين زمان حكايات أبله فضيله الحلوه الجميله اللي كنا بنسمعها واحنا أطفال وبنحكيها لاولادنا علي مر الأجيال - دلوقتي بعد تطور الأيام والسنين ححكيلكم كام حكايه حلوين  حقيقه مش خيال ولا تفنين واحكموا انتم بقاه ياعاقلين علشان حبايبنا المهللين المطبلين المزمرين مايقولوش علينا جاحدين وناكرين ومفتريين نبدا من فين ولا من فين عموما أوعدكم تقضوا مع حكاياتي أحلي الأوقات ونسخر سوا ونضحك علي اللي فات وكل كلمه بأقولها بورق ومستندات واللي يكدبني بأقوله يالله وريني وما عندك هات 

نبتدي معاكم الحكايه الأولي وبطلها السيد رئيس الجهاز اللي عمل منها حكايه كبيره دون أي داعي أو اساس وحطلها النهايه الحلوه السعيده وحلها بعد مداولات  حاميه وسديده السيد نائب رئيس الشركه والمسئول عن المشروعات السياحيه

ترجع بدايه الحكايه لبنود عقد بيع المحلات بالسوق التجاري وتحديدا البند الخامس وينص علي  من المتفق عليه أن بيع المحل موضوع التعاقد لاستخدامه في نشاط ..........ويلتزم الطرف الثاني بممارسه هذا النشاط نظرا لأن السوق التجاري المنشأ بالمشروع معد لممارسه مختلف الأنشطه التجاريه التي تكون في مجموعها تنوع الخدمات التي تقدم لملاك المشروع -واخدلي بالك من ملاك المشروع ده حلوه مش كده - ولا يجوز للطرف الثاني تغيير النشاط الذي من أجله تم بيع المحل الا بموافقه كتابيه مسبقه من الطرف الأول ويلتزم الطرف الثاني استخراج بطاقه ضريبيه والقيد بالسجل التجاري

المهم ده كلام جميل مغزاه ان ليهم مسمار جحا في المحل يبيعوا ويشتروا في المشتري لو حب يغير النشاط المهم أنا امتلك محل بالسوق التجاري وكنت علي وشك تأجيره ويوم   2007/04/23 ذهبت لاداره الشركه بمصدق وقدمت لهم طلب بتحديد النشاط واتوافق عليه واتكتب في العقد وكله تمام وكمان كنت مسدد الصيانه المستحقه عن عام 2007 بشيك استحقاق 2007/12/31 ومعايا ايصال بسداد الصيانه وعايز جواب بالنشاط قالولي تاخده من الجهاز في الرحاب جيت الرحاب قدم طلب قدمت طلب استني يتبت فيه استنينا وبعد انتظار حوالي نصف ساعه لقيتهم بيقولولي آسفين سيادتك دافع الصيانه بشيك رئيس الجهاز بيقول يا تدفعها نقدي يا مش حنديك الجواب - تسموه ايه ده بالله عليكم افتراء تعسف جبروت ظلم قهر لوي دراع استغلال موقف انتهازيه دكتاتوريه حد يلحقني بكلمه تعبر عن مراره الموقف تعجز الكلمات عن وصفه المهم الواحد دم ولحم وعنده كرامه حبتين زياده عاملنلي أزمه في حياتي في ظل ندره الكرامه هذه الايام المهم الواحد علشان عارف ان الحق معاه ومؤدي لالتزاماتي حتي نهايه العام صحيح بشيك لكن مستلمينه بايصال وقبلتم هذا في حينها يبقي معناها ايه لما احتاج منكم حاجه تساوموني يا أدفع الشيك نقدي ياماليش حاجه عندكم طالما خدتم الشيك وأعطيتم ايصال يبقي خدتم حقكم ليه مش عايزين تدوني حقي  المهم علا صوتي وانفعلت ورفعولي الضغط وكانوا حينقطوني اضطريت أعنف اللي بيكلمني لأنه في مقوله بتقول ناقل الكفر كافر انا باقول ناقل الهطل والاستخفاف أهطل ويستحق ما يصدر من رد فعل غير محسوب أنا واحد عندي قناعه ان التعامل بهذا المبدأ هو كده واللي عندك اعمله مش من حق حد غير الحكومه اللي بتحكمنا هي حكومه عاقله ورشيده وعارفه مصلحتنا احنا الشعب كويس قوي وعارفين انها لو ماتعاملتش معانا بالشكل ده مش حنعرف نتحكم ياخوانا العيب فينا مش فيهم احنا اللي شعب مش عارف يتحكم مش هم اللي حكومه مش عارفه تحكم وبناءا عليه لما بلاقي حد بيحاول يتجرأ ويتشبه بالحكومه في ظلمها وجبروتها بغير بجد علي حكومتي ليه علشان حكومتنا لامثيل لها في قوتها وجبروتها ييجي مين بسيادته علشان يظلمني زي ما الحكومه بتعمل معايا المهم وصلوا الامر للسيد نائب رئيس الشركه للمشروعات السياحيه اللي مكتبه في نفس المبني المهم سيادته تعطف وتلطف ومنحني الخطاب المطلوب طيب لو هو حقي من الأول ماديتهونيش ليه ولومش من حقي يبقي ماكنتش تديهوني وتصمم علي موقفك لوسليم لكن حيث انك اديتني الجواب يبقي انت كنت غلط وعملت موضوع من لاشئ

وأعتقد انكم متفقين معايا ان اللي مايديش الناس حقهم مايستاهلش يطلب ولا ياخد حقه منهم معني كده حيث انك دوختني علشان تديني حقي يبقي ماتزعلشي لو اني كلت عليك حقك ماانت اللي علمتني وبتعلمني أكل الحقوق وما نحن الا تلاميذ في مدرسه سيادتكم لأكل الحقوق

ايه رايكم حكايه حلوه ولا سخيفه تدعو للابتسام أم للرثاء احكموا بنفسكم والي القاء في حكايه جديده قصدي قديمه بس جديده علي مسامعكم