أقسام العقارات والمبوبة والدليل مازالوا تحت التطوير وسيتم الإنتهاء منهم قريباً بإذن الله

ميرو · 12/10/2008 2:07:28 AM

السلام عليكم ورحمة الله

انا عاوزة اعرف ياترى المعيشة فى مدينة الرحاب اخبارها ايه انا حاجزة فى المرحلة الخامسة والمفروض الاستلام فى نصف العام القادم بأذن الله يا ترى ايه النصائح وايه الخبرات اللى ممكن تذودونى بيها لأنى تخوفت جدا بعد ما قرأت المشاكل الموجودة على المنتدى من

وجود سرقات ــ وحيوانات غير أليفة ـــ وجهاز مدينة مش متعاون وغير قائم على راحة السكان وعدم توافر الأمان ــ هذا بالإضافة لرسوم البوابات يعنى الواحد هايسكن وماحدش من اهله او اصدقائه هايجى يزوره وكمان فيه نقطة قرأتها هى ان فيه ــــ فلوس صيانة بتدفع غير اللى هايندفع عند الأستلام كوديعة

ياريت تردوا لى على كل الأستفسارات اللى قلقانى وبتخلينى افكر جديا فى الإنسحاب من الحجز لأن شقاء العمر فى الغربة مش عاوزاه يضيع فى حلم كل سنة بنحلمة كعائلة

ولكم جزيل الشكر لتعاونكم

emad · 13/10/2008 9:05:08 AM

سيدتي لا اتفق معك في مستوى قلقك عن المعيشة في الرحاب بالرغم من أنني لست من سكان الرحاب حتي الأن وموعد أستلامي في 2010 ان شاء الله

المثل يقول الحلو عمره ما يكمل و لكن بالمقارنه باي منطقة سكنية اخري الرحاب في رأيي حلم جميل و نقلة حضارية بالرغم من وجود بعض السلبيات ولكن قارني بمدينة نصر أو حتي أرقي مناطق مصر الجديدة من حيث النظافة و جمال الحدائق و الخضرة الدائمة و باقي الخدمات و النادي وأماكن أنتظار السيارات و الزحام و أخيرا و ليس أخرا" مستوي القاطنين الثقافى و الحضاري كمثال السادة و السيدات أعضاء المنتدي فلا مقارنة ..... الرحاب يكسب

تمسكي يا سيدتي بالحجز و أنصحك أن تفعلي مثلي فانا و زوجتي و أولادي نحرص على قضاء يوم الأجازة الأسبو عية بالرحاب حتي يحين موعد الأستلام أن شاء الله

طبعا رأيى هو رأي شخص يمضي يوم واحد بالأسبوع بالمدينة و السادة الأفاضل أعضاء المنتدي خاصة المقيمين منهم اقامة دائمة أقدر مني بالطبع علي الأفادة و شرح الواقع و أجابة تسأولاتك بشكل أوقع............... و تحياتي

