أقسام العقارات والمبوبة والدليل مازالوا تحت التطوير وسيتم الإنتهاء منهم قريباً بإذن الله

mamamira · 30/12/2007

كل شيئ فى الرحاب جميل ولكن ينقصها شيئ مهم جدا الا وهو الغاز الطبيعى

طبعا كلكم معايا فى الحكاية دى

وللا ايه

soma · 30/12/2007

طبعا معاكي وان شاء الله يدخل الغاز الطبيعي

بس أنا أعرف ان ده مش ممكن يتم قبل ماتتم نسبة الأشغال للرحاب 100% لأن الشقق الفاضية أو الغير كاملة التي لم تسلم الشركة مش حتقدر تدخلها الغاز

وبكده يبقى الحفر عمرة ماينتهي من المدينه

ادينا صابرين لغاية مايتم ان شاء الله على خير

ويارب تفضل الرحاب جميلة على طول فهي مدينتي الفاضلة

تحياتي

boudy · 30/12/2007

لا تعليق على إن كل حاجة فى الرحاب جميلةلإن فى سلبيات ساعات بتدايق الواحد لكن إحنا بنشوف الرحاب زى ما إحنا عايزين !!!! لكن أنا معاكى فى إن الرحاب ينقصها مشروع الغاز الطبيعى فعلا لإنه حيرحمنا من بهدله كتير وعلى فكرة أنا إمبارح رحت مستودع الغاز علشان أغير أمبوبة لقيت مواعيده من 9 صباحا حتى 4 عصرا ودى تقريبا مواعيد العمل الرسميه فى جميع الشركات والقطاع الخاص والعام فأصبح من سابع المستحيلات إنك تغير أمبوبه بنفسك لازم تسيبها للأمن وتسيب مع ثمنها بقشيش للأمن واللى حيجبها وسواق العربية وتلاقى ثنمن الأمبوبة الإجمالى بقى ضعفين ثمنها الحقيقى وبعد كل ده ممكن العربية بتاعة الأنبيب تطنش وماتجيش وتبقى حجه للستات إنها ماتطبخشى (مع كامل تقديرى للجنس الناعم) وكمان المشكله بتزيد أكتر بكتير لو كان السخان غاز ومحتاج تستحمى أو تتوضى فى الشتا وربنا معانا فى رحابنا الجميلة

ويارب السادة المسولين عنا يحسوا بالمشكلة ويتجاوبوا معانا ويسرعو دخول الغاز الطبيعى

مع تقديرى وإحترامى

soma · 30/12/2007

الحقيقة انا مش حاسة خالص بأي أزمة في الأنابيب الحكاية عاوزة شوية تنظيم

يعني ممكن يبقى في انبوبة استبن والأنبوبة بتيجي بالتليفون المطلوب بس انك تتصل الصبح أو قبلها بيوم وبصراحة عمرهم مااتأخروا علينا

يعني اللي عاوزة تطبخ ماعندهاش حجه يابودي.. خلي بالك

تحياتي

mamamira · 30/12/2007

يا سومة المشكلة دى بتقابل الموظفين بس لانى كنت بعانى منها لما كنت باشتغل

وعندك حق يا بودى فى ان فى سلبيات كتير لكن احنا بنحاول (نطنشها) وشكرا لكم

soma · 30/12/2007

أنا بس حبيت أتكلم عن تجربتي

وأنا على فكرة موظفة برضه

تحياتي

ابن عثمان · 30/12/2007

أنا بقى نفسي الغاز الطبيعي يدخل .. بس مش عشان مأساة الأنابيب .. وإنما عشان مأساة فاتورة الكهربا اللي بأدفعها كل شهر .. أصلنا - بعيد عنكم - عندنا بوتاجاز كهربا.

إن شاء الله هأبقى أعرضه في قسم المبوبة للإهداء أول ما الغاز يخش

بس أنا كنت سمعت من بعض العارفين ببواطن الأمور إنه في الطريق خلاص .. جاي من التجمع الخامس علينا .. والكلام ده عدى عليه حوالي سنة دلوقتي.

