عارفين الازمة اللى مرت بيها البلاد دى فيها حاجات جميلة جدا جدا وانا متفائل ان شاء الله
اولا : عرفتنى بجيرانى واحد واحد وكلنا وشربنا مع بعض وخفنا على بيوت بعض وحرسنا بيوتنا
ثانيا : وحدتنا كلنا مسلم ومسيحى واصبح مافيش فرق وماحدش بيسال حد انت مين ولا ديانتك ايه
ثالثا : عرفتنا قد ايه المصرى عنده طاقة رهيبة وممكن يخرجها ازاى وفين وامتى وليه
رابعا : احساسنا بالكرامة والعزة اللى تم سلبه منا ورجعلنا تانى
خامسا :عودة العالم العربى لاحترامنا مرة اخرى ومعرفتهم بقيمة الشعب المصرى العظيم
سادسا : المفروض كانت تبقى اولا شبابنا العظيم اللى كلنا استهترنا بيه
سابعا : الكل عرف دلوقتى ان الظلم ليه نهاية وان لكل فاسد وظالم يوم
ثامنا : قد ايه حبيت كونى مصرى ابن مصرى
تاسعا : مابقتش خايف من اى حد ولا اى حاجة واقدر اقول اللى انا عاوزه فى اى وقت واى مكان
عاشرا : متفائل ببكره ان شاء الله ومش خايف على اولادى
الحادى عشر:الشعب المصرى الاصيل تحس انه اتغير للاحسن فى يوم وليلة
الثانى عشر : كلنا عرفنا ان فيه رب واغلبنا لسانه لهج بالدعاء
الثالث عشر : اليهود اصبحوا مرعوبين منا ورجعوا تانى لجو 73
الرابع عشر: كنا كلنا بنقول مافيش رجاله بعد 73 دلوقتى بعد 30 سنة يقولوا مافيش رجالة بعد 2011
الخامس عشر :ابنى الكبير 9 سنوات بقى عنده راى ويقولى يابابا يستقيل ويستنى يدفن هنا وماله
السادس عشر :ابنى الصغير 6 سنوات امبارح ماسك العلم ويقول عمر يريد اسقاط النظام
السابع عشر : حاجات كتير واحاسيس كتير بس اللى عارفه انها احاسيس كلها عظيمة
اخيرا وليس اخرا : اللهم جنب هذه البلاد الفتنة وكفانا اراقة دماء اللهم لاتفتنا اللهم ولى من يصلح اللهم ولى من يصلح اللهم ولى من يصلح
اجمل مافى الازمة