تقريباً مافيش شقة أو فيلا في الرحاب إلا وفيها تكييف واحد على الأقل، وعلى كل شكل ولون، وما بيخلاش الأمر للاسف من إن اللي بيركب المكيف لأول مرة يتقب له تقب هنا ولا هنا عشان يعدي الكابلات، والنتيجة بتكون تشويه لمنظر العمارة أو الفيلا من بره.

 

طب ليه نبوز الطبخة الحلوة عشان شوية ملح؟

 

ليه ما يتعملش تكييف مركزي من الأول ..  

طبعاً اللي فات مات خلاص، بس إحنا بنتكلم عن اللي جاي .. نص الرحاب بالكامل لسة ما تبناش

 

ولازم يكون تبريد وتدفئة في نفس الوقت، لإن الشتا في الرحاب صعب شويتين، خاصة وإن للأسف عزل الشبابيك وأبواب البلكونات مش دايماً بيكون 100%.

 

عجبني قوي المهندسين اللي صمموا عمارات المرحلة الرابعة لما حطوا مواسير رفيعة عشان خراطيم المكيفات تصب فيها بدل ما تتساب تنقط ع الرايح والجاي، طب ما بدام فيه وعي بأدق التفاصيل كدة؟ ما تشوفوا بآ موضوع التكييف المركزي دا اللي هيريح الناس كلها.

 

 

كمان أنا فاكر إن قبل ما مشروع مدينتي يتفتح، شركة طلعت مصطفى عملت استبيانات رأي جمعت فيها آراء العملاء، ولما لقت إن مثلاً الكل أجمع على إن الإيسانسيرات دي حاجة أساسية ومطلوبة، اتعممت في كل المشروع.

 

ده معناه إن الشركة بتشوف الناس عايزة إيه وبتعمله، وهو ده الصح.

 

أنا بقى متأكد إن الشركة لو عملت استبيان رأي دلوقتي على موضوع التكييف المركزي هتلاقي أكتر من 90% من الناس عايزاه.

 

سؤالي للجهاز

 

هل فيه مشاكل تقنية أو اقتصادية أو حتى إدارية تمنع عمل الموضوع دا؟ ولا مافيش مشاكل وكل الموضوع إنه ما خطرش على بال المصممين المعماريين قبل كدة؟

 

شكراً مقدماً على الرد