أقسام العقارات والمبوبة والدليل مازالوا تحت التطوير وسيتم الإنتهاء منهم قريباً بإذن الله

Trifle · 29/04/2008 1:30:10 PM

بئا انزل بعربية امي اشتري فينو و لبن رخصتي تتسحب عشان مش معايا رخصة العربية؟

الرحاب بقت زباااااااااااااااااااااااااااااااااااااااااااااااااااااالة و شكل مدينتي ان شاء الله هتبئا ازبل

هتقولو باشتم الرحاب....ايوة

شفت رخصة السواقة خلاص انما تسحبها مني ليه؟؟؟؟!!!!

أنا لو واصل شوية كنت قطعت الوصل ورميته في وشه

امال لو واحد نزل بالترنج يشتري حاجة من السوق و ناسي محفظتو في البيت هيشدو ع القسم ولا ايه؟

يا مدينة الرحاب الرحمة!!!! السوق بعيد و بنحتاج عربية مش معقول كده

للأسف مش هاعرف اشتم اكثر من كده عشان رحابي مش بتاعت شتايم....كفاية اللي قلناه

شوية شوية بئا نزلولنا خمسة جنيه زبالة على فاتورة الكهرباء و قولولنا دي حاجة بتاعت الحكومة

ماهو لو الرحاب هتبئا جواها زي براها يبئا ايه لزمة اني اعيش فيها؟؟؟؟؟!!!

lily · 29/04/2008 2:16:03 PM

ده كله علشان اخدت اجازة .. خد بالك انت بتضرب في ايه؟؟؟

رحابي · 29/04/2008 7:18:42 PM

عزيزي ترايفل

أولاً:

ما هكذا يكون النقد البناء والمحترم الذي تعودناه في منتدانا، ومهما كنت تشعر بالغبن وبالظلم، فليس هذا مبرراً لاستخدام مثل هذه الألفاظ.

ثانياً:

إذا ناقشنا الأمر بتجرد وحيادية، أجدني أختلف معك تماماً في كل ما ذهبت إليه

فمن حق أي شرطي مرور أن يمارس دوره في أي مكان، ولا فرق هنا بين داخل الرحاب وخارجها
ثم من قال لك أن جهاز المدينة مسئول عن تصرفات رجال المرور التابعين لقسم الشرطة؟
لا يمنعك أحد من الذهاب للسوق بالسيارة، لكني لا أفهم .. ما الذي يمنع وجود الرخصة بداخل السيارة؟ أنت ذكرت أن السيارة مملوكة للوالدة، حسناً، ولكنك تستخدمها معها، فلماذا لا توضع الرخصة في مكان آمن وثابت بداخل السيارة، حتى يجدها كل من يستخدم السيارة؟

ثالثاً:

استفزني جداً حديثك عن تقطيع الوصل .. الخ

يا أخي الكريم .. تذكر حديث المصطفى صلى الله عليه وسلم: إنما أهلك من كان قبلكم، أنهم كانوا إذا سرق فيهم الشريف تركوه ..

هل تريدهم أن يتركوك لإنك "واصل" ؟؟؟

هل ترضى لنفسك أن تكون فوق القانون ؟؟؟

العدالة هي أساس بناء أي مجتمع، وكلنا ننتقد هذه التصرفات السخيفة في بلادنا، ثم تأتي أنت وتريد ترسيخ نفس المبدأ الفاسد.

أنا أفهم أنك غاضب لأن تصرف الشرطي - من وجهة نظرك - كان غير مبالغاً فيه،

لكن غضبك هذا لا يعفيك أبداً من مسئولية انتقاء كلماتك.

"وما من كاتب إلا سيفنى، ويبقي الدهر ما كتبت يداه

فلا تكتب يمينك غير شيء، يسرك في القيامة أن تراه"

لن أقوم بمسح موضوعك، لكنني أنتظر اعتذارك عن استخدام تلك الألفاظ غير اللائقة

في أمان الله

Trifle · 29/04/2008 11:46:17 PM

رحابي...

أعتذر عن كل ما صدر مني في هذا الموضوع و لكني أعتذر فقط لأني قلته في غير مكانه و لكني لست ندماناً على قوله

أما عن الشرطي فأنا لا اقول له الا يمارس عمله و لكن يجب أن تكون هناك كياسة

أبويا كان بيستخدم العربية لأن عربيتو عملت حادث و الرخصة كانت معاه و هو راح الشغل

في حاجة اسمها ظروف...ولا ايه؟

و بعدين هو عامل لجنة عشان يشوف رخص السواقة....يسحب رخصة العربية لما يقوللي بطاقتك و يعرف اني مجرم و هربان بالعربية

يا رجل ده مافيش في الرحاب اشارة مرور واحدة

انت هنا في الرحاب خايف من الحوادث و الخناقات طب شفت الرخصة ايه لازمة انك تقوللي رخصة العربية؟؟؟ بعد ما تتأكد كمان اني ساكن في الرحاب؟

و بعدين ده حتى طلعلي وصل في ساعتها مش مثلاً روح هات الرخصة و تعالى....لا بدون تفاهم

ثم يا أخ رحابي أنا أقبل على نفسي اني اكون واصل لأن للأسف "الصح في وسط الغلط غلط و الغلط في وسط الغلط صح"

طالما في ناس بتستغل شغلها استغلال سيء فأنا من حقي استخدم اي وسيلة اراها مناسبة للرد على هذه الاساءة

مرة اخرى اعتذر لرد فعلي على المنتدى و لكني لا اعتذر لطريقة رد الفعل

و المثير للاهتمام في الموضوع ان رحابي بئا نافذتي فعلاً على الرحاب لأن اول حاجة عملتها لما رجعت اني نشرت الموضوع على رحابي و حسيت اني لي اهل و جيران ممكن اشكيلهم!!