boudy · 13/10/2008 9:24:56 AM

أنا أقيم فى الرحاب منذ فترة كبيرة وكانت الخدمات أحسن من كده بكتير وكان فى إلتزام أكثر لأن اجهاز المدينة كان عايز يثبت نفسة ويثبت وجوده للسكان وللمهندس هشام طلعت مصطفى لكن الوضع اللى إحنا فيه دلوقتى مش كويس يعنى إحنا عايشين على السمعه السابقه لمدينة الرحاب والمشاكل اللى قريتيها فى المنتدى كلها حقيقه وليست أكاذيب أو خداع ولكن نأمل فى تغير الوضع وذلك بحلول كثيرة مثل تضرر أحد الساده المسؤلين الكبار فى الدوله من ساكنى الرحاب وساعتها حتلاقى تدخل من جهات كبير فى البلد أو ربنا يرحمنه بتغير إدارة جهاز المدينة أو تشكيل مجلس لإدارة الرحاب من السكان أو أى حل من عند ربنا (رحمة واسعه) لكن فى الأول لازم نكون جيران كويسين مع بعض علشان ربنا يساعدنا (إن الله لايغير ما بقوم حتى يغيروا ما بأنفسهم) أنا أحب أبسط لك الأمور شويه مشكلة الحيوانات الغير الأليفة موقع الرحاب لازال فى الصحراء علشان كده من الطبيعى جدا إنك تلاقى ثعالب أو ثعابين أو ما شابه وده حيختفى مع مرور الوقت وكل ما العمار يدخل أكتر وعلى فكرة الثعالب جبانه جدا ولا تستطيع مواجة الإنسان أما الثعابين أحب أوضح إن مكان الرحاب على خريطة القاهرة فى مكان لاتتواجد فيه ثعابين من النوع الخطر أو القاتل ولا حتى الحجم الكبير اللى هو سام وسريع القتل ولكن التأتير بطيئ جدا حتى أنه ممكن يرفع درجة حرارة الجسم فقط والأمصال الثعابين والعقارب متوفرة فى الصيدليات الكبيرة زى التيتانوس وده مش تقليل من حجم المشكله ولكن بنحط المشكله فى حجمها الصح علشان ما يحصلش ذعر ورعب بلا داعى وأما إسلوب الحماية منه بتواجد نبات الشيح على منافذ الدخول (أبواب وشبابيك) الشقه أو الفيلا وده متواجد عند أى عطار أو محل عطارة وعلى فكرة مش لازم زراعة نبات الشيح يكفى تواجد جزء منه فى سرة قماش بجوار المنافذ أو تحت مشاية عتب الباب أو ماشابه أما المشكله الأكثر خطورة على أطفالنا وعلينا هى الكلاب بتاعت الجيران وديه زى ما قولت لو كل واحد راعى جارة ولبس الكلب بتاعة كمامه على بقه زى ما قوانين الرحاب بتقول + شوية مجهود من الأدارة لمقاومة الكلاب الضاله ياللى موجوده فى الشارع يبقى كده إنشاء الله مفيش حد حيتأذى أما بانسبه للسرقات أى مكان فى مصر ممكن يكون فيه سرقه لكن هى حتقل جدا إنشاء الله بعد إنتهاء إنشاء مشروع الرحاب بالكامل وذلك لأن مش حيبقى فيه عمال كتير داخله وخارجة طوال اليوم والموضوع ده مسألت وقت وإنشاء الله وحيقل كتير جدا أما موضوع فلوس الصيانه فعلا فيه فلوس صيانة غير الوديعة ومتغيرة القيمة كل ستة أشهر بمعدل متوسط من 500-600 جنية للشقة 100 متر كل ستة شهور لأن الأرباح السنوية لإجمالى ودايع السكان لا تكفى للصرف على المدينة بجميع مشتملتها زى الصيانة والزراعة والأمن وأجور العاملين وأجور جهاز المدينة وده طبعا السبب المعلن لكن أعتقد إن الدهشه من المبالغ الكبيرة دي حتختفي لو كان فى خطة عمل للصيانة متدرجة ومعلنة وكمان كشف حساب معلن للمبالغ المحصله وأوجه وأسلوب صرفها وبكده الفلوس كتيرة أو قليلة مش حتفرق معانا حنبقى مقتنعين وعلى فكرة كمان فيه فلوس كل ستة أشهر للمياه ومتوسطها 100-120 جنيه . أما بالنسبة لرسوم البوابات لسه مافيش حاجة زى كده حصلت ولا حتى أعلان رسمى عنها وفى إعتقادى الشخصى إن الرسوم ديه لو فعلا حتطبق حتبق على زوار المنتزهات العامة زى المولات والسوق التجارى والفود كورت لكن مش حتبقى على الأهل وأكيد حيكون في تليفون على البوابة للتأكد من دخول الأهل لزويهم أو للتنزه داخل الرحاب أو على الأقل وجود كروت دعاوى زى المعمورة والمنتزة والكلام ده أو على الأقل حيبقى فيه نظام معين وده فى مصلحة سكان الرحاب بدل الصورة الموجوده دلوقتى وفى أخر حوارى أحب أقولك لاء طبعا ما تلغيش حجزك وإستمرى لأن الظروف إنشاء الله حتتحسن عن كده كمان والرحاب حلوه وإنشاء الله حتبقى أحلى بعد تغير جهاز المدينة وعلى الأقل هى فى الوقت الحالى أحسن الوحشين

