لو لم أكن مصريا لوددت أن أكون مصريا
جمله من أول ماوعينا سمعناها
وعلي مر الأجيال رددناها
قبل ما كان ينطقها لساننا
كنا بنقولها بنبض قلوبنا
كنا بنقولها بكل عزه وفخر
وكان بيشرفنا اننا من مصر
مصر الأرض مصر الحضن مصر الأم
مصر اللي كنا نفديها بالروح والدم
مصر اللي علشانها ضحي ملايين
ومستعدين نضحي لسنين وسنين
بس اسمحولي أسأل سؤال في الصميم
التضحيه ده لايه ولمين
مش علشان نبقي أحرار في بلادنا
ولا علشان ننكسر قدام أولادنا
مش علشان مايدنسهاش غاصب أومحتل
ولا علي أرضها ننهان ونتذل
مش علشان الأعادي مايدخلوهاش
ولا باسم السياحه يدخلوها وببلاش
ياتري كان يعرف ابن بلدها الشهيد
ان ولاده حيبقوا فيها عبيد
وان مصيرهم مش حيكون في ايدهم
ولا حتي في ايد اللي حاكمهم
وان دمه حيضيع بلاش
وبلاده حيدهسها الأوباش
وان حقه وحق ولاده فيها حيضيع
وولاد بلده في مصر حتبيع
لو لم اكن مصريا لوددت ان أكون مصريا حاسألك سؤال وجاوبني بضمير
النهارده الجمله ده صح ولا محتاجه تغيير