و لو كان جهاز المدينة زعل فأنا مرة أخرى أعتذر عن رد فعلي أمامه و لكن لا أعتذر عن طريقة رد الفعل

يا اخواني انا نفسي الرحاب تفضل مجتمع جميل و ماتبئاش نسخة مصغرة من مصر!!!!!!!!!!!!!!!!!!!!!!!

ramy · 30/04/2008 6:52:49 AM

ايه ده يا ترايفل؟

كل ده علشان رخصة مسحوبة. وعامل هيصة وحكاية . معلش يا صديقي تعيش وتاخد غيرها

وبعدين أنا أول مرة أعرف إن فيه مرور في مصر. دي معلومه جديدة أشكرك على إضافتها للمنتدى

وممكن أكتها في موضوع حدث في مثل هذا اليوم

Trifle · 30/04/2008 12:11:51 PM

بتتنأور عليا يا عم رامي؟ ماشي يا سيدي عموماً بكرة تستلم شقتك ان شاء الله و تيجي تعيش في الرحاب و بعدين انا مش زعلان ع الرخصة انا زعلان ع اللي هيجرا في الظابط من ورا راسي

انا مش هاضربه...انا هافهمه غلطه بس...

TareK.Atef · 03/05/2008 8:14:18 PM

نشكر المرور على أداء وظيفته , وأرجو زيادة اللجان لمنع الصغار من قيادة السيارات بدون رخصة قيادة و "الترويش" بها أمام المولات , ولا للوسطة , شكرا

Trifle · 03/05/2008 12:10:12 AM

على الله بس رخصتك ماتتسحبش

Care for what you wish you may regret it, Care for what you wish you might just get it

Trifle · 03/05/2008 12:13:36 AM

باقولك يا رامي....انت هاتستلم شقتك امتا و جاي الرحاب امتا عشان عاوزين نشوف معاليك يافندم!

Amel · 03/05/2008 1:14:24 AM

في البداية لم أكن أرغب في التعليق لأني وجدت فيما قاله رحابي الكفاية فقد كان حديثه موضوعيا وشاملا لكافة الجوانب

لكن ترايفل للأسف مثل كثيرين من أبناء جيله ينظر للحياة بمنظار انت عارف أنا مين؟ أو بالأصح انت عارف أنا ابن مين؟

للأسف لن نتحرك خطوة واحدة للأمام طالما كان هذا هو المنطق السائد

"و بعدين ده حتى طلعلي وصل في ساعتها مش مثلاً روح هات الرخصة و تعالى....لا بدون تفاهم""

بالذمة يا ترايفل عايز الضابط ينتظر لغاية ما تروح تجيب الرخصة وتيجي؟؟ كل ده عشان ساكن في الرحاب؟ يعني المفروض من وجهة نظرك تكون فيه قوانين مرور لداخل المدينة وقوانين تانية تطبق خارج المدينة ؟؟؟

منطق غريب وغير مقبول كمان والسؤال الآن هل لو كنت عايش برة مصر وحصل ده كان حا يبقى رد فعلك هو نفس رد الفعل ده ولا كنت حا تقول ناس بتطبق القوانين على الجميع وبتعمل شغلها؟؟

خليك صريح وقول الحق

كان الأسهل طبعا لما عرفت ان الرخصة مش موجودة انك تطلب الي انت عايزه ديليفري أو تاخد الباص أو تتصل بتاكسي الرحاب وتقضي بيه مشوارك وهو ده الي أي حد عارف ان الصح صح والغلط غلط بيعمله

Trifle · 04/05/2008 12:14:38 AM

أولاً أتوجه بالشكر لادارة المنتدى و النادي الأهلي

ثانياً يا أمل...يا طارق...يا رامي...يا رحابي

انا ماعنديش واسطة نهااااااااااااااااااااائي انا باقول هل المفروض يكون عندي واسطة دي نقطة

النقطة التانية...ظابط...حكم دار...أومباشا...أمين شرطة هو ماتخلقش عشان ياخد مخالفات فقط! و شغله مش بس يعقد على الناس حياتها...المفروض يكون في نوع من أنواع حسن المعاملة...

النقطة الثالثة يا اخواني ان مش شرط حد يظلمك عشان تحس بالظلم...أكيد يا أمل أو يا رامي أو يا رحابي حسيتو بالظلم من غير ما يكون اللي قدامك ظلمك ظلم فعلي...

