أنا هأتكلم النهاردة عن حاجة مش عاجباني في الرحاب، طبعاً اللي عاجبني كتير جداً وهو ظاهر وواضح وضوح الشمس لكل الناس فمش محتاج أتكلم عنه كتير، ومع ذلك هأبقى أكتب مرة عن أكتر الحاجات الجميلة اللي عاجباني، لكن أنا مخصص موضوع النهاردة للكلام عن حاجة من أهم الحاجات اللي مضايقاني في الرحاب .. وهي المساجد.
وقبل ما حد يفهمني غلط ويتهمني، أرجو إنه يقرا الكلام للآخر .
أنا شايف إن الرحاب فيها مساجد، بسم الله ما شاء الله، من أجمل المساجد اللي موجودة في القاهرة، كعمارة خارجية وداخلية، كتأثيث، كمكيفات، ودي نعمة كبيرة جداً لازم نحمد ربنا عليها، ونشكر الناس اللي عملوها، فالحديث بيقول: "من لم يشكر الناس، لم يشكر الله".
لكن للأسف الهاردوير الجميل ده، ناقصه السوفتوير المناسب.
يعني إيه؟
يعني يا جماعة الخير، خطبة الجمعة حالتها صعبة خالص، أنا بأبقى قاعد هأفرقع من ضعفها سواء شكلاً أو مضموناً، دا غير كمية الأخطاء اللغوية الرهيبة اللي المفروض ما تطلعش من طالب ثانوي فما بالك بخطيب؟
يا جماعة صلاة الجمعة دي هي الغسيل الأسبوعي بتاعنا، الحد الأدنى من الجرعة الإيمانية اللي المفروض المسلم ياخدها كل أسبوع، لما تبقى دي حالتها، نروح فين؟
أنا مش قادر أحدد المشكلة فين بالضبط؟ هل جهاز المدينة مش لاقي خطباء كويسين؟ طب اشمعنى مسجد النادي بيستضيف من حين لآخر خطباء مشهورين؟ الموضوع فعلاً مؤرقني، لإن مافيش جامع فيكي يا رحاب تتسمع خطبته للأسف. والبديل إني عشان أسمع خطبة كويسة لازم أصلي برّة الرحاب.
وهو دا الحل الوحيد قدامي دلوقتي، وهو ده السبب في كتابتي للموضوع النهاردة.
أنا عايز أسأل إخواني الرحابيين، هل في حد منكم يعرف طريق مساجد قريبة من الرحاب في التجمع مثلاً فيها خطب كويسة بدل ما نطخ مشوار لمدينة نصر أو مصر الجديدة؟
دي حاجة ..
الحاجة التانية: مافيش حد عنده حل جذري للمشكلة دي؟ يعني مثلاً ما نقدرش نعمل حاجة أو نقدم طلب جماعي للجهاز مثلاً علشان يجيب خطباء أفضل؟
على فكرة .. علشان بس ما أبقاش ظلمت الناس، فيه واحد أو اتنين بالكتير من الخطباء خطبهم كويسة، بس الأغلبية لأ .. وده طبعاً رأيي الشخصي.
وفي انتظار إجابتكم
ويجعلو عامر
مساجد الرحاب .. ليه الحلو ما يكملش ؟؟؟ 
