 على باب سفارة كندا
على باب سفارة كندا
علي سلامه
على باب سفارة كندا لمحت إبليس
وفي ايده استمارة
قلتله على فين
قاللي بص يا هجرة يا إعاره
أنا كفرت ما لقيش معاك سيجارة
يا راجل أنا خلاص لا بقيت وسواس ولا خناس
ولا ليا عيش وسط الناس
خلاص بقالي سنين عاطل
وانتوا بتعرفوا تقلبوا الحق باطل
وتقتلوا القتيل وتسلكوا القاتل
وما فيش مشاكل
خلاص أنا مسافر مهاجر
يا راجل دا أنا بقيت أوسوس بالمقلوب
أقول للحرامي انت مش حتوب
يعني انت حتعمل كل الذنوب لوحدك
وأنا ابليس أشتغل ايه؟
واعظ ولا كمسري في أتوبيس
زمان كنت استنى حد ينسى وهو بياكل لقمته
دلوقتي بصراحه كل أكلكوا ملوث
والواحد بيخاف على صحته
دا ما فيش ضمير أساسا علشان أموته
يا راجل دا أنا من كتر ما لطشت معايا
مشيت مع الناس اللي بتقول كفاية
وبرده ما فيش فايده
|