مع تحياتى لجميع سكان الرحاب

وتفاؤلى ودعواتى الخالصه لمستقبل مدينتنا

lily · 13/10/2008 10:17:30 AM

والرحابيين مستنيينك تشرفي الرحاب وتنضمي لينا - لكن الحقيقة زي زملائي ما قالوا ان علشان احنا بقالنا كتير في الرحاب وحضرناها وهي فاضية ومستوى الخدمة فوق المتوقع جالنا احباط لما اتملت والباركنجز بقت مليانة والدوشة زادت - دة مقارنة بالرحاب زمان لكن طبعا لو قارنتيها بأيمنطقة في مصر طبعا مفيش مقارنه والرحاب تكسب - لا تترددي وان شاء الله تستلمي وتيجي تشاركينا ما نطمح إليه من مدينة رائعة واحنا ورا الجهاز لحد ما نشوف معاه حل دة مش ذما فيه والله ولكن الطموح للأفضل

nona · 13/10/2008 11:04:29 AM

جارتنا الفاضلة ميـرو ألف مبروك الشقة الجديدة و إن شاء الله تسكنيها و يسكن معاكي فيها أسرتك الكريمة و يحل عليكم السعادة و البهجة و السكينة بالسكن الجديد لكن أنا عاوزة أطمئنك و الله الرحاب جميلة جداً و هي من أنجح المشاريع و المدن السكنية بالمقارنة لمدن أخرى دون ذكر أسمائها من واقع زياراتي لأقاربي و اصدقائي بالمدن الأخرى فالرحاب أفضلهم بأمانة و لكن طبعاً كل مشروع له سلبياته وله مميزاته و أعتقد إن المميزات أكثر بكثير من السلبيات فأنا أسكن بالمرحلة الرابعة و لا أرى حتى الآن ما قرأته و أنا طبعاً متأكدة من كل ما قرأت مع جيراني الأفاضل فهم طبعاً صادقين و زي ما قالوا ده لان الرحاب لسة فاضية شوية و قريبة من الصحراء و لكن بالنسبة للخدمات و الباركينج و خلافه فهي عندنا كويسة و الرؤية و المناظر الطبيعية جميلة جداً و لما بنواجه مشكلة في الصيانة صحيح أحياناً الإستجابة بتكون بطيئة و ده لأن في كل مكان هتلاقي موظف محترم و شغال بضمير و موظف عكسه و دي مشكلة عامة في بلدناو بلاد أخرى كثيرة و بصفة عامة الرحاب ممتازة جداً و الله أما بخصوص مشكلة رسم الدخول فده طبعاً حل غير منطقي بالمرة و ما ينفعش خالص يا جماعة يعني مش معقول يكون جاي لنا أقارب أو أصدقاء أو حتى عمال يشتغلوا في البيت و يدفعوا أو ندفع لهم مبلغ رسم دخول كل فرد لأ طبعاً و أعتقد ممكن حد يفكر بشكل آخر للمحافظة على النظام و النظافة و خلافه من غير غرامات أخرى الحكاية يا جماعة مش ناقصة و الله الناس أصلاً مخنوقة من الغلاء و المصاريف . فبرجاء

التفكير في حل آخر يرضي جميع الأطراف ولا يتم القرار إلا بعد موافقة السكان أو علىالأقل الملاك فأهلاً بك يا جارتنا الجديدة و إوعي تفكري في إلغاء قرار سكنك بالرحاب الجميلة و صدقيني عمرك ما هتندمي إن شاء الله و زي ما جيراني الأفاضل قالوا كلنا لازم نبقي يد واحدة في القضاء على أي خلل عامة و محاولة حل مشاكل الرحاب مع جهاز المدينة و لو حتى نقوم بشكوي ضده في المركز الرئيسي و كلنا نكون يد واحدة للحفاظ على رحابنا الجميلة و زي ما بيقولوا طولة العمر بتلغ الأمل

فتعالى الرحاب مستنياكي و على فكرة المرحلة الخامسة بجوار المرحلة الرابعة و ألف مبروك و فقكي الله أنت و أسرتك الكريم

