نتيجة الإستفتاء طلعت و 77% قالوا نعم، و أغلبية الناس خافت و فسروا إن   النتيجة طلعت كدة عشان الإسلاميين سيطروا على البلد، و كله ابتدى ولولة زى   النسوان - مع كامل إحترامى للنسوان - و كله ابتدى يلم شنطه عشان يهاجر أو   ابتدى يحوش أزايز خمرة عشان الزمن اللى مش مضمون... طب إيه خلاص كدة؟

الإسلاميين سيطروا على الشارع و الرئيس القادم هيبقى فضيلة المرشد؟ لأ ياحبايبى، الإسلاميين مسيطروش على الشارع بس الإسلاميين مفيش غيرهم فى الشارع،

نتيجة الإستفتاء ده اللى طلع قال لنا "بخ!" لازم تبقى حاجة تفوقنا عشان إحنا   مش واخدين بالنا من اللى بيحصل، كل سنة و إنتم طيبين إحنا لسة طالعين من ثورة

و خلاص عندنا ديمقراطية، يعنى حكم الشعب، يعنى سياسة بحق و حقيقى، و السياسة   لعبة وسخة و كلها ضرب تحت الحزام، فيا إما تلعب صح أو تطلع برة... و بعد ما

ال"بخ" طلعتلنا، تحبوا تلعبوا صح ولا تحوشوا الأزايز و تطلعوا برة؟

سياسة يعنى يبقى عندك كروت كتير تلعب بيها، و لغات كتير بتخاطب بيها فئات   الشعب المختلفة، كل فئة ليها لغتها اللى تخاطبها بيها و كرتها اللى تلاعبها   بيه... يعنى مثلا الإخوان كانوا بيوزعوا ورق فى المهندسين عن ليه نقول نعم كله   أسباب منطقية ملهاش أى دعوة بالدين بيخاطب بيها سكان المهندسين، إنما الورق   اللى كانوا بيوزعوه فى القرى مثلا كان كله من نوعية "التصويت بنعم واجب   شرعى" ... إنما إحنا و كل اللى زيينا و كل القوى السياسية كانت بتتكلم لغة   واحدة و بتلعب بكارت واحد، لغتنا إحنا و كارتنا إحنا. علشان كدة الناس   المتعلمين بتوع المدن نصهم قال نعم و نصهم قال لا، كل واحد حسب قناعته و   أسبابه غالبا ملهاش دعوة بالدين لأنهم سمعوا الطرفين و حكموا، إنما فى   العشوائيات و الريف و الصعيد - اللى هم أغلبية السكان - كله قال نعم عشان بتاع   نعم بس هو اللى كلمه...

بخ !! فوقوا !!! إلعبوا سياسة صح و إنزلوا لاعبوا الناس بكروتهم و كلموهم   بلغتهم، أغلبية السكان مش هتوصلهم ندوة فى مكتبة الشروق فرع الزمالك أو مناظرة

فى الساقية، يا با دول عايزين مؤتمر من اللى اسمهم "جماهيرى حاشد" فى صوان   أحمر من بتوع العزا و شراشيب رمضان و لمض حمرا و زرقا و خضرا من اللى بيجيبولك   إنت شخصيا صداع، أغلبية السكان مش هيوصلهم ال"نوت" أو ال"إيفنت" بتاعك على   فيسبوك بس هيسمعوك لو نزلت قعدت على قهوة فى عزبة مش عارف إيه و بعدين و إنت   قايم قلتلهم "خلاص يا رجالة المشاريب الليلة عليا" و غالبا المشاريب ديه كلها   مش هتكلفك أربعين جنيه... لازم كل القوى السياسية تنزل الشارع و تكلم كل واحد   بلغته، يعنى متكلمش فلاح فى ملوى و تقوله "يجب أن نقول لا لأن الشرعية الثورية   أسقطت الدستور القديم" لأ روح قول له "لما جلبيتك تتقطع يا با الحاج ترقعها و

لا تجيب جلابية جديدة؟"... إلعب بكروتك و لغته، لو إنت بتعمل دعاية لحزب الوفد   فى قرية مترحش تقول للناس "الوفد بيت الأمة و قلعة الليبرالية فى مصر" لأ يا   ضنايا هيقولك الليبرالية ديه تبقى... ، بس لو قلتلهم إحنا بتوع سعد زغلول و   إحنا بالصلاة عالنبى طول عمرنا حزب الفلاحين و الجلاليب الزرقا هيقولولك على   راسى... لو إنت عامل دعاية لأى حزب قومى روح أى قرية فى أى حتة و قول لهم أنا   بتاع "عبناصر" و وزع صور جمال عبد الناصر عالناس و شوف هيقبلوا كلامك إزاى....

لما نخش مرحلة إنتخابات مجلس الشعب و تبتدى البرامج الإنتخابية لما تيجى تروج   لحزب مترحش للفلاحين تقلهم "النهضة بظروف معيشة الفلاح" روح قول له هديك سماد

و تقاوى ببلاش و هشترى منك اردب القمح بكذا و هبنيلك وحدة صحية جديدة... لازم   كل تيار سياسى يحدد إيه الفئات اللى ممكن يوصل لها و يشوف هيقولها إيه و إزاى

و بالنسبة ل"لا لخلط الدين بالسياسة"

أحب أقولوكم "بخ!" صباح الخير ! ثورة   ثورة ! محدش هيسكت حد ! بدل ما تطالب بإقصاء الإسلاميين لم كروتك و إنزل   لاعبهم... لو هو بيلعب بمشاعر الناس يبقى دورنا إن إحنا نصحى عقولهم... و   مينفعش ننكر إن الدين عامل قوى، و مينفعش ننكر إن حتى الناس الحلوين الشيك   بتوع "لا" اتبسطوا أما لاقوا الكنيسة و عمرو خالد و معز مسعود بيقولوا لا هم   كمان، و حتى الناس الشيك دول قالوا جمل من نوعية "أهو عمرو خالد لوحده هيجيب   مليون" أو "استنوا بقى أما القداس التانى يطلع و كل الفوترز هيبقوا نو" مش ده    دين فى السياسة ده ولا إيه؟؟ فلما ييجى الراجل الإسلامى يديك حديث يفسره على   مزاجه إديله عشر أحاديث يخرسوه، لو راح للراجل الغلبان و قاله إلحق الإسلام فى   خطر و فيه حملة صليبية روح إنت قول له للإسلام رب يحميه و إحنا أهه مسلمين و   مسيحيين بنحب بعض...

من الأخر، اللى ميعرفش يخاطب الشارع المصرى يبقى مينفعش يحكم الشارع المصرى، و   خليه بقى يحكم هنا على فيسبوك فى فارم فيل ولا حاجة... بخ !!!