أقسام العقارات والمبوبة والدليل مازالوا تحت التطوير وسيتم الإنتهاء منهم قريباً بإذن الله

lily · 12/07/2010 9:09:43 AM

تصدقوا إني رحت الصبح أطلع شهادة ميلاد مميكنة 5 نسخ من السجل المدني في التجمع الخامس لما ركنت العربية قدامه جالي الشرطي اللي واقف يقولي معلش يا حاجة بعد إذنك لو ما فيهاش تعب تركني هناك علشان دو مكان أمن الدولة ، إحنا آسفين، مصدقتش وداني وطبعا رحت ركنت هناك ونزلت دخلت السجل باسأل أعمل فين الشهادات واحد من الموظفين شاورلي راح الراجل اللي في أول الطابور قاللي اتفضلي (قبله يعني) والموظف في أقل من دقيقة والله عمل النسخ وختمها، بصراحة مكنتش مصدقة إن إحنا في مصر-يا رب مصر تبقى أحسن بلد في الدنيا

sameh_nsa · 12/07/2010 3:28:13 PM

أمام أحد المقاهي ... تقف إحدى عربات الشرطة وينزل منها أحد الضباط مع مجموعة من العساكر والمخبرين , وعلى غير العادة لم يهرب أي من رواد المقهي ... (كما هو مألوف عند مرور أي عربة للشرطة من امام أي مقهى) , بل لم يلتفت أي من الجالسين إلي عربة الشرطة التي وقفت مباشرة أمام المقهى .

تقدم الضابط نحو صاحب المقهى وسأله في أدب جم : لو مفيهاش زعل يعني يا معلّم ممكن أفتش القهوة .
القهوجي : معنديش مانع يا باشا , بس هل معاك إذن تفتيش ؟
الظابط : بصراحة لأ .
القهوجي : طب ينفع يعني تعمل قلق للناس إلي قاعده عندي في القهوة , وإنت ممعكش إذن تفتيش ...
الظابط : عندك حق يا معلم , أنا هروح أجيب إذن , وآجي علطول .
القهوجي : طيب ... وأنا مستنيك .

ويأمر الضابط العساكر والمخبرين بالرجوع مرة أخرى لعربة الشرطة , وينطلق لإحضار الإذن ويرجع مرة أخرى للمقهي ... ويذهب إلي صاحب المقهي معطيا إياه الإذن : آدي يا سيدي الإذن أهو ... ممكن أفتش بقى .

ينظر القهوجي للإذن ويظهر على وجهه الغضب وهو يقول : إيه ده يا محترم , الختم مش باين خالص ... ده شكله إذن مضروب ... روح هات إذن تاني ويكون الختم واضح شوية .

يرد الظابط محاولا إقناع القهوجي بأن الختم لا يوجد به أي تلاعب : يا معلم .. الختم واضح خالص ... إلبس إنت نضارة وإنت تشوفه كويس .

وينادي القهوجي للصبي ويعطيه الإذن : بص كده ياض ... الظابط بيقول إن الختم باين ... بذمتك ياض إنت شايف حاجة من الختم .

يدقق الصبي النظر في الإذن , ثم يرفع رأسه ويقول : عليا النعمة يا معلم دي نحكشة فراخ ... والظابط أكيد مزور الختم ده ... ويدير وجهه للضابط مكملا : روح يا محترم هات إذن كويس وخليهم يوضحولك الختم شوية .

الظابط وهو ينظر في غضب إلي القهوجي والصبي : حسبي الله ونعم الوكيل فيكو يا ظلمة ... يعني هضطر ارجع تاني أجيب إذن وأختمه ختم واضح .

ويجمع الضابط العساكر والمخبرين مرة أخرى لعربة الشرطة لإحضار الإذن الجديد , ثم يعود للقهوجي : أهو يا معلم الإذن واضح والختم زي الفل ... ممكن بقى أفتش القهوة .

القهوجي : فعلا الختم واضح ... إتفضل فتّش يا عم .

ويأمر الضابط العساكر والمخبرين بتفتيش القهوة ... ويذهب أحد المخبرين ناحية إثنين من رواد القهوة والذي كان يبدو عليهم مظاهر السطل ويسألهم : لو سمحتم هو أنتو معاكو حاجة ممنوعة كده ولّا كده .

يرد أحدهم : حاجة زي إيه يعني ؟
المخبر : يعني حشيش بانجو مخدرات ... كده يعني
- أيوه أيوه ... أنا معايا حته حشيش أهي .

- طب إتفضل معايا عالبوكس .

- حاضر أنا جاي أهو ... بس وحياة والدك هاتلي حد يسندني عشان أنا حاسس إني واقف مش على بعضي .

- طبعا حضرتك تؤمر ... وينادي على مخبر زميله ... ويشيل الإتنين المتهم ويحطوه في البوكس , ويسأل المخبر المتهم إذا كان محتاج حاجة تانية قبل ما البوكس يطلع

- أيوه ... لو سمحت خد خمسه جنيه هاتلي إزازة ميه عشان أطس بيهم وشي ... عشان أفوق شوية ...

لكن المخبر يقسم بأغلظ الأيمان أنه لن يأخذ أي نقود من المتهم ... وهو بنفسه سيحضر له زجاجة الماء من ماله الخاص ... وبالفعل يحضر المخبر الزجاجة ويعطيها للمتهم .. ليسكبها على وجهه ليفيق .....
ليفيق من النوم على صوت زوجته التي أطلقت صرخة كبيرة كي توقظه كي يستطيع الهروب ... فقد سمعت صوت سيارة الشرطة أسفل المنزل .

magedramadan · 12/07/2010 3:46:20 PM

يارب يارب يبارك لكل واحد بيسهل على الناس حياتها----شوفوا أد إيه دلوقتي الواحد بيفرح بأقل مايمكن وصفه إنه أقل من العادي في بلاد أخرى تحترم أدمية الإنسان !!!

lily · 12/07/2010 4:26:41 PM

يا أستاذ سامح ،أنا فعلا كنت صاحية الحمد لله فيه أمل

KiK · 13/07/2010 8:17:47 AM

الاحلي كمان من كده ان من الممكن استخراج شهادات الميلاد و القيد العائلي و معظم اوراق السجل المدني عن طريق الانترنت و يتم توصيلها لحد البيت (عن تجربه) و فعلا الموضوع ده بيسهل كتير اوي

و ذلك عن طريق موقع الحكومه المصريه

http://www.egypt.gov.eg/arabic/default.aspx

lily · 13/07/2010 10:06:56 AM

أطلع شهادة مخالفات عن طريق الموقع دة بس لا حياة لمن تنادي ، وكلمتهم وتابعت الورق وقالولي 48 ساعة ولا حد سأل ولا حد جه وفي الاخر رحت عملتها بنفسي من المرور.

يا ريت تقولنا تجربتك

KiK · 13/07/2010 11:17:23 AM

انا طلبت شهاده ميلاد و فعلا وصلتني بعد 3 ايام لحد البيت , بس المشكله في موضوع رخص السيارات ان في شويه مشاكل بسبب تغيير النمر علشان كده خدمه تجديد الرخصه مش شغاله كويس دلوقتي