جزاكم الله خير على هذا الموضوع

 

أن مثل هذه الموضوعات تتم من خلال الجمعيات الخيرية

 

ولقد تم تفعيل هذا الاقتراح منذ فترة بالمدينة من خلال جمعية جنات الخلود          ( والتى لها مقر فى المبنى الادارى بالرحاب )

 

متشكرين والله يا أستاذ محمد على سرعة الرد

 

وجميل إن الموضوع دا اتنظم قبل كدة، ودي حاجة أول مرة أعرفها الحقيقة.

 

بس لو سمحت لي، فيه اختلاف شوية في الفكرة اللي أنا بأعرضها.

 

بيتهيألي إن الجمعية الخيرية، حتى وإن كان ليها مقر في المبنى الإداري، مش هيبقى عندها المكان الكافي لتخزين الملابس بشكل دائم.

 

طبعاً أنا هأنتهز الفرصة وأروح أتعرف عليهم، وأسألهم بنفسي، بس متخيل إن أكيد المكان عندهم محدود جداً.

 

هما ممكن يكون في إمكانياتهم تنظيم الموضوع بشكل موسمي، كل كام شهر، ولكن مش بشكل دائم زي ما أنا بأقترح.

 

أنا نفسي يبقى في الرحاب كونتينرز في نقط ثابتة معروفة للجميع - زي ما هو حاصل في الدول المتقدمة - بحيث أي حد في أي وقت ممكن يروح يرمي الكيس بتاع الهدوم فيه. والموضوع مش محتاج لعمالة إطلاقاً (أنا عارف إن الجهاز بيعاني من نقص في العمالة)، كل الموضوع كونتينر متوسط الحجم له شباك ممكن يتزق من خلال كيس الهدوم لداخل الكونتينر بس مش ممكن العكس، يعني مش ممكن حد يسحب الأكياس من الداخل للخارج (لو الموضوع تطور، ممكن أوري حضرتك صور للكونتينر دا بيتعمل إزاي في ألمانيا مثلاً) المهم إنه مش مخزن ومحتاج أمين مخزن ومواعيد قفل وفتح وخلافه.

 

وبيكون متعلق على الكونتينر جدول بمواعيد تفريغه، في المواعيد دي بتيجي أي جمعية خيرية من خارج أو داخل الرحاب وتفضيه.

 

بالطريقة دي هنسهل على الناس التخلص من حاجاتهم القديمة، وكمان هنسهل عليهم عمل الخير، وهناخد جميعاً ثواب كبير إن شاء الله.

 

وزي ما قلت مرة قبل كدة، أنا واثق إن الرحاب فيها هدوم قديمة تكفّي كل أحياء القاهرة العشوائية.

 

ونبقى بكدة حققنا معنى التكافل اللي بتنادي بيه كل الأديان والقوانين الوضعية كمان

 

ومتأسف ع الإطالة

 فكرة ممتازة أخى ابن عثمان وسأقوم بعرضها على الجمعية حيث أن جمعية جنات الخلود قد تتبنى الفكرة و تتولى بناء الكونتينر ويبقى فقط إذن الجهاز وتحديد أماكن وضعه داخل المدينة والذى أعتقد أن جهاز المدينة قد يمانع به.

 

أما التخزين فأعتقد أن جنات الخلود لها أماكن أخرى خارج الرحاب حيث يمكن إستخدامها فى التخزين  

 أعتذر عن الخطأفى ردى السابق.

أنا قصدت أن الجهاز لن يمانع فى وضع الكونتينر داخل المدينة

 

 

الصورة بتوضح اتنين كونتينر جنب بعض.

 

اسمحولي أشرح طريقة الاستعمال علشان يتفهم إزاي مش ممكن إن الهدوم اللي جوّاه حد يعرف يسرقها، وبالتالي مش محتاجين خالص لحارس مخصوص على كل كونتينر

 

الكونتينر الواحد بيتكون من درج علوي قلاّب وباب سفلي عادي خالص مقفول بقفل

 

بييجي المتبرع يحط كيس الهدوم أو الجزم اللي معاه في الدرج (بصو ع الصورة اللي ع الشمال هتلاقوا الدرج مفتوح) وبعدين يقوم يحرك الدرج القلاب من خلال رفع المقبض لفوق فياخد الكيس ويرميه جوّه الكونتينر (زي ما هو متوضح في الصورة اللي ع اليمين)

 

الصورة كمان بتوضح أد إيه إن الحجم معقول (يعني هو بالفعل أصغر من أي كونتينر من بتوع الزبالة اللي محطوطين في كل مجموعة ومكتوب عليهم حماية البيئة)

 

وآدي شكل تاني لتصميم مشابه:

 

 

ويا رب الجهاز يقتنع بالفكرة، عشان ناخد كلنا ثوابها إن شاء الله

 

 

السلام عليكم ورحمة اللة وبركاتة

 

على فكرة فية جمعية اسمها رسالة بتكلمها وتحدد معاك ميعاد وتيجى لغاية عندك

و تاخد الحاجات الي عايز تتبرع بيها وتاخد ايصال والجمعية دى معروفة وليها نشاطات كتيره جدا فى الخير وفروعها فى كل مكان

 مين ما يعرفش جمعية رسالة ؟

 

ربنا يكتر من أمثالهم

 

بس هي الفكرة إننا مش عايزينهم يطخو المشوار وييجو الرحاب علشان واحد ولا اتنين بس، إحنا عايزين الحاجة تتجمع في مكان مركزي وييجوا هما مرة واحدة في الشهر يلموها. وبكدة المشوار يستاهل.

 

وشكراً ليك