أولا اعتذر لابن عثمان لاستعارة عبارة "ليه الحلو ما يكملش ؟" لأنى الحقيقة لقيتها مناسبة جدا للموضوع لانها تشير باختصار ان الموضوع حلو بس حاجة صغيرة مخلياه غير ذلك (كلكوا طبعا عارفين موضوع الطبخة وشوية الملح وهو مثل قديم من ايام جدتى ايام ما الستات كانت بتطبخ فى البيت). فى هذه الحالة الحلو هو اتوبيس الرحاب و المعروف بباص الرحاب حيث جرى العرف على اطلاق كلمة اتوبيس على الاتوبيس الاحمر بتاع هيئة المواصلات ابو ربع جنيه ولكن اذا كان الاتوبيس محترم و شيك وممنوع فيه الشعبطة فيطلق عليه باص، مع ان الكلمتين بنفس المعنى لكن واحدة اصلها فرنسى و الثانية اصلها انجليزى !!!

 

المهم اتوبيس الرحاب ده فكرة عبقرية، وأحد عوامل نجاح المدينة، وشوية الملح فى هذه الحالة التكييف، النهاردة كنت رايح البنك فى روكسى لقيت ان استخدام ال "باص" افضل بكثير من فكرة السواقة لحد روكسى و الركن وخلافه، المشكلة انى وانا راجع الجو كان حرر شوية (ايوة فى أكتوبر)، و لما سألت قالولى ان كل اتوبيسات الرحاب غير مكيفة، طب امال الناس بتعمل ايه فى أغسطس !!! مش قادر اصدق ان الحكومة دلوقت عملت "اتوبيس" مكيف واحنا ال "باص" بتاعنا مش مكيف.

 

اكتشفت ايضا حاجة تانية، ان التذكرة للسكان ارخص من العاملين، كخدمة يعنى للسكان او الملاك، مع ان الملاك هم اللى بيدفعوا للعاملين مواصلاتهم، يعنى انارأيي ان أغلب الملاك بيستخدموا الاتوبيس جايز مرة او مرتين فى الشهر لنفسهم، لكن انا مثلا ادفع مواصلات لعاملة النظافة اللى بتنظف البيت 10 مرات فى الشهر !!! وفيه ناس بتدفع أكثر، يعنى على الاقل بادفع 10 جنيه كل شهر فرق تذكرة العمال من السكان !!

 

مستنى أسمع رأيكم فى الموضوع ده ولى رأى فى النادى عايز اقوله بس مستنى اسمع ردودكم الاول.