شدني أسلوبك ولغتك الرصينة (نادر لما بألاقي حد بيكتب فصحى كويس في الزمن دا).

 

الحقيقة أنا شايف إنك تتوكل على الله وتُقدم على الشراء.

ويا سيدي لو قلقان من سير العمل في المرحلة التاسعة، يبقى خليك في الأمان واشتري حاجة في المراحل الجاهزة الخلصانة.

طبعاً ميزة المرحلة التاسعة إنك هتقسّط ومش هتضطر تدفع كله كاش.

لكن كله بتمنه.

 

هو طبعاً كله في علم الغيب، بس أنا ميال لإن الرحاب ما يتخافش عليها، وإن المراحل الجديدة كلها هتتسلم في مواعيدها وبدون تأخير، ووارد جداً هشام طلعت ياخد براءة (أتمنى كدا من كل قلبي لو كان فعلاً بريء)، وساعتها الأسعار هتزيد تاني.

 

بالنسبة للمشاكل اللي انت قريت عنها هنا، أنا برضه متفائل من ناحيتها، يعني مثلاً بالنسبة لنقطة تسجيل العقارات، أنا سامع إن فيه خطوات بتتخذ حالياً وإنها موضوع وقت مش أكتر. بالنسبة لمصاريف الصيانة أنا متأكد إن الوضع مش هيستمر كدا، فيه خطوات إيجابية برضه مجموعة من السكان بيحضرولها دلوقتي وأنا واثق إنها هتسفر عن حل مُرضي يضمن حدوث شفافية كاملة، والحق طبعاً ما يزعلش.

 

خلاصة كلامي: السكن في الرحاب يستاهل اللي بيندفع فيه، صحيح بالفلوس اللي هتدفعها هنا ممكن تاخد حاجة أكبر وأحسن في حتة تانية، بس مش هتلاقي الباكدج الكاملة اللي موجودة هنا، بص للموضوع كـ All in one هتلاقي الرحاب تكسب.

 

وما تنساش في الآخر تستخير

 

وربنا معاك

اشكركم جميعا على ردودكم

الاخ ابن عثمان ، انا الذي سبق اعجابي باسلوبك وكتاباتك في هذا المنتدى وحقا كنت اتمنى ان ترد على انت بالذات وكذلك الاخوة المميزين هنا مثل

sfr57, lily, Amel, المستشار 

 

وغيرهم ممن انتظر مداخلاتهم الهامة في هذا الموضوع

بالمناسبة أعجبتني تدوينتك عن بلاد الألمان جدا 

 

الحقيقة لقد طمأنتني قليلا بخصوص تسجيل العقود وان كنت لا اعلم تطورات الموضوع وهل هي تبشر بخير ام لا ولكن على الاقل الرحابيين غير ساكتين وماضيين نحو تسجيل عقاراتهم  ولا يضيع حق وراءه مطالب (حتى في مصر؟) ولا ايه؟

 

ان شاء الله تنضملنا فى الرحاب باذن الله انا احد الحاجزين فى المرحلة التاسعة وعندى قلق من عدم بدء العمل بها الى الان ومتابع معاهم فى الجهاز باستمرار وهمه مخططهم ان بدء العمل يكون فى اول شهر 6 ان شاء الله وهايكون هناك فترة كافية ان شاء الله لنهو العمل فى هذه المرحلة يعنى هايكون فاضل حوالى 18 شهر على التسليم اعتقد ان دى فترة كافية لنهو العمل لو الكلام صحيح وتم البدء فى شهر 6 زى ماقالولى واتوقع بعض الاجزاء فى المرحلة الخامسة تم بدء العمل بها مؤخرا والانجاز كان سريع هو بس موضوع هشام طلعت مصطفى هو اللى عامل القلق ده عند الناس شوية وانا واحد منهم لان ده شقى العمر وحلم سنين ان الواحد يحظى بجيرة من النخبة المحترمة الواعية وهو ابن عثمان الصراحة قالك القول الفصل لو فلوسك جاهزة يبقى من الافضل تشترى حاجة جاهزة لكن لو مش جاهزة استخير ولا ندم من استخار وانا برضه قبل ماحجز استخرت كتير جدا وان الله ليس بخاذل من استخاره ولكن القلق حاجة صحية ومشروعة لان احنا تعبانين فى الفلوس وربنا العالم وعلى فكرة انا متابع الرحاب وبزورها كتير جدا وهى تعتبر ممتازة مقارنة بباقى مصر لكن طبعا كلنا ببنشد الاحسن ولكن كلنا بنتكلم ونذكر بعضنا ببعض المشاكل الموجودة علشان يتم محاربتها وايه سبب الاهمال اللى انته شايفه فى اى مكان فى مصر ان كل واحد قافل باب شقته عليه وبيقول وانا مالى اهمه حاجة جوه شقتى علشان كده تلاقى اهمال قدام الشقة والعمارة ولا حياة لمن تنادى لان كله يلا نفسى لكن هنا والحمد لله لو فى سلبية بسيطة بيتم التحدث عليها علشان كل واحد من ناحيته يحاربها ولا نسكت وندفن راسنا فى الرمال لحد مانتحول الى الاهمال اللى بنعانى منه خارج الرحاب وانا احد سكان مدينة نصر واصبحت مهملة نظرا لسلبية اكثر ساكنيها واتمنى يفضل الموقع كده يذكر السلبيات البسيطة ويحاربها علشان مانتحولش مدينة نصر تانية وكل سكان الرحاب وحاجزيها عارفين فرق المستوى بينها وبين بره ولا ننكر هذا لكن كلنا سيبنا بره وجينا هنا وكلنا امل ان احنا نعيش فى مكان اجمل مايكون وهى الرحاب فعلا احسن مكان فى مصر ولكن احنا عاوزينها تتفوق على نفسها واظن ده مش هايكون الا لو كل محبى الرحاب ايد واحدة لمحاربة الاهمال والفساد عند ذوى النفوس الضعيفة وانا قريت بعض التعليقات من الاعضاء الافاضل اللى بيجوا يقعدوا فى الرحاب ايام معدودة وبيتهموا الناس اللى بتذكر السلبيات بانهم سوداويين بالعكس انا شايف ان همه دول الناس اللى لولالهم لكانت الرحاب سائت لان التنازل بيبدا من حاجات بسيطة وبتكبر مع الايام لان الفساد والاهمال عامل زى الحيوان المتوحش بيبدا صغير جدا ومع تركه وعدم القضاء عليه بيتحول الى وحش ينهش كل من يعترضه وربنا يكرمك وان شاء الله ربنا ييسرلك الحال ويختارلك الافضل ونتمى مجاورتك وانا حاجز من سنتين ولو رجعت الايام لورا هاحجز برضه ومش ندمان على الخطوة دى لكن قلقان الى ان استلم الشقة 

