حدث في مسجد المرحلة الأولى بعد صلاة الجمعة

السلام عليكم يا رحابيين،

أنا متعود إني بأصلي الجمعة برّة الرحاب، وبرغم إني ما حضرتش الواقعة دي بنفسي، إلا إني واثق إن صاحبي اللي حكاهالي صادق وأمين وما زودش حاجة من عنده، وعموماً اللي حضرها من أعضاء المنتدى يقدر يأكدها أو ينفيها.

الحكاية إن بعد صلاة الجمعة على طول (أول ما الإمام ما سلّم) واحد من الناس قام وقف وقعد يتكلم بعلو صوته ويشتكي من الصيانة في الرحاب وإن بقاله 3 سنين بس ومع ذلك المواسير مش عارف حصل فيها إيه، وإننا لازم نتحرك ونعمل حاجة عشان السرقة اللي بتحصل دي .. الخ.

ولوحظ إن فيه ناس كتير تجاوبت معاه، وهات يا شكوى هما كمان.

أما صاحبي، فكان مستاء جداً من الموقف، لإن - حسب رأيه - المفروض الكلام ده ما يتقالش في الجامع، حتى الإمام نفسه قال كدة وطلب من الناس تخرج تتكلم برة في الموضوع ده.

اللي أنا عايز أقوله، واللي خلاني أكتب الموضوع في المنتدى: إيه اللي خلّى الشخص اللي اشتكى يلجأ لكدة؟ ليه وصل بيه الحال لإنه يتكلم في الجامع عن الموضوع ده؟ هل لجأ للطرق التقليدية وجاله إحباط ويأس وحس إن ما فيش فايدة؟ ولا هو تسرّع؟ وهل في رأيكم اللي عمله ده صح ولا غلط؟ هل الجامع للصلاة وبس ولا المفروض نناقش فيه مشاكلنا برضه؟ وهل الأسلوب اللي عمله كان موفّق بدليل استجابة الناس له؟ ولا كان المفروض يعمل إيه؟

أفيدونا أفادكم الله