على مدى يومين كاملين، فيه حد بيحرق زبالة ولا ما أعرفش بيحرق إيه في قطعة الأرض اللي جنب الطريق الجديد اللي بيجيب من طريق السويس للميدان اللي قدام بوابة 16.

 

المرحلة الرابعة كلها اتخنقت، الواحد ما بقاش عارف يعمل إيه، ولا يكلم مين، اتصلت بواحد في الجهاز، قال لي دول شوية عرب (يقصد بدو يعني) بيحرقوا زبالة، وإن الجهاز عادة بيبعت عربية مطافي تطفيها، أنا ما بقيتش مصدق، مش ممكن تكون فيه زبالة ضخمة للدرجة دي، تعمل حريقة وتطلع الدخان الكثيف دا اللي بقاله يومين مش راضي يخلص.

 

لحد إمتى هنفضل عايشين في العشوائية دي؟؟ أي حد يطلع في دماغه يعمل حاجة بيعملها، وطز في الآلاف اللي هيتضرروا من عملته، والمصيبة إنه ما فيش أي ردع ولا رد فعل.

 

يا جماعة اللي عنده فكرة عن نمرة جهاز ولا وزارة شئون البيئة يعرفنا ينوبه ثواب، لازم نعمل حاجة إيجابية ونوقف المهزلة دي، أكيد فيه في القاهرة الجديدة مقالب للتخلص من الزبالة بشكل صحي، حد عنده فكرة؟