تحسبها صح تعيشها صح

مفيش حاجه واجعة قلبي ومسببالي انتفاخات زي الاعلان الغريب اللي بيطاردنا في شوارع المحروسه بالاضافة للتليفزيون واللي شعاره تحسبها صح تعيشها صح اعلان مستفزززز جدا واحد بيوفر في استهلاك المياه (اللي هي الميه يعني) وهو ده اللي خلاه يدخل ابنه أحسن مدارس !!! يا سلام !!! طب ايه العلاقه ؟؟؟

وواحد تاني بيوفر في استهلاك الكهرباء واللقطة اللي بعدها المحروس بيجري ورا عياله في الشاليه بتاعه في بورتو السخنه !!!

وبعدين رمش العين وفرت من مصروفها وجابت لاب توب !!! مصروف إيه في الليله الزرقا دي اللي بيجيب لاب توب ده ؟؟؟ وطبعا في الاخر الجملة الأكثر استفزاززز في المجربة الأرضيه والله ما تعديش حتى على الهنود .

(ملاحظه : على فكرة أحلى تحية للهنود بتوع النووي ) احسبها صح تعيشها صح

وعليه ،،، خدوا عندكم بقا ، هيا جت عليا انا يعني ؟؟؟

- توتي وفر في فلوس المخدرات بتاعته وجاب عربية هامر جديده !!! احسبها صح تعيشها صح

- نوسه وفرت من فلوس الديسكو وسافرت 3 شهور فرنسا الصيف اللي فات وفي الغالب مش راجعه !!! احسبها صح تعيشها صح

- سهير بتشرب علبة سجاير واحده بس بدل اتنين وبفلوسها حجزت شهر في الفورسيزووون في الرويال سويت !!! احسبها صح تعيشها صح

- حنكش قلّب بقية فلوس العيش اللي مامته كانت بتديهالو وبيهم دفع مصارف الجامعة الأمريكية !!! احسبها صح تعيشها صح

- عم حسين بواب العمارة وفر من التيبس اللي بياخده من السكان واشترى رونالدينهو بتاع البرازيل !!! احسبها صح تعيشها صح

- عادل صاحب شركة استيراد خصم من كل الموظفين 10 أيام وبيهم جاب خاتم سوليتير للفيونكه بتاعته !!! احسبها صح تعيشها صح

- صبحي وفر في أكل الجبنه الرومممي وجاب فيلا في التجمع الخامس بالبسيين وجاب عوامه وزه كمان !!! احسبها صح تعيشها صح

- طأطأ بطل يجيب الكارت أبو 25 جنيه وبيجيب الكارت أبو 10 جنيه وبالفرق دفع المهر والشبكة وعمل فرحه في لندن وبيقضي شهر العسل في الكاريبي !!! احسبها صح تعيشها صح

نداء إلى أصحاب القلوب الرحيمة وجمعيات الرفق بالإنسان وبالحيوان ، أوقفوا هذا الاعلان المستفز ده

أو وفروا لنا أدوية مكافحة الحموضضضه والضغط