 كوبري 4.5 خلص يا رجاااااااالة
أد إيه كانت سعادتي وأنا راجع إمبارح الرحاب من طريق السويس، لما لقيت الكوبري خلص.
أخيراً عنق الزجاجة هينتهي، ومدة الرحلة من وإلى الرحاب هتقل.
يا ما انت كريم يا رب.
الحقيقة 4.5 ليها ذكريات كتيرة مع الواحد.
أفتكر من حوالي 4 سنين شفت بعض مهندسين من اسكندرية للانشاءات واقفين في 4.5 ومعاهم شوية خرايط، لما سألت واحد فيهم بعد كدة إيه الحكاية؟ قال لي إن هشام طلعت عايز يبني كوبري في الحتة دي - على حساب المجموعة - علشان يحل مشكلة الزحمة، قلتله والله كتر خيره، بعدها بشهر قابلته تاني، سألته إيه الأخبار؟ قال محافظ القاهرة رفض إن هشام طلعت يبني الكوبري على حسابه، وقال المحافظة هي اللي هتبنيها.
أفتكر برضه إن الشاعر هلال عنتر - أحد أعضاء جمعية تطوير - كتب في أحد أعداد مجلة "صوت الرحاب" قصيدة زجلية عن 4.5
وقال فيها:
بص. . . . . بص . . . . . بص . . . . . . . عالكيلو 4.5
استنى و خس النص فى الكيلو 4.5
حبيبى قابلنى فى الكيلو 4.5 .. .. .. .. .. و طلب يتقدم لى فى الكيلو 4.5
و فرحنا كان فى الويلى بعد 4.5 .. .. .. .. .. و قالى انه جايلى الساعه 4.5
يوميها اتصل بى م الكيلو 4.5 .. .. .. .. .. الساعه يا حبيبتى عدت عشره ونص
خلاص اتجوزى انتى و انا فى 4.5 .. .. .. .. .. مزنوق عمال بغنى بص بص بص
شكراً لكل اللي ساهموا في إنجاز الكوبري ده
|
