 آه يا بلد !!
عندما اشترت لينا الفرخة ب 50 قرش فقط . ولم يصدق زوجها نفسه . مش ممكن مش معقول حتى صدمته بحقيقة الصفقة .. "الفرخة بـ 50 قرش بس، والقفص فاضي بـ 15 جنيه"
للأسف صار هذا هو شعار المرحلة . . وسياسة التعتيم والتعميم . التعتيم يعني عدم التصريح بالحقيقة وبواطن الأمور. والتعميم يعني أي حد بيبيع أي حاجة لازم يلبسنا العمة .
............
البرامج المستفزة : اتصل ب 0900 .. واكسب مليار جنيه ... وأجب على السؤال التالي : مين قام بحركة عرابي . 1- أحمد عرابي. 2- محمد هنيدي 3- أبو تريكة
اتصل واكسب المليار.. وطبعا كذب في كذب
ولو صدقوا فهي مقامرة رخيصة. ويا ريت بيصدقوا. كله شغل نصب واحتيال. والشركة المصرية للإتصلات بتلاقي عليها كذا مليون جنيه للخدمة الصوتية. فبتوزعها بعشوائية على الفواتير. والناس تصرخ وتصوت من الفواتير واسعارها
...........
المصرية للسيارات. طبعا معروفة . بتنزل كل يوم جمعة تقريبا إعلان في الأهرام . بأسعار السيارات . ياخدك الحماس وتطلع على المصرية علشان تشتري سيارة تتناسب مع إمكاناتك. تفاجأ ان السعر اللي في الإعلان سعر وهمي. ويقولك السيد مندوب التسويق إن الباقي بيتدفع عند الإستلام . وان العرض المكتوب مقدم السيارة فقط. وتجد ان سعر السيارة أغلى من أي معرض آخر
.............
دريم لاند بتاعت أحمد بهجت .. ناس أجانب أصحابي على نياتهم شافوا الإعلانات صدقوا. فحجزوا وحدة في دريم لاند سنة 99 . على أساس يقضوا أجازاتهم في مصر لأن لهم شغل هنا. المفروض كان استلام الشقة في سبتمبر 2000 ..
عدى 2000 ... و 2001 .. و2002 .. و2003 .. و 2004 . و2005 .. و2006 .. ولا في شقة ولا غيره وكل ما ينزلوا أجازات بينزلوا على حسابهم في الفنادق.. حاولوا يستردوا فلوسهم من دريم قالولهم في الدرييييييييييييييييييييييييمز إن شاء الله
" هنعرض الشقة للبيع ولما يجيلها زبون ويشتريها . هنخصم منها 20 % والباقي يرد على أقساط على 10 سنوات "
...............
معظم البنوك وعلى رأسهم سيتي بنك . يعمل للواحد البحر طحينة . ويعدد في المزايا والتسهيلات الرهيبة لتكون عميل في سيتي بنك. وأول ما تعمل فيزا أو ماستر كارد . تلاقي النصب الرسمي والربا الفاحش والإحتيال المقنع. والحكايات كتير مع سيتي بنك .
...................
المطاعم ومحلات الوجبات السريعة . إعلان 10 متر في 10 متر. السندويتش العملاق الصاروخ الميجا الخ ............. وصورة أد الأوتوبيس مكتوب تحتها صورة بالحجم الطبيعي.. تتحمس وتدخل المطعم تبقى جعان وخلصان . وتدفع وكلك ثقة ان السندويتش الجديد هيكون مختلف تماما عن اللي فاتوا. لأ المرة دي هيكون كبير بجد . أنا ممكن اللي يفيض أخليه يلفه . وأعزم الشارع كله عليه .
وتيجي الصينية وفيها حاجة ملفوفة في ورقة شكلها حلو. يا دوب أد كابسولة الفيتامين .... أمال فين السندويتش
تفتح السندويتش تلاقي نصه خس. والنص التاني بصل ... وحتتين طماطم . وشكرا
تبلعه .. بشوية مية . وتجري على أقرب عربية فول وتاكلك كام رغيف وانت متنكد ومتحسر على الفلوس اللي اتدبست فيها .
............
ولا بتوع تايم شير اللي مغرقين البلد . بيبيعوا الهوى . اسبوع مصيف في أي مكان ب 50000 جنيه متجدد كل سنة. ادفع الآن واحصل على خصم 6000 جنيه . ويفرجك على صور من هنا لاسوان . جميل هايل
طيب حضرتك . أحب أشوف الموقع وأخد فكرة عن التجهيزات . يحمر ويخضر ويصفر. موقع ايه . احنا بتوع مواقع ادفع وإلا هتروح عليك الفرصة. وطبعا معظم ضحاياهم من العرب والأجانب اللي موش عارفين احنا وصلنا لحد فين . والنصب عندنا أخد أشكال ايه .
.....
من غير زعل وللأسف النصب أصبح إدمان لدى معظم الشعب المصري. ولدى معظم المؤسسات التجارية . واللي موش نصاب ميعرفش يعني ايه التزام. وبيضيع حقوق العميل ويبهدله ويمرمطه وده ميفرقش كتير عن النصب
..
نصائح لازم تتبعها في مصر
1- إياك ثم إياك ثم إياك من شراء شقة على الورق. أو لسة هتتبني . ودفعة حجز ودفعة استلام ودفعة نصب. لازم تشوف الشقة بعينيك وتمسك مفتاحها بإيدك وتراقبها يومين تلاتة وتسأل عنها علشان تتأكد أنها ما اتباعتش ل 2 . 3 قبلك
2- اي حد يقولك حضرتك احنا شركة ......... عندنا عرض ... قبل ما يكمل قل له شكرا وسيبه وامشي
3- أي شخص يقول لك مبروك انت كسبت معانا. قل له ما تاخد انت الهدية . وتتكل على الله
4- أي شخص يوقفك في بنزينة بعد ما تمون . ويقول لك حضرتك احنا عاملين حملة دعايا و هتكسب معانا هدية و ......... قل له أنا موش متزوج علشان دول بتوع التايم شير. يا عيني اتفقسوا في كل حتة فبيمشوا يشمشموا في أي بنزينة .
5- أي حد يديلك سعر وهمي أو معلومة وهمية أو حاجة ببلاش متصدقش. لأن السما مبتمطرش فلوس
6- وأهم حاجة لا تحسن الظن بالناس. وخذ حذرك لأن
القفص فاضي ب 15 جنيه
ويا عالم بكرة ممكن يحصل ايه . يمكن نصحى الصبح نلاقي المهلبية المضروبة مغرقة السوق
---------------------------------منقول--------------------------------------------
|
