قرات العديد من المدونات المنشوره علي صفحة رحابي نت كوني عضو جديد وكنت ارغب في التعرف علي الموقع والأصدقاء، و قد سررت جدا بهذا الزخم الرائع من المدونات في مختلف المناحي التي تهم رحابنا الجميله.
وقبل ان ابدأ في سرد مدونتي، دعونا نتفق اولا ان الغرض الرئيسي من هذه المدونات هو صالح الرحاب و سكانها جميعا، و ليس التجريح او التشفي.
ولآن .... كلنا نري ما تمر به مصر من تغيرات غير مسبوقه و غير متوقعه، وفعلا هناك مشاهد نراها علي صفحات الجرائد و علي شاشات الفضائيات لم نكن نتصور ابدا ان اصحابها ممكن ان يحدث لهم ماحدث و لو كان اي شخص قال لي ربع ما حدث كنت بالطبع سوف اره نوع من احلام اليقظه بالخلاص من الظلم و الفساد و الإستبداد.
المهم ان العبره من هذه المشاهدات ان تدفع من هو مازال يحي في الماضي ان يستفيق و يحاول إنقدذ ما يمكن إنقاذه و قبل فوات الآوان، إلا انه و علي ما يبدو فإن جهاز مدينة الرحاب ما زال يعيش حقبة الحزب الوطني الديمقراطي في أوج عظمته و عجرفته و ظلمه ....... ما زال القائمين علي جهاز مدينة الرحاب ينظر إلي سكانها نظره فوقيه و يري اننا ناقصي أهليه، ودعونا نحلل ذلك:-
1. عندما تدخل جهاز مدينة الرحاب قاصدا السؤال عن خدمة ما او لتقديم شكوي في سأن أمر ما، يستقبلك موظف الإستقبال بوجه عبوس و ناقص يقولك انت جاي ليه النهارده جتكوا البلا ماليتوا البلد؟؟، المهم تري خلفك فلق من بتوع الأمن في إنتظار إشاره من البيه الموظف علشان يظعتك بره؟؟، و إذا حدث ان تكون من الحظ الموفور كأن تكون علي موعد مع أحد من أولي الأمر فورا تنقلب الآيه و تعامل معاملة الآدميين.
2. الساده اللواءات افراد امن المدينه، انت في نظرهم مدان حتي تثبت برائتك، و الغرابه يا أخي انهم مصدقين انهم امن بجد؟؟ وده طبعا بفضل التدريب العكسي علي قواعد ممارسة مهنة الأمن... و اذكر اثناء اللجان الشعبيه انهم كانوا دائما موجودين معنا في وقت الشاي و الكيك، و عند دخوا الليل يذهب كل واحد منهم يبحث عن خن ينام فيه للصبح ... و ماله ماهو السكان قاعدين يحرسوا البلد زي العبط و احنا ضاحكين عليهم .... مش برده؟؟
3. الساده سائقي الباصات و المحصلين، طبعا دول طينه تانيه و طبعا الساكن اللي يعترض لازم يتزعط تبص يا عم فجأه تلاقيهم اتلموا حوليك و جاهزين يخبطوك بأي حاجه، فردة كاوتش، حزام، اي اي حاجه، وده ليه لأن البهوات الرؤساء بيطبطبوا عليهم علشان يحرام دول شقيانين و السكان دول مريحين خالص ، ..... مره إشتكيت سواق باص داخلي شافني واقف و شاورت له سابني و كت من غير حتي ما يعبرني، و لما إشتكيت للبيه المدير استاذ صبحي، زعق عليه بحركه مسرحيه و لما جه قام شادد خده و قال له ليه يا واد كده ما تزعلش حد؟؟؟ يقوم يقول له والله ما شوفته – وانا اساسا طويل و قد البلاكار|... يبقي إزاي؟؟؟ شوف يا أخي الإستهتار بالسكان.
4. و الساده المبجلين السائقين غالبا ما يكون عندهم تعليمات بتدريب السكان علي اعمال الصاعقه، دايما يا أخي كل ما آجي انزل من الباص الداخلي السواق يرفض تمام التوقف لآنزل بسلام، لا زم انط من الباص و طبعا مره تصيب و مره تخيب .... حا تشتكي .... إيه رأيك؟؟
5. وفيما يخص الوديعه و مصروفات الصيانه، هل يصدق ان تظهر موازنة المدينه عجزا؟؟؟
· اول ما يذكر في هذا الشأن ان تكاليف الإداره متمثله في مصروفات شراء مستلزمات الزراعه و الصيانه و خلافه قد زادت نتيجة التضخم و إرتفاع الأسعار، و الذي تعلمناه في إدارة المنشأت ان مثل هذه المتطلبات يقوم علي شراؤها ناس متخصصين يعملوا علي الحصول علي عروض اسعار من الموردين تتناسب مع الكميات المطلوبه و معدل تكراراها بحيث نحصل علي افضل العروض و نعمل علي ادارتها بشكل جيد و تحديثها كلما دعت الحاجه لذلك بحيث نتحكم دائما المصروفات بشكل إقتصادي سليم.
· ثانيا: يجب إدارة الودائع المدفوعه من السكان بطريقه تؤدي في النهايه إلي المحافظه علي أصل الوديعه مع زيادة العائد عليها بحيث يتقلص الفرق بين عائد الوديعه و مصروفات الصيانه إلي حد مقبول و مناسب للجميع خاصة و انني اعلم ان هناك بعد الملاك من و صلت و ديعته إلي 200000 جنيه، فكيف يمكن بالله عليكم ان تظهر الميزانيه العموميه للمدينه خسائر؟؟ ....
الحقيقه ان الهم كتير بس لازم كلنا نتحد لمصلحه الرحاب ولازم سكان الرحاب يكونوا هم من يديرونها بالمشاركه مع شركة طلعت مصطفي و لازم كل شيئ يكون علي عينك يا تاجر .... مش برضه ؟؟