و رداً عليكي يا أمل أنا فعلاً كنت عايش بره في أمريكا و تحديداً في بافلو نيو يورك و دي قريبة جداً من حدود كندا...أبويا نزل بالبيجاما يوصل أخويا المدرسة و بالغلط طلع كوبري اخره الناحية التانية حدود كندا...أبويا ولا معاه باسبور ولا معاه أي حاجة ركن العربية و نزل للظابط و قال له انا كنت باوصل ابني المدرسة و طلعت الكوبري بالغلط...في مشكلة لو لفيت و رجعت تاني نيو يورك؟ الراجل فتح السكة و رجع ابويا تاني

قصة تانية بئا طالما مدافع رمضان اتفتحت في وشي....كنت راكب تاكسي مع سواق و وقفت في الكمين اللي بعد أكاديمية مبارك ناحية التجمع الأول...السواق رخصة العربية و السواقة منتهية...الأمين وقفه و قال له اركن على جنب طلع خمسة جنيه و ادهالو في ايده...كان رد الأمين "كده ماينفعش" انا فرحت افتكرته صاحب مبدأ لقيت السواق بيقول له "والله ده تمن المشوار اللي معايا و مش هاينفع ادفع اكثر من كده...مشي حالك"

انا مش باقول حاجة تطبق في الرحاب و حاجة تانية بره و لو ان ان جيتي للحق المفروض كده

كوك دور جوا الرحاب بـ 17.50 السوبر كرانشي...بره الرحاب بـ 16 و قيسي على كده حاجات تانية كثير بالاضافة طبعاً لأسعار الشقق اللي بتنزل النص أو التلات اربع لو طلعتي خطوة واحدة بره الرحاب.

و ده كله لي علاقة ببعضه...لأن الرحاب اسمها "طفره" أو "حال شاذة" في كل شيء

في مدن عمرانية جديدة كثير و أحلى من الرحاب و لكن الرحاب هي اللي نجحت

ده طلعت مصطفى كان عاوز في مجلس الشعب يعمل استثناء لمدينة الرحاب من قانون الضرائب العقارية اللي بالمناسبة على أطخن شقة في الرحاب هيكون في حدود 2000 جنيه سنوياً لو مقفولة و ماحدش ساكن فيها أو مؤجرة!

مين وقف قصاده و غلطه في الخطوة دي؟ ماحدش...عشان ماحدش اتضرر من الخطوة دي بالعكس ده كان هيعفي مستثمرين كثير من دفع الفلوس دي

و بالمناسبة يا أمل...ساعات الجيل الصغير بيشوف اللي الجيل الكبير مايقدرش يشوفو

و يا أخ طارق الشباب التعبانة اللي بتلف بالعربية و تروش قدام المول في يوم من الايام هاتكبر زي مانت كبرت...ولا ايه؟

شكراً لسعة الصدر و طبعاً اللي مقتنع بحاجة عمره ما بيغيرها

Trifle · 04/05/2008 12:17:46 AM

طلعت مصطفى كان عاوز يستثني المدن العمرانية الخاصة من القانون و ليست الرحاب فقط!

soma · 15/05/2008 9:09:26 AM

soma · 15/05/2008 9:14:41 AM

طبعا انا أول مرة أشوف الموضوع

وكفايه اللي اتقال لك من الأعضاء

تحياتي لآرائهم الجيده.. وانا مع رحابي قلبا وقالبا فيما قال بل بالعكس انا كنت اتوقع حذف الموضوع اصلا عشان التجاوزات اللي فيه..

لكن واضح ان المنتدى ده فيه حرية كنا نفتقدها في باقي المنتديات

انا حكتب الرد ده وياريت يكون آخر رد في الموضوع

واعتذر بالنيابه عن ترايفل ياجماعة

ترايفل....behave!!!

تحياتي للجميع

Amel · 15/05/2008 12:17:48 PM

معلش يا سوما أنا عايزة أضيف حاجة بسيطة وهي أني مبسوطة جدا أن ترايفل لما لقى نفسه متضايق دخل المنتدى وكتب وعبر اللي جواه

جميل طبعا إننا نشعر إن المنتدى ده بتاعنا وبنحب نكتب فيه اللي إحنا عايزينه وجميل كمان انه بيتمتع بمساحة الحرية الجميلة الي قلتي عليها

والأجمل إننا نسمع لترايفل وغيره عشان نقدر نعلق

لو كان الكلام فضل جواه ما كناش حانعرف حاجة ولا حا نقدر نقوله صح أو غلط

بغض النظر طبعا هو حا يقتنع ولا لأ

لكن من ناحيتنا لازم نحاول نسمع كويس ونوجه صح

ramy · 17/05/2008 4:10:27 PM

يا جماعة أنا بعتذر بالنيابة عن ترايفل لأني عارفه هو شاب مهذب وابن ناس ومش بتاع لف وترويش امام المولات

بس كل الحكاية انه كان مخنوق وحب يفضض معانا لأننا كلنا أهل مش أكتر زي ما أي حد يتكلم مع أسرته

وعموما يا ترايفل أنا جاي مصر ان شاء الله في أول يوليو وإن شاء الله حكلمك في التليفون

وتحياتي للجميع