بصفتي مقيم بالرحاب منذ 10 سنين ولي شقه ومحل بالمدينه ومن واقع خبرات وتجارب عديده وصولات وجولات مع المنمي العقاري استنفذت خلالها الكثير من الوقت والجهد والمال  والعاقل من يستفيد من تجارب الآخرين ويبدأ من حيث انتهوا اعلنها واضحه صريحه مخلصه بالوقائع والحقائق والمستندات واشفق عليكم من خوض تجارب معلوم مسبقا نتيجتها وللحفاظ علي مجهوداتكم لتوجيهها في الاتجاه السليم ولنكمل مسيره ومجهودات بعضنا البعض فخصمنا ليس هينا باي حال من الأحوال وبالبلدي مش حقاني ومغالط وبيلبس الباطل ثوب الحق بدون ادني وجه حق يعاونه في ذلك نظام حكومي فاسد نعيش فيه وللاسف يحكمنا بمنطق الحديد والنار ويناصرهم ويقلب لهم الحقائق ويزور لهم المحاضر بناء علي كل ماتقدم دول مابيجوش لا بذوق ولا بأدب ولابحوار ولابنصوص عقد دول بيتعاملوا معانا بمنطق تعامل الحكومه مع الشعب لا بد من وقفه رجل واحد انتفاضه دفاعا عن الحق والكرامه ومن مات دفاعا عن حقه فقد مات شهيدا ده دعوه من رب العالمين ياناس دافعوا عن حقوقكم وماتسيبوهاش لو قعدت اكتب ايه حقوقنا اللي هما واكلينها محتاج اكتب مجلدات أوعدكم في القريب العاجل ساقدم لكم رصد زجلي ساخر لأحوالنا في الرحاب

وعلشان ماحدش منهم يقول اني متجني عليهم ومانكرشي ان فيهم ناس جميله ومحترمه لكن للأسف مش بايدهم حاجه ده سياسه شركه بأدعو مسئولين الشركه الأشاوس وبأدعو كل عاقل في المدينه لزياره عماره 10 مجموعه 2 ومعاينه ع الطبيعه الغرفه التي أقامها مالك الدور الأرضي من الخشب والتي يصل سقفها لمستوي بلكونه الدور الأول واللي يطلع عليها يوصل لبلكلونه الجار اللي بالدور الأول في انتهاك صارخ للخصوصيه وحقوق الملكيه وحقوق الانسانيه وحقوق الانسان واي حقوق خلقها ربنا القطط كانوا بيستخدموا هذه الغرفه للقفز والدخول داخل مطبخنا كل يوم وهم ورزقهم يوم سمكه ويوم فرخه ويويهبشوا بنتي الصغيره وهي داخل بيتها الآمن المطمئن الذي ينعم بالسكينه والهدوء في ظل ادارتهم الحكيمه لا ربحهم الله الكلام ده بقاله 3 سنين واشتكيت لكن كاني باشتكي لأصنام ويقولولي روح اعمل محضر ضد جارك طيب انتم لازمتكم ايه ولو أنا اللي حاجري ورا حقوقي اللي انتم مسئولين عنها طيب بتطالبوني ليه بسداد الاتاوه اللي مابتستحقوهاش
بناءا علي ماتقدم وللاسف بعد مرور 7 سنوات من الالتزام بسداد الاتاوات الغير مستحقه بقول لكل شاغل وحده سواء شقه فيلا او محل او مكتب اداري الحق نفسك ربنا حيحاسبك علي تفريطك في حقوقك ولو ماجيتش ورا حقوقك ماحدش حييجي ويديهالك كفايانا خنوع وخضوع حنلاقيها منهم ولا من الحكومه واللي تهون عليه نفسه

وكرامته ماحدش حيعمله قيمه ولا اعتبار

لذا أقولها وبكل اخلاص سارعوا بعمل توكيل قضايا للمحامي الأستاذ محمد المنتصر عبد المنعم علي مصطفي الشهير بمنتصر الزيات عنوانه 45 عبد الخالق ثروت- وتسليم التوكيل للاستاذ/شهاب أو الاستاذ/ طارق الوراقي صاحب بست باي -ده راجل كتب عننا وعبر عن مشاكلنا وحس بينا ويقدر يعبر عن اللي بينا كويس في الصحف اللي بيكتب فيها والاعلام فرصتنا وما أدراكم بتأثير الاعلام فرصه وجاءت لحد عندنا لو ضيعتوها لا تلومون الا أنفسكم اللهم بلغت الهم فاشهد

