انا سامع ان الاسعار انخفضت فى حدود 200 جنيه للمتر ياريت رحابى ياكدلنا الكلام ده او يدينا اخر سعر وياريت كمان سعر اشتراك النادى بالتفصيل للحاجزين بدون النادى وشكرا مقدما يارحابى

 أنا كنت في المبيعات واتأكدت ان محصلش أي زيادة ولا تخفيض في الاسعار من 31/8 وهي بالضبط زي الاسعار اللي على الموقع - ولما سألتهم ان الأسعر كلها في مصر نزلت المسؤول قاللي بالحرف : انهم عملوا دراسة لقوا ان الشركات بتخفض سعر المتر للزبون وبعدين ياخدوا الفرق اللي نزلوه في الصياتة أو أي بند آخر وبالتالي الرحاب ومدينتي مش هينزلوا السعر

 أسعار اشتراك النادي اعتبارا من 11/9/2007 حتى الآن: الفوري الكاش:30000ج تقسيط سنة:مقدم 15000 شهري1425 إجمالي32100 تقسيط سنتين:مقدم 10750 شهري1000 إجمالي34750 تقسيط 3سنوات:مقدم 9000 شهري800 إجمالي37800 تقسيط 4سنوات:مقدم 7500 شهري700 إجمالي41100

اشكرك يالى لى على المعلومات القيمة دى وبالخصوص اشتراك النادى واطمع فى معلومة تانى بما انك من المقيمين حاليا بالرحاب لما بتكونى على التبة عند جهاز البيع هل حضرتك بتتمكنى من رؤية العمل بالمرحلة التاسعة والثامنة واخبار العمارات ايه ياترى بدات تظهر ولا لسه والشغل قائم ومستمر واشكرك على معلوماتك القيمة 

 من حوالي 4أشهر تم نقل جهاز المبيعات من التبة ألي منطقة البنوك أما عن العمل في المرحلة 9و8 بجوار النادي اري تطور كبير بالأعمال من أسبوع لأخر

 

تحياتي و شكرا للى لى علي الأفادة القيمة بخصوص الأسعار

شكرا ياعماد انا علشان مش متاحلى الايام دى ومافيش وقت اروح الرحاب مش عارف ايه التطورات ولكن اشكرك على المعلومة القيمة دى التى اثلجت صدرى كان فعلا عند التبة الواحد ممكن يشوف تطور الاعمال واتمنى كل مسأل عن تطورات العمل تثلج صدرى بردك اشكرك ياعماد مرة اخرى واشكر لى لى

 الشركة بتحاول ان تحافظ على سمعتها علشان كدة الشغل حلو في كل منطقة في الرحاب - دة حتى أنا سمعت من ناس شغالة في مدينتي انهم عملوا أماكن اقامة جوة مدينتي لعمال التشطيبات علشان يسلموا بدري - يارب مفيش حاجة تتضرر في مدينتنا الجميلة بصراحة هي ملجأ لينا بعيد عن زحمة القاهرة ودوشتها

 أسعار النادى المذكورة أعلاه وهى أسعار مختلفة من الأسعار الموجودة بالموقع ، هل من تفسير لذالك!!

بيتهيألي إن الأسعار اللي في صفحة "نصائح وإرشادات" خاصة بالاشتراك الإجباري لما بتحجز شقة جديدة، وانظمة التقسيط يتكون في منها على 4 أو 6 أو 8 سنين، أما الأسعار اللي مكتوبة هنا فخاصة بالنادي لو الواحد عايز يشترك فيه بشكل منفصل، يعني مثلاً كان شاري شقة زمان قبل ما يعملوا الإجبار، ودلوقتي عايز يشترك في النادي، فديه الأسعار المتاحة. هذا والله أعلم، لو حد عنده تأكيد أو نفي يا ريت يعرفنا.