شكرا على ردك المطمئن يا اخ مودي وهي المشكلة فعلا ان الفلوس مش جاهزة للمراحل اللي خلصت التقسيط هيناسبني كتير

الله المستعان 

ادعولي يا جماعة ربنا يهديني للصواب بجد

مش عايز اكون مبالغ في القلق واخسر الفرصة ومش عايز اكون متهور وادفع فلوسي في حاجة مش مضمونة

ولو قضية هشام طلعت براءة كما قال الاخ ابن عثمان فساعتها بلا شك الرحاب هتغلا وهندم أشد الندم 

وطبعا انا مش متوقع اني لو اخترت اني اشتري مش هقلق، لان زي ماقلت يا اخ مودي القلق هنا طبيعي وصحي خصوصا في بلدنا اللي مالهاش قاعدة في اي شيء فاكيد هقلق وهقلق جدا كمان لكن ربنا ييسر وميظهرش هناك ما يبرر هذا القلق يعني يظل قلق عادي زي أي واحد قلقان على حاجة اشتراها ولسه ماستلمهاش

 

مزيد من الافكار والمداخلات بالله عليكم يا اخوتي في الله 

 سيدى الفاضل.

 

فى رأى الخاص لازالت الرحاب من احسن المناطق للسكنى فى مصر والفرق بينها وبين افضل المناطق الاأخرى فى القاهرة الكبرى كبير

ويبدوا اننا من منطلق حرصنا على هذة المدينة الجميل اتخذنا من هذا الموقع منبرا لمحاربة كل ماهو سلبى فى هذة المدينة جاهلين الاعراض الجانبية التى قد تحدث نتيجة لهذا

انا شخصيا لم انتقل للرحاب بعد واسكن حاليا فى منطقة الزيتون المزدحمة بالسكان والتى كانت منذ امد ليس ببعيد من اعرق واهدى المناطق فى مصر ولكنى اتمنى اليوم الذى سوف اهرب من هذا الجحيم

انى اصحوا كل يوم على صيحات البائعة الجالين وسباب سائقى العربات على اولوية المرور فى الشارع المزدحم

افتح شرفتى المطلة على العمارة المقابلة التى لون كل ساكن شقة شرفتها بافظع الالوان دليلا قاطعا على تفشى العشوائية فى ذوقنا

انظر الى الريحانة الوحيدة الباقبة على قيد الحياة من مجموعة الاصص اليابسة فى شرفتى التى ماتت نتيجة لعوادم السيارات واتسأل مذا فعلت العوادم ايضا برئة اطفالى

صبرا ريحانتى .اصمدى فقد بقى من الوقت شهورا

بصراحة و بدون تجميل بالبلدى كدة الرحاب املة بالنسبالى

 

 

 

 

 

أسرني أسلوبك البليغ يا أستاذ سامح

بارك الله لك في اولادك ريحانة قلبك و اتمنى ان تصمد نبتتك الباسلة ريحانة الشرفة

دعواتي بحياة هانئة في اي مكان تحل به

مع أطيب تحياتي 

شكرا على الرد الوافي يا استاذ رامي وفعلا كما قلت مشاكل الرحاب نسبية وكلها قابلة للحل بتكاتف الرحابيين 

اشكر الجميع على الاهتمام والرد الذي افادني كثيرا 

فعلا و بجد ومن كل قلبى

شكرا لكل من قام بالرد على هذه الاستشاره

لانها جعلتنى من جديد استنشق هواء الامل ان المال الذى فعلا كديت و شقيت فى تجميعه لن يذهب سدى

و ان الامل الذى لا ذلت احيا عليه ليل و نهار من الممكن جدا ان يتحقق

وشكرا لكل المعلومات التى وردت من ناحيه جديه العمل والتسجيل وخلافه

بجد

شكرا