جارك المنتظر في المرحلة التامنة ويمكن ابعد عن الشر و....................... 

رغم احترامى لشعرك الجميل ولكنه مبالغ فيه شوية وانا حاجز فى التاسعة وكل فترة ازور الرحاب مشاء الله لاقوة الا بالله الجمال والنظافة بالنسبة لخارج الرحاب لاتضاهى اى نعم انا معاكم فيها بعض السلبيات والسادة الافاضل السكان بيحاولوا يعالجوها وينبهونا ليها بس مش السواد اللى انا شايفه فى الشعر ده مش للدرجة دى

 ياترى انا عايشه في الرحاب نفسها اللي انت بتتكلم عليها دي والا ايه؟؟؟؟؟؟؟

 

ياريت تقول الحكايه لأنك بتسوء سمعة المكان اما تتكلم عليه في منتدى وتخوف الناس بالشكل ده

 

الرحاب جميله حرام عليكوا بجد

كل واحد يقابل مشكلة شخصية يشتم في الرحاب وبعد كده الناس تقابلنا تقول لنا ايه اللي بيحصل عندكوا ويهنالهم الكلام اللاذع

ياريت نتوخى الدقه ونتكلم بموضوعية

هو في ايه بالضبط !!!!1

كلنا بنحب الرحاب وماجيناش دفعنا كل المبالغ دى علشان نطفش منها ونسيبها وعازين نركز على المشكلة الاساسية وهى دخول الغرباء وبعض النقاط التنظيمية داخل المدينة كنظافة السوق والاهتمام بالامن وخلافه واتوقع ان اهم مشكلة يجب التركيز عليها وسوف تجعل الامور افضل ان شاء الله هى دخول الغرباء للمدينة سواء للتنزه او التسوق او خلافه يعنى ياجماعة مش عاوزين نضخم المشاكل ونكبرها عاوزين نحدد المشكلة الرئيسية اللى عاوزين نواجهها

 شكرا مادي على التوارد الفكري

بس الحقيقة اني بشعر بعنصرية من حكاية منع الغرباء من دخول الرحاب

احنا ليه عاوزين نفصل نفسنا عن المجتمع الكبير الفصل دا بيولد نوع من الرفض في المجتمع الكبير تجاه المدينه

اطلبوا امن زي مانتوا عاوزين بس بلاش نطلق اسم الغرباء دا على زوار المدينه

واهي البوابات الألكترونية هتحد شوية من دخول الزوار

تحياتي

 

مقصدى للغرباء هو غرباء التفكير من يخربون ويفسدون لانى يوما كنت غريبا عن المدينة وعرفتها من خلال الزيارة لكن مرحبا بكل غريب يحب زيارة المدينة محافظا عليها وغير مرحبا بمن يخرب مدينتنا فانا لااويد فكرة الانفصال عن العالم فنحن جزء منه ولكن لااحب ان يرى اولادى او زوجتى او انا مايؤذينا من غريب جاء ليتلف ويفسد هذا تفسيرى للغرباء الذين مأتينا للرحاب الا هربا منهم فلست عنصريا بل على العكس احترم كل مجد ومكافح مهما كانت طبقته واظن ان لفظ الغرباء فى كل المنتدى يطلق فقط على الفئة الغير مرغوب فيها التى ترتع فى الارض فسادا واشكرك ياسوما لاثارة هذا الموضوع لان كلا منا له تفسيره عن الغرباء

 

 ياأستاذ موودي الشعر اللي كتبته عور ودلوقتي بتقول ماقصدش

تخيل واحد دخل قرا كلامك وومش ساكن في الرحاب هيخرج يقول عليها ايه

 

استاذ مادي انا لا اقصد ابدا اني اتهمك بالعنصرية لا سمح الله

بس الحقيقة الكلام اللي بنقوله هنا بياثر بشكل واضح

يعني اتذكر اننا في المنتدى كنا اصحاب فكرة البوابات الألكترونية

ولو يشوف كلامي العزيز رامي يؤكده حتى اتكلمنا عن السينسور وساعتها حسينا اننا بنحلم ومع ذلك حصل

 

وبمناسبة الغرباء انا شفت واقعة بعيني في الفود كورت

اتجمع شوية شبابا غرباء وعملوا حلقة وبدأوا يطبلوا بشكل مستفز " هيعملوا حفله بقى" لقيت رئيس الأمن في المكان بيجري عليهم هو واتنين عشان يطردهم من المكان

 

موقف اخر

 

في الفود كورت لقيت بتاع الأمن بيسأل الناس اللي قاعدين على الترابيزات :" حد ضايع له محفظه"  وفعلا اعطاها لصاحبها

اجمل تحية لأجمل مدينه هنحافظ عليها بعينينا

 

 

 استاذ احمد

احمد مصطفى اسم عزيز عليا جدا

دا اسم والدي ربنا يبارك في عمره :)

ودي مجرد دعابه

 وعلى فكرة انا اقصد .... عور ... يعور ... تعويرة

انا اكتر واحده بتزعل من الكلام اللي بيتكتب في المنتدى للنقد السلبي لأني بصراحه بحس ان الشكاوى مبالغ فيها

