 مشاكل زى النزناز تنغص عليك العيشة والسلام
للأسف كل فترة قصيرة يظهر مشكلة صغيرة تنغص علينا العيشة ونضطر للذهاب الى الجهاز للشكوىوهناك ح تلاقى اللى يسمع لك بكل احترام وذوق فى أغلب الأحوال ولكن مش ضرورى تلاقى اللى يعمل لك حاجة فعلا فى مشكلتك
أما المشكلة اللى بحق وحقيقى لما تلاقى مافيش حد تروح له علشان تشتكى له مثلا ظهرت موضة جديدة من محصلى و قارئى عداد الكهرباء وهى انهم اذا حضروا ولم يجدوا أحدا بالمنزل يكتبوا لك على الحيط بجوار باب الشقة ان فلان الفلانى حضر بتاريخ كذا ولم يجد أحدا وهكذا كل مرة يكتبوا لك على الحيط,يعنى عايز أعرف فى عرف مين ده ان يسمحوا لأنفسهم بتشويه الحيطان بالطريقة المتخلفة دى وبعدين تروح فين وتشتكى مين,أنا متأكد مش ح تلاقى حد يفهم انت متضايق ليه أساسا وأنا مش عارف ليه بيكتبوا على الحيطة ؟انتقام أم تخريب أم قلة وعى وعدم تحضر؟
المشكلة التانية ان كتير استسهل و أروح أجيب اسطوانة الغاز بنفسى علشان لا أنتظر كتير و علشان أخلص نفسى وهناك تلاقيه يديلك اسطوانه مصدية معفنة لونها ماتعرفش أزرق ولا أخضر ولا أحمر و تقول له اختبرها يقول لك يابيه على ضمانتى أنا خلاص جربتها,أرجع بالأسطوانة البيت و أركبها ألاقيها منفسة والغاز بيتسرب منها,أتصل بالشركة وأحكى لهم عن المشكلة يقولوا لك مانقدرش نغيرهالك ولكن ممكن نيجى نركب واحدة جديدة تدفع تمنها!!!!يعنى منطق غريب ونظام خليهم يدفعوا
آخر حاجة ان عمال الرى بالمرحلة الرابعة خلاص بطلوا يرووا الزرع بانتظام وان رحت لمسئول الرى ح يقول لك ألف سبب ابتداء من انكار أى تأخير للرى وانتهاء ان النظام الحديث دلوقتى فى الرى هو مرة كل شهرين مع انى أدفع تمن رى وصيانة الحديقة الخاصة بى,وبصراحة الواحد خلاص تعب من المشاكل الصغيرة دى اللى عاملة زى النزناز مابتخلصش,ممكن بس تخلص لو كل واحد أدى شغله بذمة و ضمير
|
