مصر أمنا مهما تظلم فينا
مصر أمنا ولوخيرها مش لينا
في حضنها اتربينا وعلي أرضها حبينا
في شوارعها لعبنا ولا هانت يوم علينا
مصر أمنا مهما قسيت علينا مصر
أمنا ولوفيها ضاعت أمانينا
من خيرها أكلنا من نيلها شربنا
علي أرضها اتعلمنا وبسماها اتغطينا
مصر أمنا ولوظلمونا حكامها
مصر أمنا ولو صادروا فيها أحلامنا
مصر أمنا ولو سرقها الحراميه النصابين
مصر أمنا ولو اغتصبها الوحوش الغاصبين
مصر أمنا ولوضاع فيها الأمان
مصر أمنا ولو حرمتنا من الحنان
مصر كانت ولسه حتكون
طول عمري بيها مفتون
فيها عشت مع أبويا وأمي
فيها شفت أفراحي وغمي
فيها فرحت ورقصت وغنيت
فيها حزنت وانكسرت وبكيت
فيها شفت ميلاد أولادي
فيها مات آبائي وأجدادي
فيها حلمت اني أكون انسان
فيها شفت شعبها بيتهان
فيها شفت أصحاب ملايين
وفيها شفت أطفال جعانين
فيها شفت ناس راكبه ليموزين
وناس محشوره في علبه سردين
فيها شفت أحلام شبابها بتتبخر
وكرامه ولادها فيها بتتبعتر
فيها اللي ماتلاقيهوش في أي مكان
فيها الواحد بيتمني يتعامل كانسان
فيها وفيها وفيها وفيها وبحبها رغم كل ما فيها
مستقبلنا ضاع فيها خلاص
لكن لسه بنحبها بكل اخلاص
وعلشان هيه أمنا نفديها بروحنا ودمنا
ماتقولشي كيف وازاي وليه
ماهوده اللي اسمه الانتماء يابيه