ومعظمها شخصية ... انا عاوزة اعفي نفسي من تقييم اللي بيتكتب على الرحاب

انا برد بس على حاجات معينه وفي حاجات مش برد عليها اصلا

وعلى فكره ردي مش ضدك بالتحديد .. انا بس حبيت اوضح وجهة نظري

 على العموم حصل خير

واهلا بيك

 

وان شاء الله ربنا يقرب البعيد ونستلم واللى بيحصل فى الموقع ظاهرة صحية وبتدل ان الرحابيين قلبهم على الرحاب بيتنا الكبير بصراحة الرحاب مشاء الله عليها جميلة جدا مقارنة باى مكان سواء فى النظافة او حاجات كتير ومستوى الاعضاء هنا داخل المنتدى من حيث الفكر او الرقى والثقافة وهم جزء من ساكنى الرحاب بيدلك على هذا وحتى لو حدث خلاف داخل المنتدى تجده يحل بهدوء وبدون ضجيج وضوضاء مما يطمئنك على  جيران المستقبل ان شاء الله والمثل بيقول اختار الجار قبل الدار بس الرحابيين عاوزينها احسن واحسن لان همه تعبانيين جدا فى الفلوس اللى بيدفعوها وكل ده من حقنا كرحابيين ولا يضيع حق وراءه مطالب يعنى السلبيات الموجودة اقل كتير من الايجابيات لكن طول مافيه ناس افاضل بتطالب بالحق ان شاء الله سوف يتم القضاء على السلبيات نهائيا والرحابيين جل خوفهم من تفاقم هذه السلبيات مما يصبح معها الحل مستحيلا لان معظم النار من مستصغر الشرر وانا ساكن فى مدينة نصر وعارف الفرق كويس قوى قوى فعلى بركة الله انتظر الاستلام ومش هاتندم ولازم تزور الرحاب من فترة لاخرى علشان تعرف مدى صحة قرارك وربنا يباركلك ان شاء الله

الأخ الفاضل/أحمد مصطفى

 

الأخوات والأخوة الأفاضل

 

تحية طيبة لكم جميعاً،

 

عندما قرأت مشاركة أخونا الفاضل أحمد، ثم التفاعل معها من خلال الردود عليها، رأيت مشاعر وآراء متفاوتة، محصلتها النهائية هي الخلاصة الطبيعية والمعتادة التي نعرفها ونعتادها عن المشاعر والعواطف الجيَّاشة لمجموعة من المحبين لمجتمعهم، بصرف النظر عن طرق وعبارات التعبير المختلفة. ولذلك إتفق الجميع والتقوا على شيء واحد، هو حب المجتمع الذي يعيشون فيه جميعاً.

 

عندما يعبر حبيب عن مشاعره لحبيبه، من الطبيعي جداً أن تكون مشاعره أو تعبيراته لا عقلانية، ولا موضوعية! فعندما ترى أم إبنها أجمل وأفضل أو حتى أسوأ ما في الوجود، أو يرى إنسان حبيبه أجمل مخلوق في الدنيا أو أشد المخلوقات قسوة!!! هذه مشاعر طبيعية ليست للمناقشة الموضوعية. فالإستعارات والكنايات غالباً ما تأتي بحدود قصوى ومبالغات وجمع بين أضداد، وهي في النهاية سمة جمالية مهمة من سمات التعبير. فلا داعي أبداً لزعل أو قلق أو توتر وشد عصبي من أي درجة أو نوع أو مقارنتها بوقائع أو حقائق ... إنها في النهاية مجرد رؤية مشاعر، وليست موضوعات للمناقشة الموضوعية! لذلك ربما كان من الأفضل وضع مثل هذه المشاركة في باب "أدب وثقافة وفن".

 

وإن كان يوجد فيها من شيء يعاد فيه النظر، فاعتقد أنه عبارة " وحياة كل ..." فهو قسم بغير الله، وأنا لست شيخاً ولا مفتياً، ولكني بالفطرة أراه أمراً مهماً جداً الإنتباه إليه، واستخدامه غير ضروري. ومؤكد أن هذا المعنى ( كقسم ) غير مقصود أبداً. ولكن الحرص ضرورة وواجب في مثل هذه الأمور والحدود. قد ينطق اللسان بكلمة تهوي به كثيراً وهو لا يدري، والعياذ بالله. فلم المجازفة والمخاطرة بشيء من هذا القبيل؟! بر الأمان أفضل.

 

الأخ الفاضل أحمد...أرجو ألا تحرمنا من مشاركاتك ذات الطابع المميز، وكذلك ألا تحرمونا أيها الأخوات والأخوة والجيران الكرام من التفاعل والتجاوب والردود على كل المشاركات، وفتح المناقشات كلما أمكن، ولا تنسوا أننا بدأنا التعارف من خلال المشاركات، ومازلنا نتواصل بها.

 

من أجمل الملحوظات أو التعليقات في ردود هذه المشاركة، أننا جميعاً ننتمي إلى مجتمع واحد، داخل وخارج الرحاب، ومن الأفضل البحث عن عبارة أخرى غير " غرباء " عندما نتحاور في مشاكل المدينة.

 

أهلاً بجيران القادمين قريباً بإذن الله، وتمنياتنا بالخير والسعادة بسكنكم المنتظر في هذا المجتمع الناشئ.

 

لكم جميعاً كل تحية وتقدير،

 

إبراهيم سرِّي