ابن عثمان · 13/10/2008 2:10:11 PM

يا جماعة، من حوالي شهر ونص كان فيه زميل بعت يسأل عن نفس الموضوع، وكان عنوان موضوعه قلقتونا

وبقية الزملاء أدلوا بدلوهم في الموضوع

اللنك بتاع الموضوع أهو، للي عايز يرجعله

قلقتونا

http://www.rehaby.net/forum_view_topic.php?id=831&cat=7&subcat=35

ميرو · 13/10/2008 2:25:32 AM

جزاكم الله كل خير للأفادة الرائعة والأستجابة لجيران المستقبل بأذن الله ولقد شفيتم صدرى من الخوف وازلتوا مخاوفى بالشكل الموضوعى الى تكلمتوا بيه

شكرا للأستاذ emad وبالفعل فكرة جيدة قضاء يوم فى الاسبوع للتعرف عليها اكثر وهذا مانفعله عند التواجد فى مصر وتبهرنى المدينة وعند الخروج منها اقول امتى نستلم شقتنا ونفضل فيها واشكر لك دعوتى بالتمسك بالحجز

اشكر الاستاذ boudy على شرحه الوافى المترابط العادل فى نفس الوقت بين كفتى السلبيات والإيجابيات وبيانه وأفادته لى للمعلومات بما هو مطلوب من صيانة ومياه بارك الله فيك فقد قربت المسافات وافادتنى جدا وربنا يستجيب لرغباتكم بالنسبة لجهازالمدينة التى اجتمعت الأراء على سوء خدماته للأسف

واشكر السيدة ليلي والسيدة نونا على ترحيبهم بى كجارة لهما وتأكيدهما لى على عدم الأنسحاب وشكرا لدعوتكما الطيبة ويكون شرف لى ان اكون جارتكما

اشكر الاستاذ ابن عثمان على مشاركته وافادتى باللينك الخاص بالمشكلة المشابهة التى بصراحة فتحت لى مشكلة اخرى وهى تسجيل العقود وظنون البعض بالتخوف من النصب او اغراض اخرى من عدم التسجيل او اثبات الملكية

بارك الله فيكم جميعا وجزاكم الله خيرا على دعوتكم الطيبة وازالة مخاوفى وربنا المعين فى سداد الاقساط

madymoody2005 · 14/10/2008 1:06:25 PM

واضح ان الخوف اصبح سمة مشتركة لاغلب الحاجزين منهم اللى خايف ان المشروع مايتمش علشان الاحداث الجارية الان ومنهم اللى قلق على مستوى الرحاب من حيث الامن والنظافة وان تطال يد الاهمال الرحاب وجمالها المشكلة انك ماتلاقيش حد يطمنك احنا اللى بنطمن نفسنا مننا فينا تطمين ذاتى علشان نفسنا كل حاجة تطلع حلوة الواحد نفسه يلاقى اى مشكلة تحصل يبقى فيه شفافية سواء الشفافية بالسلب او بالايجاب لكن هاتعرفنا احنا رايحين فين علشان كل واحد مننا يقدر يحسبها صح لكن تلاقى غموض فى مصير اى حاجة تبداء حلوة وتنتهى اسواء نهاية يعنى تلاقى نفسك مش قادر تحسب اى حاجة ولا تقدرها حق قدرها يعنى بتدخل فى اى حاجة وانت ونصيبك ورزقك وطول ماحنا كده مش هانتقدم ابدا هانفضل فى حلقة مفرغة وهكذا دواليك يعنى انا واحد من الحاجزين فى المرحلة التاسعة بالرحاب واصبح عندى قلق رهيب على مستوى الرحاب وقبلها قلق اكبر ياترى المشروع هايكمل اصلا ولا ........اتمنى من الله ان تسير الامور على مايرام وتتحسن احوال الرحاب اللى كان حلم من احلامى من ايام ماكنت الراحلة سناء جميل تطلع فى التلفزيون وتتكلم على الرحاب وتقول الناس دى مابتهرجش وتحكى عن الجمال اللى هايكون عشر سنوات والواحد بيحلم الحلم الجميل الراقى ده خايف اصحى منه على كابوس اهو كلام والسلام وشوية فضفضة مع الاحباب