 

 يارب باقي السكان يصحوا ويحسوا ويتجمعوا معانا وياخدوا موقف ويعرفوا ان الجهاز لازم تتقطع ايديه تماما علي عدم  احترامه للسكان وده عن طريق عدم دفع مصاريف الصيانة تماما أو اي مصارف تانية يطلبها زي نصبة البوابات  هو ده كل اللي يهمهم تماما ازاي يستولوا علي فلوسنا ولو اتجمعنا وقفلنا عليهم حنفية الفلوس ان شاء الله حنوصل لكل حقوقنا

قبل دقائق من صدور الحكم علي هشام طلعت مصطفي وبعيدا عن أي مؤثرات لكن اسمحولي اعبرلكم عن شعوري بجد يتمني من كل قلبي ربنا ينجيه ويبرئه من هذه القضيه لأنه مهما اختلفنا فهناك حقيقه راسخه ان هشام طلعت مصطفي نموذج ناجح لرجل أعمال مصري كان له دوره الريادي في النهضه العمرانيه في مصر وهو ابن رجل عصامي رحمه الله بعيدا عن أي اختلافات في وجهه النظر والتطبيق والاداره لكن بادعو من كل قلبي ربنا ينجيه يارب 

 أحي وبشدة الاستاذ حسن جمال وسكان عمارته علي الاتحاد الرائع وعلي رد الفعل الحازم بالنسبة لتغيير الاقفال وياريت كل السكان يصحوا ويتحدوا كده للاسف انا فوجت بسكان عمارتي انهم دفعوا الصيانة اول يوم في السنة عشان مش عاوزين مشاكل بالرغم ان موقف السيارات والحدائق الموجودة حولنا في مجموعة 60 عمارة 4 من اسوا مايمكن مش عارفة ازاي يدفعوا بعد الخراب اللي حل علي المنطقة بتاعتنا ونمرة الاستاذ هشام مش موجودة عشان ننضم ليه برده وهل ينفع نعمل توكيلين واحد للاستاذ منتصر الزيات وواحد للاستاذ ابراهيم خليل انا عوزة اعمل اي حاجة عشان امسح الجهاز من الوجود انا مستعدة اطبع ورق واوزعه ياريت تقولولي اعمل ايه انا طول ماانا ماشية في الجهاز اي منظر سئ يسئ للرحاب جمالي او حضاري بصوره علطول وعملت البوم خاص بالخراب اللي حل علي الرحاب انا حزينة جدا علي منظر الرحاب لو في حاجة ممكن اعملها ياريت تبلغوني وشكرا 

 شكرا جزيلا علي الرد انا بعت ايميل للاستاذ هشام وان شاء الله نشترك معاه

 النهاردة أنا سعيدة جدا واشعر بالفخر لاني قابلت نماذج من البشر في منتهي الاحترام والقوة وتقبلوا تحياتي جميعا الاستاذ /هشام علام ، الاستاذ أيمن مقلد ، الاستاذ طارق الوراقي ، الاستاذ عادل أمين ، الدكتور ايهاب ، والدكتورة فداء وباقي المجموعة الكريمة ، شعرت اليوم بالتفائل والقوة ومعني الحق والمطالبة بيه

الاستاذ هشام علام انا لم اكتشف فاجعة ابنكم الكريم الا الان لم انته للاسم الا الان عزائي ومواساتي لاسرتكم من كل قلبي ومهما كانت الكلمات فهي لن تخفف من حرقة قلوبكم الا شي واحد وهو ان ابنكم الكريم والشهداء الاربعة زملائه بين يدي الله يدي الرحمة والنقاء والصفاء وبقدر ماهو ابتلاء من الله فهو رحمة لهم من الله ربنا اراد ان يرحمهم من شرور الدنيا القادمة والله اعلم كان من الممكن ان يحدث لهم ادعو لهم من كل قلبي ان يدخلهم اوسع جناته ويجاورهم بالنبي واهل بيته السيدة فاطمة وعلي والحسن والحسين وكلكم علي علم الحسن والحسين احفاد الرسول ماتوا شهداء قتلوا بيد الظلم وابن الحسين كان رضيعا عندما قتل بسهم غادر ، ندعو الله ان يجاور شهدائنا الخمسة باهل النبي جميعا وان يرشفوا رشفة ماء من يدي نبينا وحبيبنا محمد واكرر مرة اخري سعادتي الشديدة بمقابلتي لكم ويجمعنا دائما علي خير 

