أقسام العقارات والمبوبة والدليل مازالوا تحت التطوير وسيتم الإنتهاء منهم قريباً بإذن الله

soma · 06/05/2008 11:02:24 PM

تعرف إيه عن.. المنطق؟

تقريبا ده واحد من أشهر المشاهد في تاريخ المسرح المصري.. ولو دققت النظر فيه شوية هتكتشف إنه مش مشهد مسرحي كوميدي وبس.. لأ سيادتك.. ده تقريبا بيعبر عن حال شعب بحاله! مش مصدقنا وحاسس إن الكلام كبير؟
طيب تعال نشوف المشهد ونتكلم بعدها
*******
تدخل أستاذة عفت -سهير البابلي إلى داخل الفصل الذي يضم أكثر خمسة طلاب مشاغبين في المدرسة والذين يتزعمهم بهجت الأباصيري- عادل إمام، يشاكسها الطلاب ويضيقون عليها الخناق.. تحاول أن تسيطر على النظام داخل الفصل المعجون بمية عفاريت.. أخيرا تنجح في ذلك.. يجلس الطلاب في أماكنهم.. تمسك هي بالكتاب
تطلب من المشاكس الأكبر ذي اللسان الطويل مرسي الزناتي- سعيد صالح أن يقف حتى يجيب عن السؤال الصعب
تعرف إيه عن المنطق؟
لا يحتار الزناتي كثيرا في الإجابة، ولا يرهق نفسه للحظة واحدة في التفكير أو في ترتيب الأفكار أو حتى استدعاء أي معلومة، بسرعة الرصاصة يرد: هو إن الواحد يقع على الأرض مايحطش... منطق
يرتج المسرح كله بالضحك، وتمتلئ عيوننا بالدموع من كثرة الضحك، ويمسك أحدنا جانبه الأيمن متألما من عدم قدرته على أن يمنع نفسه من القهقهة بصوت عال
*******
طبعا المشهد كوميدي بالفعل.. وكل مرة الواحد بيشوفه بيضحك من قلبه رغم إنه تقريبا حافظه وعارف كل حرف بيتقال فيه
بس تعال نعمل حاجة مع بعض ممكن نسميها التفسير الماورائي للمشهد
ماتتخضش من الكلام المكلكع ده
كل ما هنالك إننا هنحاول نطلع من المشهد ده بدلالات ونتائج مختلفة عما هو ظاهر
يعني اللي ظاهر إن مرسي الزناتي دمه خفيف.. وإنه بيحاول يخرج من الموقف الصعب اللي اتحط فيه بفهلوة
لكن اللي في الباطن بقى حاجة تانية
*******
عد معانا..
مرسي الزناتي
بيحاول يفتي في الموضوع اللي ماعندهوش عنه أي فكرة خالص
مرسي الزناتي
لا يكتفي بكونه لا يعرف.. وإنما يجادل فيما يقوله وهو عارف إنه غلط أساسا
مرسي الزناتي
بيتكلم بثقة العالم، وبيقين العارف ببواطن الأمور، ويتحدث عن المنطق وكأنه أرسطو ذاته رغم أنه لا يعرف عن المنطق سوى أن الواحد من دول بيقع فمايحطش منطق
بل إن مرسي الزناتي في المشهد التالي -الذي لم نروِه لكن الكل في الأغلب يتذكره- سيسخر من أستاذة عفت –اللي المفترض يكون عندها المعلومة الصحيحة- ولما هيطلع على السبورة عشان يكتب ما ستمليه عليه من تعريف للمنطق
سيكتب كلمة من بطول وعرض السبورة حتى لا يكتب أي كلمات أخرى ولا يعرف المعنى الصحيح للـالمنطق، وكأنه كمان لا يكتفي بعدم معرفته بتفاصيل الموضوع الذي يتناقش فيه مع غيره وإنما يرفض حتى أن يسمع وجهة نظر الآخر ولا يعطي لهذا الآخر فرصة في أن يصحح المعلومات المغلوطة لديه
اللطيف بقى إن شخصية مرسي الزناتي خرجت من المسرح اللي كان بيعرض مسرحية مدرسة المشاغبين إلى مسرح أكبر بكتير هو -تقريبا- كل مساحة جمهورية مصر العربية
*******
في كل حتة بتروحها في مصر سيادتك تلاقي لك واحد مرسي الزناتي طالع في وشك
ودايما تلاقيه فاهم وعارف في كل حاجة
تكلمه عن مستقبل الحياة السياسية في مصر
شغّال
عن الوضع في الشرق الأوسط بعد حرب لبنان
شغّال
عن الأسباب التي جعلت فلافيو ينتفض ويجيب 3 أجوان في 5 أيام بعد ما قعد سنة كاملة مايجيبش ولا جون
برضه شغّال
يحكي لك عن أسباب نجاح محمد سعد في حصد الإيرادت
وأسباب تزايد نسبة الطلاق في مصر
أسباب تصادم القطارات في مصر
وتساقط أوراق الشجر في الخريف
وتفتح الزهور في الربيع
والسحابة السوداء
و... و... و
في كل حاجة تلاقيه واقف وفارد صدره وبيتكلم بثقة ومعرفة تجعلك تتساءل
هو ازاي الراجل ده ماخدش نوبل لغاية دلوقتي؟
*******
الكارثة إنه بيتكلم في كل الحاجات دي وهو أساسا ماعندهوش خلفية عن أي حاجة خالص
بس هو بيعتمد على الصوت العالي وبس.. وتلاقيه برضه بيسخر من آرائك ويرفض أن يسمعها.. فتتنرفز إنت.. فتزعق.. فيزعق.. هوب تقوم خناقة.. لأن مرسي الزناتي بيتكلم عن المنطق يا رجالة
صدقونا دي واحدة من أكبر المشاكل اللي بنواجهها رغم أنها قد تظهر للبعض وكأنها عادية أو تافهة

