ديموكراسي     Democracy






ليس من رأي كمن سمع .. و الذي يطالب بشيء لابد أن يكون قد راَه و ذاقه و جربه


.. إنما بالسمع كده ما ينفعش .. أنت مثلا لم تأكل لحم الطواويس


.. و سمعت أنهم يأكلونه .. و ها أنت تلح في أن يقدموها لك

.. كل يا سيدي بالهنا و الشفا .. إنما ما أدراك أن هذا الذي تأكله هو لحم طواويس؟؟!!

و هذا ما ينطبق تماما علي حكاية الديمقراطية .. فين الديمقراطية

.. أهدا يابني أنت و هوه .. أنتو عارفين أساسا هيه أيه الديمقراطية

.. , ايشمعني يعني جايين النهارده تطلبوها ؟!

.ما طلبتوهاش ليه من الملك مينا لما وحد القطرين ؟ .. رحتوا باركتو له و عملتوا مهرجانات


و محدش فيكم نطق !!.. و اتخرستم ليه قدام الملك خوفو ..

كل ما تيجوا تفاتحوه في الموضوع ترجعوا تقولوا بس لما نشطّب الهرم

.. و راح خوفو و جه خفرع و شطبتو الهرم و لسه هتكلموه ..


قال لكم .. ياللا بأه في حموتها كده نخش علي أبو الهول ..


و أجلتوا الموضوع بعد ما يخلص أبو الهول .. جه منقرع ..


قلتوا أهو هرم صغير محندق مش هياخد وقت .. نقّفله و نكلم منقرع ..

وماذا حدث بعد ذلك .. سنوسرت يسلمكم إلي أمنمحات .. و من أمنمحات لتحتمس


.. و تحتمس يسلمكم لرمسيس .. و لما جم اليونانيين تحججتم بأنك ماتعرفوش يوناني



.. و هي يعني الديمقراطية أصلها إيه ؟


.. ما هي يوناني .. ديموكراسي Democracy  ... ترجمتوها أنتم علي مزاجكوا ... ديمو..كراسي , يعني


كراسي تفضل دايمة كده علي طول!!! .. و الرومان أتوا و لم نسمع كلمة ديمقراطية هذه

.. و أين كانت هذه الديمقراطية أيام الفاطميين و الأيوبيين و المماليك ؟؟!!


..و حينما جاء الأتراك و احتلوا البلاد لماذا لم تطالبوهم بالديمقراطية ؟؟!!

.. و هل ذقتم هذه الديمقراطية هذه في أيام محمد علي باشا؟!

... أقعد ياد أنت و هوه .. هي الديمقراطية دي لعب عيال ..

تقوم من النوم و تطق في دماغك كده بدون مناسبة ؟؟!! ...

قال إيه .. عاوز ديموقراطية .. من أمتي يا حبيبي ؟ شفتها أمتي ؟

عرفتها إمتي؟ ما أنا ممكن أخدعك و أديلك أي حاجه و أقولك خد.. أدي ديمقراطية..


لو جدع إفقسها بأه!!!



إمسك .. أهي إللي في أيدك دي أسمها ديمقراطية ..


سيبك بأه من النمل إللي في دماغك ده .. و خليها شفافية ..

عاوز شفافية أديلك شفافية ..شوف يا باشمهندس..

أنا معنديش ديمقراطية ليك من الأخر كده.. و ماتوجعش دماغي


علشان النهار باين أنو وحش من أوله.. سبعتلاف سنة ساكت و جاي تتكلم دلوقت؟

و بعدين علميا بأه.. الديمقراطية لا تنمو في التربة المصرية ..

دي عاوزه مناخ تاني خالص .. أنا ممكن أزرعهالك في صوب ..

بس ح تطلع كبيرة و مخوخة و مالهاش طعم و هترجع تشتكي تاني

و محدش يكلمني في أستيراد الديمقراطية .. أجيبلكم منين؟؟!!..


و نقفل بأه الكلام في الموضوع ده ..


ما هو أنتوا كل كام ألف سنة تعملوا الغاغة و الشبورة دي


و روحتوا برضه لحور محب عملتوا الشوية دول قدام القصر

و كانت النتيجة إيه؟!

جريتوا تمثال من البازلت طوله 25متر و وزنه 60 طن من أسوان لحد البدرشين


و كبرتوها في دماغ عرابي و راح ع القصر برضه

و قعد يطالب بحاجات فارغة زي دي و لم الدنيا كلها وراه .. و أخرتها إيه!!..


قعد يشرب شاي في سيلان !!! .

فيه إيه يابني أنت و هوه .. فيه هلفطة ورا .. مين اللي بيتكلم؟ ..

قام أحدهم و قال: يا باشا احنا مش عاوزين ديمقراطية ..

سعادتك بتتكلم مظبوط .. أحنا عاوزين بس نجربها .. ندوقها ..

لو معاجبتناش خلاص , قلت له : أفرض لو عجبتكم يا بورم؟! , قال : احنا مش عاوزينها علطول

.. يوم واحد في السنة .. زي عيد الأم و عيد العمال .. يوم الديمقراطية مش ح يفرق يا باشا !!!..




ففكرت قليلا فوجد أن الطلب ليس عسيرا...

فعلا.. يوم ديمقراطية لا يضير في شيئ .. خلاص أهمدوا بأه ..

يوم الديمقراطية أتحدد خلاص و ليكن 30 فبراير .. أتفقنا .. صفق الجميع في السعادة و هتفوا


.. و لكن أنسحب أحدهم من لسانه و قال .. و لكن فبراير مفهوش 30 يا باشا!!


اّه .. شفتوا البجاحة بأه .. ح نبتديها بالمعارضة!!!


يعني سكتنا له .. دخل بحماره !!! .. أدي عيب الديمقراطية





كتبها : يوسف معاطي


و نقلتها لكم