أري ان مقوله المرأه هي نصف المجتمع فيه بعض الانتقاص من حق المرأه خصوصا هذه الأيام التي للأسف قل وندر من نطلق عليهم رجالا فالرجل موقف والموقف ان كان مشرفا من امرأه توصف بأنها وقفت وقفه راجل واليوم وقفت نساء من الرحاب جنبا الي جنب مع رجالها الشرفاء يحاولن بكل ما أوتين من قوه التمسك بالحقوق والوقوف وقفه مشرفه تشرف اي سيده رحابيه فقد وقفت كل من السيدات الفاضلات الدكتوره فداء حرم الدكتور ايهاب البسطويسي رئيس مجلس اداره جمعيه تطوير والمهندسه رشا ابراهيم شامخ والسيده حرم المهندس طارق الوراقي صاحب محلات بست باي وقفن نيابه عن سيدات الرحاب جميعهن  جنبا الي جنب مع من حضر من رجالها  للوقوف وقفه احتجاجيه علي سلالم دار القضاء العالي للمطالبه بالحد الأدني لحقوقنا كبني آدمين مطالبين بأداء واجبات محدده ودفع مبالغ معينه نري انه من ابسط حقوقنا كبشر أن نعرف ونفحص ونمحص أصول هذه المطالبات انطلاقا من مبدأ

don t claim your rights unless you perform your duties

نقولها لأنفسنا أولا قبل أن نقولها للمسئولين بمجموعه طلعت مصطفي - كل ما نريده هو الوضوح والشفافيه وأن يتولي من بيننا من يقوم بالمشاركه في مراقبه ومراجعه واتخاذ القرارت خصوصا فيما يتعلق بأوجه انفاق أموال وديعتنا فنحن عاقلون راشدون لم يتم الحجر علينا بعد 

المهم حضور السيدات الفاضلات للوقفه ومشاركتهم بالرأي العاقل الرشيد والفكر الواضح المستنير رفع هاماتنا جميعا لعنان السماء وأزال بعض الحرج عمن قصر في الحضور من الرجال حقيقه كل واحده منهن بميت راجل فالرجال مواقف يجب أن نجدهم حينما نحتاج اليهم فالرجل موقف ولكن السيدات الفاضلات أثبتن اليوم  أن المرأه ان وقفت موقف الرجل فهي وبحق جديره بكل احترام وتقدير وتستحق أن يقال عنها ده ست ولا ميت راجل  فشكرا لهن 

 السلام عليكم

انا  موفق علي ما اجمع عليه سكان المدينة بس المشكلة اني مقبم خارج مصر وبنزل اجازة شهر ممكن اعرف ايه الاجرات المطلوب علشان نعمل التوكيلات  وشكرا

حيث اننا دوله قانون ومؤسسات ونظرا لاستنفاذ كافه الطرق في الوصول لأبسط الحقوق فقد أجبرنا علي خوض غمار معركه قانونيه مع مجموعه طلعت مصطفي في ظل تسليط ضوء اعلامي علي القضيه حيث أنها تخص أكتر من 35000 اسره / خمسه وثلاثون ألف أسره / ولاجهاض أيه محاولات لاستغلال الفساد المستشري ومنع تحالف السلطه ورأس المال ضدنا - لأن السلطه في قضايا الرأي العام تؤثر السلامه وتفضل عدم التدخل حفظا لماء الوجه وسترا للعوره حتي نبدو أمام العالم علي اننا دوله ديمقراطيه

بناءا عليه أدعو كل شريف في المدينه يرغب في الانضمام الينا 

بالنسبه لبلاغ النائب العام  عمل توكيل باسم الاستاذ/ حسن أحمد خالد جلال أبو العينين وعنوانه 5 ش نابلس المهندسين