*******
المشكلة الكبرى
أن لا أحد يقرأ أو يهتم بأن يعرف معلومات صحيحة قبل أن يتكلم في أي موضوع.. مافيش أي أساس عنده من المعرفة ومع ذلك بيتكلم ويقول ويبعبع
بس بذمتك كده -واحنا في شهر مفترج زي شعبان وعيب تكذب- كنت كام مرة مرسي الزناتي؟

*******
كام مرة؟
دخلت في حوار ونقاش تقول فيه أحلى كلام وإنت أصلا ماتعرفش الناس بتتكلم عن إيه أساسا؟
كام مرة؟
قلت رأيك في قضية علمية بحتة وأنت تنظر إلى السماء لتتأمل النجوم المتلألئة وكأنك أينشتين بعث من قبره من جديد، وأنت أصلا ماتعرفش عن الذرّة سوى أنها كوز ذرة
كام مرة؟
تكلمت في السياسة وكأنك محمد حسنين هيكل وتناقشت في جذور القضية الفلسطينية ومشاكلها وأنت أصلا ماتعرفش إن فلسطين محتلة من سنة 1948
*******
احنا لا ندعو إلى أن تنخرس عن الكلام وماتحطش منطق! بل بالعكس ياريت اللي عنده حاجة يقولها... بس يقولها عن فهم ومعرفة ورغبة في أن يتقبل رأي الآخر.. مش عن جهل وعند وجر شكل
تفتكروا كلامنا ده صح فعلا
وإن مرسي الزناتي فعلا أصبح منتشر في حياتنا
ولا كلامنا ده مالهوش أساس
ولا منطق؟
*******

مـــــــــــنــــــــــــــــــقـــــــــــــــــــــــــــــول

mamamira · 07/05/2008 2:24:48 AM

يا سوما ماتسيبى اللى يتكلم يتكلم خلى الناس تطلع الكبت اللى جواها مش كفاية البلاوى اللى شايفنها

فى البلد دى كمان مانتكلمش

عن جهل بأة عن نور مش مهم حتى كلامنا هانحاسب علية

سياسة وخايفين ننطق (كل سنة وانت طيب يا ريس)البنت اسراء يا حرام اتبهدلت وسابتها وهجت

الغاز المصرى يا جماعة الف مبروك بقينا بنصدره لاسرائيل باقل من التكلفة الحقيقية , مش مهم نتحمل احنا الفرق

