 حوار بين مسئول و مقيم
لكل حوار جوهر مهما اختلفت شخصيات الحوار أو لغة الحوار أو أسلوب الحوار و فيما يلى جوهر الحوار بين المقيم و الجهاز من وجهة نظرى الشخصية
مسئول الجهاز : فين المصاريف ياه
المقيم : مصاريف إيه حضرتك
مسئول الجهاز : هتستعبط مصاريف الصيانة ياه
المقيم : يا باشا احنا لسه فى أول السنة
مسئول الجهاز : أولها آخرها انا عايزها دلوقت
المقيم :حضرتك أنا مش معاى المبلغ دلوقت
مسئول الجهاز: وبعدين معاك ( يتحرك مسئول الجهاز فى إتجاه المقيم
المقيم : هتعمل ايه لأ بلاش بلاش قفايا و النبى
مسئول الجهاز (بعد أن أمسك بقميص المقيم) : عارف ياض لو مدفعتش هعمل فيك إيه
المقيم : حاضر حاضر هدفع بس سيب القميص
مسئول الجهاز : هقطع عليك الميه فاهم ياض
المقيم : فاهم فاهم طيب لو سمحت ممكن أقسطهم
مسئول الجهاز : ماشى ممكن تقسطهم بس أول قسط يجينى النهارده مفهوم
المقيم : متشكر أوى يا باشا عشر دقايق و يكون القسط عندك
وينصرف المقيم مسرعا لإحضار أول قسط و بعد كام يوم أثناء عودة المقيم من العمل وجد مسئول
الجهاز منتظرا على البوابة و يمنعه من دخول المدينة
المقيم (وهو مترددا) : خير يا باشا والله أنا دفعت أول قسط زى ما اتفقنا
مسئول الجهاز : عارف ياه
المقيم : طيب حضرتك ممكن أدخل المدينة
مسئول الجهاز : لأ يا حلو مش هينفع تدخل المدينة إلا لما تدفع الكارتة
المقيم : كارتة ايه حضرتك أنا طالع بيتى مش طالع اسكندرية
مسئول الجهاز : ييييه ده انت غبى أوى فى أرووبة و الدول المتأدمة كل حاجة دلوقت بالكارتة و الكامبيوتر ، خلصنى هتدفع ولا
المقيم : يا باشا بس أنا مش عامل حسابى دلوقت و بعد إذنك يعنى عايز أطلع بيتى
مسئول الجهاز : خلاص شوفلك أى بوابة تانية و مش عايز أشوف وشك على البوابة دى تانى
المقيم : متشكرين أوى يا باشا و ربنا يخليك لينا
مسئول الجهاز : جتكوا البلاوى لما انتوا مش قد الرحاب بتسكنوا فيها ليه
أحمد مصطفى
|