وربنا يسهل

mamamira · 31/12/2007

واحتمال برضه ياجماعة بعد سنة ونصف تانية نقول نفس الكلام

boudy · 31/12/2007

على فكرة أحد الجيران كان قال مره إن الغاز الطبيعى فى الطريق بس حتبقى تكلفة كل شقة سبعة ألاف جنيه أنا مش عارف هل التكلفه دى صح ولا لاء ممكن يفدنا فى الموضوع ده أخونا إبن عثمان لإنه من الواضح إنه (كوسه جمده) يعرف ناس كتير من المهمين اللى بيعرفوا بواطن الأمور وإحنا متشكرين مقدما لتعبك يا باشا

smsm · 02/01/2008

على فكره المشكله دى مش حاسين بيها قوى فى الرحاب لأن الأنابيب متوفره بإستمرار المشكله الحقيقيه من وجهة نظرى حاليا هى العاملين فى الدليفرى شكلهم بقى غريب قوى وكمان طايشين فى قيادتهم جدا

mamamira · 05/01/2008

السلام عليكم ورحمة الله وبركاته

ليه 7الاف جنيه انا اللى اعرفه ومتأكدة منه انهم لما بيدخلوا الغاز لشقة بياخدوا منها انابيب بعدد الوصلات المطلوبة يعنى مثلا لو انا عايزة وصلة للسخان واخرى للبوتاجاز بياخدوا انبوبتين

والكلام ده حصل فعلا مع اقارب كتير ليه رغم اختلاف الاحياء السكنية لكل منهم

وللا هية الرحاب اسبشيال يعنى وللا ايه

boudy · 05/01/2008

على فكرة قصة الأنابيب إنتهت من فترة ومبقوش يخدو أنابيب وبيخدو على الوصلة الواحدة 400جنية وده موجود فى مدينة نصر الحى العاشر قريب من الرحاب وعلى فكرة 7000جنية ثمن الحفر والترميم والمواسير أمام وداخل العمارة والعلم عند الله

mamamira · 05/01/2008

الله يطمنك

وشكرا

sfr57 · 06/05/2008 11:01:52 AM

كل المشاكل دى كان ممكن تلافيها لو كان فيه حاجة إسمها تخطيط

لو كانوا خططوا لدخول الغاز وهم بيخططوا المدينة كانت المصاريف قلت كتيييييييييييييييييييييييييير وكنا تلافينا الحفر والردم والتخريب (اللى متوقع لما يبدؤا التنفيذ)

وكان ممكن الشركة تعمل كل التوصيلات اللازمة حتى بدون غاز زى ما عملوا توصيلات المية وتوصيلات الكهرباء

لكن أين نحن من التخطيط ؟؟؟ أصل الظاهر إن التخطيط حرام !!

وعلى فكرة من حوالى 6 سنوات سألت مسؤول كبير بالشركة عن عدم توصيل الغاز من أول يوم فكان رده أن الفكرة كانت موجودة ولكن حدث خلاف بين شركة الرحاب وشركة الغاز على التكلفة ففضلوا عدم تنفيذها وتركها لتنفذ لاحقا وبأسعار أعلى وطبعا بحفر وردم وتخريب للشوارع !!!!

كلمة فى أذن المسؤولين ""التخطيط مش حرام والله،، أنا سألت المفتى وقال مش حرام ""

تحياتى لكل المشاركين فى المنتدى وبرضه للمسؤولين اللى قرروا أنهم ما يردوش على استفسارات وتساؤلات الملاك

Kanary · 01/06/2008 12:41:35 PM

أقسام العقارات والمبوبة والدليل مازالوا تحت التطوير وسيتم الإنتهاء منهم قريباً بإذن الله

الموضوع ده مهم جدا ولازم جهاز المدينه يجتهد ويبدا فى التنفيذ احنا مش اقل من مدينه الشروق اللى بدؤا فى التنفيذ