البنزين زاد اكتر من ال30%المنحة المهولة اللى كرمنا بيها الريس(ادعوله ادعوله0000000

منحة مش عارفة كام وستين مليار دولار من سنة 89لحد2006تبنى بلد بحالها مش عارفين راحت فين لا وكمان لسة علينا ديون وكل سنة فى عجز فى الموازنة

تخفيض ميزانية البحث العلمى ياللا ماهى خربانة خربانة

الجدار الفاصل الاسرائيلى واحنا بعون الله الممول الاول للاسمنت بتاعه ويغلى عندنا برضوا مش مهم

اااااااااه

والنبى يا سوما لو كان فى اى معلومة غلط فى كلامى معلش عاديهالى المرة دى والمرة الجاية هحاول امسك لسانى وما اتكلمش غير فى اللى افهم فيه

سيبك

وبمناسبة مرسى الزناتى شوفى المشهد ده من المسرحية خلينا ننسى الغم شوية

turky_911 · 07/05/2008 8:26:40 AM

سوما انت عندك حق بس الناس مش عارفين يتكالموا عن حقوقهم ولا عارفين يطالبوا بيها فا سيبيهم يقولوا اي كلام في اي حته الناس اتخنقت يا سومه.

و علي فكرة يا mamamira انت جامدة جداًبس اهدي شوية عليشان الدنيا مش ناقصة ضغط و سكر و قلب و ما تقلقيش الشعب خلاص بيجيب اخرة و هينفجر قريب(i hope soooooo)

و زيادة لمعلوماتك القيمة ان ثروت ال مبارك وصلت 55 مليار دولار بببببس .

يا حرام.

sameh_nsa · 07/05/2008 9:20:57 AM

ااحيكى يا سوما على الموضوع فعلا تحليل شيق

ويا جماعة بلاش نخبط فى الحلل احسن يقطعولنا لسانا من (لاغاليغووو)0

soma · 07/05/2008 9:32:52 AM

أشكركم ماماميرا وتركي وسامح

بس الحق لا يتجزأ

يعني عاوزين نبقى كويسين مفيش فصال ... يا كله يابلاش..

ده رأيي وده اللي بعلمه لأولادي

ومن الآخر :

إن الله لايغير مابقوم حتى يغيروا مابأنفسهم

تحياتي

turky_911 · 07/05/2008 11:16:48 AM

ana ma3aky ya soma we el kalam ely anty bet2oly sa7

bas a7na ba2ina salbieen gedan we gobna we el 7koma hya ely 3amalet keda

(( adrab el marbooot y7'af el sayeb))

we akbar dalil 3ala keda el moshkila ely 7asalet 3andena fe el re7ab

beta3et el shabab el 3ra2yeeen we el masreen

a7na sha3b betfar2o 3asaya we betgama3o sofara

lazem kol el nas te3mel zay ma anty beta3mely ma3a welladek (el sa7 sa7 we el 3'alat 3'alat) rabena y7'alihomlek

mamamira · 07/05/2008 8:43:03 PM

عموما ايها الاخوة الكرام الخلاف فى الراى لا يفسد للود قضية

تعالوا نشوف بأة جزء من المسرحية

http://videohat.masrawy.com/view_video.php?viewkey=b0d38b06b8a78f3637d8

ابن عثمان · 07/05/2008 11:35:46 PM

يا ريت يا أخ تركي توضح بس إيه موضوع الشباب العراقيين والمصريين دا؟

إيه اللي حصل بالضبط؟ خناقة يعني ولا إيه؟

عشان أنا ما عنديش أي فكرة عن الموضوع

وشكراً

turky_911 · 08/05/2008 7:43:49 AM

هي فعلاً كانت خناقه يا ابن عثمان بس نهايتها اللي كانت غريبه

شباب عراقيين رخموا علي بنات مشيين في الرحاب و شباب مصريين اتخنقوا معاهم

وراحوا قسم التجمع الاول وطبعاً انت متوقع اه اللي حصل هناك

العراقيين راواحوا و الباقين ولاد بلادنا الجدعان اتظبطوا